Read Kahua MANE NI HAGAOTONGA 1 Bible Online

MANE NI HAGAOTONGA 1 - Kahua bible

MANE NI HAGAOTONGA 1

¹I murina i me o Josua, na Isiraelita ka hagatea na Araha, ka vi: “Na ani ta na varo ninuni iamami kani tuguhia vi hagenago ki taharira na Kananita?”

²Na Araha ki arami, ki vi: “Na varo ninuni iana o Juta kani page hagenago, suria ngaia kanigê bani hêtana renia na apanena ngekana.”

³Na varo ninuni iana o Juta ki vi tanga na varo ninuni iana o Simeone, ki vi: “Mu râ me henigami igê na apanena, ga bani hêtamami renia, hanana igia haku ke meraheariha na Kananita. Ma hemuri igami kami page arâ henigamu nogamami igê na apanena, ga bani hêtami renia nogami.” Vikê na varo ninuni iaterua hegitigi o Simeone

⁴mo Juta karu haku tanga na hearihatana. Na Araha ki katora ka teharira na Kananita ma na Perisita. Ngaira ka teharira na rehagaro tangahuru gi tage na mane ni me i Beseke.

⁵I ngekana ngaira ka tarahua igê o Atonibeseke ma ka meheariha.

⁶Ngaia ki gava ma ngaira ka tarigenia. Ngaira ka têa ma ka retegi râ na kakêni raha na rimana ma na êgana.

⁷O Atonibeseke ki vi: “Inê kê retegi râ na kakêni raha na rimata ma na êgata na maneraha tangahuru gi pi. Ngaira ka ngêgi na anunugani na ngêra i ruguhana na bea gê ngê igê. I ngekê God ki katoa tangê na tarana, gê katoa tangara ngaira.” Ngaira ka torea i Jerusaleme ma ki me igê.

⁸Na raraha iana o Juta ka taharia i Jerusaleme ma ka henahuraua. Ngaira ka mutera na enoni igê ma ka sungia na hinua.

⁹I murina ngekana ngaira ka râ nga ma ka meraheariha na Kananita ga oga igê na hungani, i Negeve ma igê na bena i Sefela.

¹⁰Ngaira ka tavo uga, hanana ga meraheariha na Kananita ga oga i hinua i Heberoni, ga hêtana i nago vi Kiriata Araba. I ngekana ngaira ka teharira igê na ai ni Sisai, ni Agimane ma i Talamai.

¹¹Tenia i ngekana na raraha iana o Juta ka tavo uga, hanana ga taharia na hinua i Tebire, ga hêtana vi Kiriata Sepere.

¹²O Kalebe na hitangita ki vi: “Na mane, i henahuraua i Kiriata Sepere, inê kê page hagamarumungenia ka kareku ka Akasa tanga ki auragia.”

¹³O Otoniele karena o Kenasi, vesina o Kalebe ki henahuraua na hinua. Vikê o Kalebe ki hagamarumungenia ka Akasa ka karena tanga ki êragia.

¹⁴Matena garu auragi, o Otoniele ki tuguria ka Akasa, ki vi: “Gu nungia o vaemamu renia na mako.” Ka Akasa ki vato tenia na tonki iana ma o Kalebe ki hagatea, ki vi: “Na ta ko obania?”

¹⁵Ngaia ki arami, ki vi: “Inê kê obanigi tani na ve karu, suria na mako go vateê renia, ki oga igê na masusu.” Vikê o Kalebe ki vatea renigi na ve karu, na ani i ano ma na ani i ahaha.

¹⁶Na raraha iana na Kenita o hungâna o Moise ka râ nga henira na raraha iaterua o Juta mo Simeone tenia i Jeriko, na hinua ni geara, tanga na masusu i Negeve hagarangia i Arata i Juta. Ngaira ka oga i ngekana i berarogata na Amalekita.

