Read Kahua MANE NI HAGAOTONGA 12 Bible Online

MANE NI HAGAOTONGA 12 - Kahua bible

MANE NI HAGAOTONGA 12

¹Na me i Eparaimi ka nanê tanga na hearihatana. Ngaira ka tarêhia na ve i Jotano ma ka râ tanga i Sapone. Ngaira ka hagatea o Jepeta, ka vi: “Tanu hega, ko aharêngia na pereperega ko meraheariha na Amonita ma ko pe vi tangagami, kami râ henigo? Igami kami page sungigo henia na ruma iamu.”

²Ma o Jepeta ki aramira, ki vi: “Inê ma na me iaku igami kami meraheariha na Amonita. Inê kê unigamu ma igamu kamu usi vigamu hagatahiê tenira.

³Matena gê girara, vi igamu kamu usi, hoi, inê kê kasi manavaku ma kê aharêngia na pereperega, kê meraheariha, ma na Araha ki katoê, kê teharira. Tanu hega kamu râ me, kamu meêheariha?”

⁴Hemuri o Jepeta ki unihakura na mane ni me hato i Gileata, ka meraheariha na me ni Eparaimi. Na me i Eparaimi ka bani vi, vi ‘Igamu na ai ni Gileata mu oga i Eparaimi ma i Manase, igamu kamu hura panigami.”

⁵Na me ni Gileata ka henahuraugi na tara tarê i ve i Jotano, hanana vi siana na me ni Eparaimi ka gavagava. I na ara ni matena ta na me ni Eparaimi i unhungia vi gavagava, ngaia ki nungira i nago na me i Gileata, hanana ga hagamarumungenia ki tarê, ma na me ni Gileata ka hagatea, ka vi: “I hega, na ai ni Eparaimi kanigo iê?” Manga vi ngaia ma ki hagaiga,

⁶ngaira ka vi tanga, ki visia ‘Sjiboleti.’ Ma ngaia ki vivi ‘Siboleti’, suria ngaia ki pe girara vige visia bâkoro. Vikana ngaira ka ranguia ma ka nahuia ki meme i ngekana igê na hitangini na tara tarê i ve i Jotano. I na matena ngekana ngaira ka nahuira ka me na 42, 000 na me ni Eparimi.

⁷O Jepeta ki bêngenira na Isiraelita surigi na harisi gi oru ma ki kahu me. Ngaira ka bagia i pasina i Gileata.

⁸I murina i me o Jepeta o Ibisane ni Betelegeme ki bêngenira na Isiraelita.

⁹Ngaira ki aparara na kare mane tangahuru gi oru ma na kare hehene tangahuru gi oru. Ngaia ki hagauragingenira ka karena tangara na mane igê na hagosi ninuni getigi, ma na tangahuru gi oru na kere gete tenigi na hagosi ninuni getegi ka auragira me o karena. O Ibisane ki bêngenira na Isiraelita surigi na harisi gi pi,

¹⁰ma ki kahu me. Ngaira ka bagia i Betelegeme.

¹¹I murina i me o Ibisane o Elone tenia na varo ninuni iana o Sebuluni ki bêngenira na Isiraelita surigi na tangahuri harisi gi tage,

¹²ma ki kahu me. Ngaira ka bagia i Aialone i na apanena iana o Sebuluni.

¹³I murina i me o Elone o Abatone karena o Hilele ni Piratone ki bêngenira na Isiraelita.

¹⁴O karena ka tangahuru ge he ma o vesina ka tangahuru gi oru. Ngaira hato ka tagirira na tonki tangahuru gi pi. O Abatone ki bêngenira na Isiraelita surigi na harisi ge varu,

¹⁵ma ki kahu me. Ngaira ka bagia i Piratone i na apanena i Eparaimi igê na apanena huhunganiga iata na Amalekita.