Read Kahua 1 JOANE 5 Bible Online

1 JOANE 5 - Kahua bible

1 JOANE 5

¹Na enoni, i tongesuria, vi o Jesu ki na Mesaia, ngaia ki na karena God. Ma na enoni, i takuia God Vaemana, ngaia ki takuia nikâ o Karena.

²Tahema igia ka girara, vi igia ka takuira na karena God, matena igia ka takuia God, ma ka marupegi na ramata iana.

³Tahema, manga vi igia, ma ka takuia God, igia ka marupegi na ramata iana. Ma na ramata iana ka mareha vi ge bara tangagia,

⁴suria na ara ni karena God ki girara i teharia na eraha i maveta. Renia nogana na tongesuriha iaka igia ka girara ga teharia na eraha i maveta.

⁵Ti ki girara i teharia na eraha i maveta? Ngaia ma na enoni i tongesuria o Jesu, vi ngaia ki no Karena God.

⁶Ngaia nga o Jesu Kirisito ki bani râ me. Ngaia ki mererârua me na ve na batesimo iana ma na gapuna na mera iana. Ngaia ki mareha vi ge merâ me ma na ve, ma ki mererârua me hete na ve ma na gupuna. Ma ngaia nga na Higona Apu ki visia mataha nikâ, vi na tarana ngekana ki monari, renia i asa iana na Higona Apu, vi ge hagaparu.

⁷Tahema, na vera oru ngegê agê ka tamasi mataha:

⁸na Higona Apu, na ve, ma na gapu. Ma ki râ haku na tamasinga iata na vera oru ngegê.

⁹Igia ka tongesuria na tamasinga iata na enoni. I monari, ma na tamasinga iana God ki monari teharia na tamasinga iata na enoni. Tahema ngaia ki na tamasinga iana God renia o Karena.

¹⁰Na enoni, ma ki tongesuria o Karena God, ngaia ki nahunia igê na aitangihana na tamasinga ngekana. Ma na enoni, i pe tongesuria God, ngaia ki haritohea God, suria ngaia ki pe tongesuria na tamasinga iana God renia o Karena.

¹¹Ma na tamasinga iana God ki manga ikê: God ki bani vategia noga na mêriha mora ma tarema, ma na mêriha ngekana ki na anika renia o Karena.

¹²Na enoni, i voravora na kariana o Karena, ngaia ki nahunia na mêriha ngekana. Ma na enoni, i mareha vi na kariana o Karena God, ngaia ki pe nahunia na mêriha.

¹³Inê kê segea na tarana ngekana tangagamu, hanana mu girara bâkoro, vi igamu kamu nahunia na mêriha mora ma tarema, suria igamu kamu tongesuria o Karena God.

¹⁴Tahema igia ka nahunia na hagêguringa i maana God. Igia ka girara bâkoro, vi ngaia ki aganaria na nunginungiha iaka, matena igia ka nungia tenia ta na marâ, i arâ suria na obaniha iana.

¹⁵Ngaia ki aganaria na nunginungiha iaka i na ara ni matena igia ga nungia igê. Renia igia ka girara, vi na tarana ngekana ki monari, igia ka girara nikâ, vi ngaia ki vategia na marâ, igia ga nungia tenia.

¹⁶Manga ta na enoni, ma ki bâsia na tamana i râ tasi, ma God ki pe hagaitangia renia na mera, i koro, ki nungia na mauriha tenia God, tanga na tamana. God ki page vatea na mêriha ngekana tangara na enoni, ma ki pe hagaitangira renia na mera. Ma ki gâga ta na tasi, God i hagaitangia renia na mera hagahu, menê kê pe visia tangagamu, hanana vi gamu nunginungi tanga God renia.

¹⁷Na ara ni tauha era ki na tasi, ma tani na tasi God ki pe hagaitangigi renia na mera.

¹⁸Igia ka girara, vi na enoni, i voravora re na karena God, ngaia ki pe ama ni tasitasi nga renia o Karena God ki anumasia, ma Satana ki asa, vi ge erasia.

¹⁹Igia ka girara, vi igia ka na kariana God, ma na maveta hagenani Satana ki nahunia.

²⁰Igia ka girara, vi o Karena God ki bani râ me, ma ki bani hagesurigia. Tahema igia ka aitangisia na God monari. Igia ka obâbahaku henia God monari, ma henia o Jesu Kirisito, o Karena. Ngaia nga ngekê ki na God monari, ma ngaia nga ngekê ki na mauriha mora ma tarema.

²¹Kariaku hetakui, mu hinarugi na eraha ma na hagesuringa babanga.