¹⁷Na raraha iana o Juta ka râ henira na raraha iana o Simeone, ma ngaira haku ka teharira na Kananita, ga oga i hinua i Sepate. Ngaira ka tê erasia ngavê na hinua ma ka ruhuruhua ma ka hêtana renia vi Goroma, i vi Aruhuruhunga.

¹⁸Ngaira ka henahuraugi nikâ i Gasa, i Asekeloni me Ekoroni henigi na mako rihigi.

¹⁹Vikê na raraha iana Juta ka henahuraua na apanena i huhunganiga, suria God ki tamanira. Ma na raraha iana o Juta ki bara tangara, vige tarigenira hura na enoni igê na tarasini, suria ngaira ka nahunigi na kati ni me na aiani.

²⁰O Kalebe ki têa i Heberoni, manga i bani visia o Moise. Ngaia ki tarigenira hura o karena gi oru o Enaka.

²¹Na varo ninuni iana o Benamino ki pe tarigenira hura na Jebusita tenia i Jerusaleme, ma ki tariha me i ngekê na Jebusita ka gâga mêngara i ngekana henira na raraha iana o Benamino.

²²Na raraha iaterua o Eparaimi mo Manase ka râ ka taharia na hinua i Betele, ga hêtana nikâ vi Lusi. Na Araha ki tamanira.

²³Ngaira ka kasira na mane ga râ bâbâ i hinua.

²⁴Na mane ga râ bâbâ, ka bâsia ta na mane i hura me tenia na hinua. Ma ngaira ka vi tanga, ka vi: “Hoi, gu hagabâsigami renia na agua ga bêbanu igê tanga na hinua. Igami ki asa vigami henakago.”

²⁵Hoi ngaia ki hagabâsira renia. Ma ngekana na raraha iaterua o Eparaimi mo Manase ka mutera na enoni hato i hinua, nga noga ma na mane ngekana ma na ruma iana ka tahi.

²⁶I hemuri ngaia ki râ i na apanena iata na Hitita. Ngaia ki tagarahia igê na hinua ma ki hêtana vi Lusi, ma ka hêtana mênga vikana i ngekê.

²⁷Na varo ninuni iana o Manase ka pe tarigenira hura na enoni, ga ogasigi na hinua i Bete Seana, i Tanaka, i Tore, i Ibiliama, i Megito ma igê na hinua hagarangigi. Na Kananita ka oga nga i ngekana.

²⁸I hemuri, matena na Isiraelita ka ramo ngavê, ngaira ka tugurira na Kananita ka tagara tangara, suria i bara tangara, vige tarigenira hura hato.

²⁹Na varo ninuni iana o Eparaimi ka pe tarigenira hura na Kananita ga oga i hinua i Gesere. Vikê na Kananita ka oga so nga henira.

³⁰Na varo ninuni iana o Sebuluni ka pe tarigenira hura na enoni, ga ogasirerua na hinua i Kiteroni me Nahalole. Tahema na Kananita ka oga so nga henira. Na raraha iana o Sebuluni ka tugurira ka tagara tangara.

³¹Na varo nununi iana o Asere ka pe tarigenira hura na enoni, ga ogasigi na hinua i Ako, i Sitone, i Agalaba, i Akasibi, i Geleba, i Apeke me Regabo.

³²Na raraha iana o Asere ka oga henira na Kananita i ngekana, suria ga pe tarigenira hura.

³³Na varo ninuni iana o Napatali ka pe tarigenira hura na enoni, ga ogasirerua i Bete Semei me Betanata. Na raraha iana o Napatali ka oga henira na Kananita i ngekana ma ka tugurira ka tagara tangara.

³⁴Na Amorita ka tugurira na raraha iana o Tane ka ogasigi na hungani ma ka manimania tenira na bena.

³⁵Na Amorita ka ogasigi nga i Aialone, i Salabimi me Haregeresi. Na raraha iaterua o Eparaimi mo Manase ka marungira ma ka tugurira ka tagara tangara.

³⁶Na pererperegana na apanena iata na Etomita ki haganega igê na Marahiragana i Akarabimi tanga i Sela, ki râ.