Read Kahua MANE NI HAGAOTONGA 11 Bible Online

MANE NI HAGAOTONGA 11 - Kahua bible

MANE NI HAGAOTONGA 11

¹O Jepeta ngaia ki na mane ni me ramo tenia i Gileata. Ngaia ki no karena na gete na êrâ. O Gileata o vaemana,

²ma kaniana karu aparara tani na kare mane nogaterua. Matena na kare mane ngegê ka raha, ngaira ka paia o Jepeta. Ngaira ka vi tanga, ka vi: “Igo ki asa vigu page nahunia ta na apanena na nahuninga iana o vaemaka. Igo ka na karena na gete getea.”

³O Jepeta ki gavatenira na goana ma ki râ ki oga igê na apanena i Tobo. I ngekana ngaia ki hagahakura me igê na mane ga oga sutaga, ma ngaira ka tage arârâ, hanana ga gâga sutaga.

⁴I murina ngekana na Amonita ka haganega ka meraheariha na Isiraelita.

⁵I na matena ngekana na enoni raha i Gileata ka râ ka torea aporo o Jepeta tenia i Tobo.

⁶Ngaira ka vi tanga, ka vi: “Râ me, ku bêngenigami ke meraheariha na Amonita.”

⁷O Jepeta ki arami, ki vi: “Igamu kamu bani kiteniê ma kamu paiê tenia na ruma iana o vaemaka. Tanu hega kamu tabeê me matena i tarahugamu na bagabevoani?”

⁸Ngaira ka vi tanga o Jepeta, ka vi: “Igami kami tabego me i ngekê, suria mi obanigo, vigo arâ henigami ko meraheariha na Amonita ma ko page marungigami hato na enoni i Gileata.”

⁹O Jepeta ki vi tangara, ki vi: “Manga vigamu meêaporo ka meraheariha na Amonita, ma na Araha ki katoê kê teharira, hoi, inê kê page marungigamu.”

¹⁰Ngaira ka arami, ka vi: “Igami kami tohe renia na Araha, vi igami kami aganaria na tamasinga iamu.”

¹¹Vikê o Jepeta ki râ henira na enoni raha i Gileata, ma na enoni ka kasia ki marungira. I Misipa i maana na Araha o Jepeta ki visia mataha igê na suruheri iana.

¹²Hemuri ngaia ki hagatorangenira na mane tora tamasinga tanga na maneraha iata na Amonita, ka vi: “Tanu hega go merongasigami? Tanu hega ko banu me i na apanena iaku ko megamiheariha?”

¹³Na maneraha iata na Amonita ki aramira na mane tora tamasinga iana o Jepeta, ki vi: “Matena na Isiraelita ka hura tenia i Esipito, ngaira ka parênia na apanena iaku, haganega i ve i Aranone tariha i ve i Jaboko ma i ve i Jotano. Hoi, mu vateê aporo maninga.”

¹⁴O Jepeta ki hagatorangenira nikâ na mane tora tamasinga tanga na maneraha iata na Amonita,

¹⁵ka vi: “Igo ko hagaparu. Na Isiraelita ka pe parênia i Moaba se vi i Amone.

¹⁶Ngaia ki manga ikê hete: Matena na Isiraelita ka pania i Esipito, ngaira ka aharêvoro igê na bagamasusu raha tanga na asi i Akaba ma ka ata i Katesi.

¹⁷I ngekana ngaira ka hagatorangenira igê na mane tora tamasinga tanga na maneraha i Etome, ma ka nungia, hanana vi hagamarumungenira ka aharêvoro igê na apanena iana. Ma na maneraha i Etome ki manimani. Ngaira ka nungia vikana nikâ na maneraha i Moaba, ma ngaia ki manimani nogana. Tahema na Isiraelita ka oga so ma i Katesi.

¹⁸Hemuri ngaira ka aharêvoro nga igê na bagamasusu raha ma ka susu pane rihirerua na apanena i Etome ma i Moaba, mataro me ka ata i na apanena akê i Moaba, i na apanena tarê na ve i Aranone. Ngaira ka tênga i ngekana. Ngaira ka pe tarêhia rârâ na ve i Aranone, suria ngaia ki na pereperegana i Moaba.

¹⁹I ngekana na Isiraelita ka hagatorangenira na mane tora tamasinga tanga na maneraha iata na Amorita o Sigone i Gesebone. Ngaira ka nungia, hanana vi hagamarumungenira ka aharêvoro igê na apanena iana tanga agua iata mareta.

²⁰Ma o Sigone ki manimani. Ngaia ki hagahakura na mane ni me hato iana, ki tênga i Jahasi ma ki taharira na Isiraelita.

