Read Kahua 1 JOANE 4 Bible Online

1 JOANE 4 - Kahua bible

1 JOANE 4

¹Goaku hetakui, siana kamu tongesurira na enoni hato, ga visia, vi ngaira ka nahunia na Higona Apu, ma kamu bâsia noga, manga vi ngaira, ma ka paronga suria na obaniha iana God, se mareha. Renia i maveta ka rako na poropete hagaparu.

²Igamu kamu bâgirara, vi na Higona Apu ki manga ikê: na enoni, i tongesuria o Jesu Kirisito vi vora re enoni, ngaia ki nahunia na Higona Apu.

³Ma na enoni, i pe tongesuria, vi o Jesu ki vora re enoni, ngaia ki pe nahunia na Higona Apu. Ngaia ki takotako manga na Merongana o Kirisito. Igamu kamu bani rongoa, vi ngaia ki page arâ me. Hoita, ngaia ki gâga i maveta i na matena i ngekê.

⁴Kariaku hetakui, igamu na kariana God, ma igamu kamu bani teharira noga na poropete hagaparu. Na Higona Apu ki angarigamu, ma ki ramo teharia Satana, i oga i pasita na kariana.

⁵Na poropete hagaparu ngaira ka tamasi manga Satana, ma na enoni era i maveta ka têtê viteata, suria ngaira na kariana Satana.

⁶Megia ka na kariana God. Na kariana God ka têtê viteaka. Ma na enoni, i mareha vi na kariana God, ngaia ki pe tê viteaka. Tahema igia ka bâgirara na Higona Apu ma Satana.

⁷Goaku hetakui, ga ama ni hetakuiheri nga, suria na hetakuiha ki râ me tenia God. Na enoni, i hetakui, ngaia ki na karena God, ma ki aitangisia God.

⁸Na enoni, i pe hetakui, ngaia ki pe aitangisia God, renia God ngaia ki na hetakuiha.

⁹God ki bani hagabângenia tangagia, suria i takuigia, vikê: ngaia ki hagatorangenia me i maveta o Karena i tage, hanana i hagamaurigia renia ngaia.

¹⁰Na hetakuiha monari ki manga ikê: igia ki mareha vi ge takuia God, ma ngaia hete kani takuigia, ma ki hagatorangenia me o Karena, hanana i kasia na mena renigi na tasi iaka.

¹¹Goaku hetakui, suria God ki takuigia bâraha ngavê, tahema i tuguhigia, vi igia nogaka ka hetakuiheri.

¹²I asa ta na enoni, vi ge bani bâsia God. Manga vi igia, ma ka hetakuiheri, God ki goga henigia igê na aitangihaka, ma ki takuigia bâraha ngavê.

¹³Ma ki manga i he kaniga girara, vi igia ka gâga igê na obahahaku henia God, ma ngaia ki goga igê na obahahaku henigia? Suria ngaia ki bani vategia na Higona Apu.

¹⁴Megami kami bani bâsia, ma kami hagarongora na enoni getera renia, suria God Vaemana ki bani hagatorangenia me o Karena, hanana i hagatahira na enoni i maveta.

¹⁵Manga ta na enoni, ma ki tongesuria o Jesu, vi ngaia ki no Karena God, God ki goga igê na obahahaku henia, ma ngaia nogana ki obâbahaku henia God.

¹⁶Megia mareka ka girara ma ka tongesuria, vi God ki takuigia maninga. God ngaia ki na hetakuiha, ma na enoni, i ama ni hetakui nga, ngaia ki obahaku henia God, ma God ki obahaku henia nogana.

¹⁷Ma God ki takuigia bâraha ngavê, hanana igia ka page nahunia na hagêguringa igê na tangiana na Suriha Raha, renia na mêrihaka i maveta ikê ki maratorana na mêrihana o Kirisito.

¹⁸Igê na hetakuiha ki asa vi na maguha. Manga God, ma ki takuigia bâraha ngavê, igia ki asa iaka, vi ge magu. Tahema na enoni, i pe hetakui bâkoro ngavê, ngaia ki magu, suria na maguha ki râ henia na hagaitangiha.

¹⁹God ki takuigia hagenago. Tahema igia ka hetakuiheri.

²⁰Ata ni vi ma: manga vi ta na enoni, ma ki vi, “Inê kê takuia God,” ma ngaia ki merongasia tare na tamana, ngaia ki na enoni ni hagaparunga. Ngaia ki bâsia na tamana, ma ki pe takuia. Ma ki manga i he kani girara i takuia God, suria ngaia ki pe bâsia God? Manga ngekana, ki asa hagetage!

²¹Hoita, ikê na ramata, God i bani vategia renia: na enoni, i takuia God, ngaia ki tuguhia, i takuia nikâ na tamana.