Read Kahua MANE NI HAGAOTONGA 10 Bible Online

MANE NI HAGAOTONGA 10 - Kahua bible

MANE NI HAGAOTONGA 10

¹I murina i me o Abimeleki o Tola karena o Pua ma o virana o Toto ngaia ki râ me ki hagatahira na Isiraelita. Ngaia ki na raraha iana o Isakare. I pasina kani i Samire igê na hungani i Eparaimi.

²Ngaia ki bêngenira na Isiraelita surigi na harisi tangahuru gi rua matara gi oru ma ki kahu me ma ka bagia i Samire.

³I murina o Tola ki urakê o Jairi na mane i Giliata. Ngaia ki bêngenira na Isiraelita surigi na tangahuri harisi gi rua matara gi rua.

⁴Ngaia ki aparara o karena tangahuru gi oru, ga tagirira na tonki tangahuru gi oru. Ngaira ka nahunigi na hinua tangahuru gi oru igê na apanena i Gileata. Ga hêtani mênga i ngekê vi hinua iana o Jairi.

⁵O Jairi ki me ma ka bagia i Kamone.

⁶Na Isiraelita ka haritohea nikâ na Araha, suria ga vogasira o Bala ma ka Asetareta ma na ataro i Arama, i Sitone, i Moaba, i Amone ma i Pilisitia. Ngaira ka murisigea na Araha ma ka hato vige rahesia.

⁷Tahema na Araha ki mangariaga tangara na Isiraelita ma ki nakara na ai ni Pilisitia ma na Amonita ka teharira.

⁸Surigi na harisi tangahuru matara ke varu ngaira ka merongasira ma ka hagamamasiagara igê na Isiraelita hato, ga oga igê na apanena iata na Amonita kerekê i ve i Jotano i Gileata.

⁹Na Amonita ka tarêhia i Jotano, hanana ga meraheariha na varo ninuni iata hehegitigi o Juta, o Benamino mo Eparaimi. Na Isiraelita ka oga igê na eraha.

¹⁰Hoita, na Isiraelita ka avarasia na Araha, ka vi: “Mi hetaki, suria mi haritohego. Igami kami murisigego igo God iamami ma kami vogasia o Bala.”

¹¹Na Araha ki aramira, ki vi: “Na ai ni Esipito, na Amorita, na Amonita, na ai ni Pilisitia,

¹²na ai ni Sitone, na Amalekita ma na Maonita ka bani hagamamasiagagamu i nago, ma igamu kamu bani avarasiê. I hega, inê kê pe bani hagatahigamu tenira?

¹³Henaka, ma igamu kamu murisigeê ma kamu vogasira na ataro. Vikana inê ki hato ve hagatahigamu nikâ.

¹⁴Râ, ma kamu avarasira na ataro, mu bani atera. Nakara ke hagatahigamu, matena ga tarahugamu na bagabevoani.”

¹⁵Ma na Isiraelita ka vi tanga na Araha, ka vi: “Igami kami tangahurigami. Na tarana ta ko obania, i koro ma. Ma na marâ gi tage: Gu hagatahigami i ngekê.”

¹⁶Vikê ngaira ka kasira vê na ataro iata ma ka rahesia na Araha. Ma na Araha ki takoha raha renigi na mamasiaganiha iata na Isiraelita.

¹⁷Hoi, na mane ni me iata na Amonita ka nanêa na hearihatana ma ka tênga i Gileata. Na mane ni me iata na Isiraelita ka tênga i Misipa i Gileata.

¹⁸Na Isiraelita ma na enoni raha i Gileata ka hehagateri i ngekana, ka vi: “Ti kani page bêngenigia ka meraheariha na Amonita? Naka ma o ti, ngaia ki page marungia i Gileata.