²¹Ma na Araha God iata na Isiraelita ki katora na Isiraelita ka teharia o Sigone henira na mane ni me hato iana. Vikana na Isiraelita ka parênia na apanena haganani iata na Amorita, ga oga i ngekana.

²²Ngaira ka ogasia na apanena hagenani iata na Amorita, haganega tenia i Aranone i Negeve tariha i Jaboko, ma tenia bagamasusu raha kerekê tariha na ve i Jotano kereso.

²³Na Araha God iata na Isiraelita kani tarigenira hura na Amorita tarata na Isiraelita na kariana vikana.

²⁴I hega, go obania vigo uhungia ko taua aporo vari? Go nahunia ma na apanena o Kemosi na ataro iamu ki bani haganahunigo renia. Ma igami kami nahunia na apaneni na Araha God iamami ki haganahunigami renigi.

²⁵I hega, go vi vari, vi igo ko ramo teharia o Balaka na maneraha i Moaba karena o Sipore? Ngaia ki merahetagetage na Isiraelita, iê? Ngaia ki pe megamiheariha, iê?

²⁶Surigi noga na tangarê harisi gi oru na Isiraelita ka bani ogasigi i Gesebone me Aroere ma na hinua hato rihirerua, ma na hinua hato i papana na ve i Aranone. Tanu hega ko pe bani taugi aporo igê na mateni ngegana?

²⁷Mareha, inê kê pe katoa rârâ ta na marâ vige era tangago. Igo hete kanigo erasiê, suria go meêheariha. Na Araha ma kani hagaotoa. Ngaia nga kani page hagaotoa na berarogata na Isiraelita ma na Amonita.”

²⁸Ma na maneraha i Amone ki pe gagêmaga renia na tamasinga iana o Jepeta.

²⁹Hoi, na raramohana na Araha ki angaria o Jepeta. Ngaia ki râhigi na apaneni i Gileata me Manase ma ki aporo tanga i Misipa i Gileata, ma ki râ nga tanga i Amone.

³⁰O Jepeta ki suru tanga na Araha, ki vi: “Araha, manga vi igo ma ko katoê, kê teharira na Amorita,

³¹inê kê susu tangago renia na enoni, i page huhura me hagenago vurusiê tenia na ruma iaku, matena gê aporo me tenia na hearihatana. Inê kê vogasigo renia na enoni ngekana.”

³²Hoi, o Jepeta ki tarêhia na ve, hanana i meraheariha na Amonita. Na Araha ki katoa ki teharira.

³³Ngaia ki nahu sikirenira haganega tenia i Aroere ki tariha i na apanena i Minite, ki rârâ ma ki tariha i Abele Keramimi. Ngaia ki henahuraugi na hinua tangahuru gi rua igê. Na Isiraelita ka mutera rako na Amonita ma ka teharira.

³⁴Matena o Jepeta ki aporo me i pasina i Misipa, oi, ka karena ki hura me ki vurusia. Ngaia ki mâ ma ki tahutahu. Ngaia kani ka karena i vora i tagena.

³⁵Matena o Jepeta ki bâsia râ, ngaia ki tarisia na tuguni iana, suria i takia ka karena. Ngaia ki vi: “E, ka kareku! Igo ko katoê kê hetaki bâraha. Tanu hega igo kanigo katoê kê hata era? Inê kê bani tohe tanga na Araha ma ki bara be aharêngia!”

³⁶Ka karena ki vi tanga, ki vi: “Manga go bani katoa na suruha tanga na Araha, hoi, gu hagamonaria. Gu katoa tangê na marâ go bani surua, suria na Araha ki katogo ko teharira na merongamu na Amonita.”

³⁷Ngaia ki nungia o vaemana, ki vi: “Na marâ gi tage ma kê obania tenigo. Gu nakê so surirerua na hageha gi rua, hanana inê henira na tamaku kami barebare igê na hungani ma kê hetaki, suria vi inê ki tuguhiê, vigê meme, i mamênga ve auragi.”

³⁸O vaemana ki hagamarumungenia ki râ surirerua na hageha gi rua. Na kere gete ma na tamana ka tagere igê na hungani ma ka hetaki, suria ngaia ki page meme, i mamênga vige auragi ma ke apara kare.

³⁹I murini na hageha gi rua ngaia ki aporo me i pasina vaemana. O Vaemana ki hagamonaria na suruha iana tanga na Araha ma na kere gete ki me, i mamênga vige auragi. Na tauhata vikana na Isiraelita ki haganega tenia i ngekana.

⁴⁰Surigi na tangiani ge he i na ara ni harisi na gete i berarogata na Isiraelita ka arâ ka hetaki renia ka karena o Jepeta ni Gileata.