Read Kahua MANE NI HAGAOTONGA 13 Bible Online

MANE NI HAGAOTONGA 13 - Kahua bible

MANE NI HAGAOTONGA 13

¹Na Isiraelita ka haritohea nikâ na Araha. Na Araha ki nakara na Pilisitina ka marungira surigi na tangahuri harisi ge he.

²I na matena ngekana i hinua i Sora ki oga igê ta na mane o Manoaga na atana. Ngaia ki tenia na varo ninuni iana o Tane. Na gete iana ki gomara ngavê.

³Na angero iana na Araha ki vora tanga na gete ngekê ma ki vi: “Igo ko gomara ma igo ki sugia ma vigu obara ma ko page apara na kare mane.

⁴Siana ko totono na vaini se na bia, ma siana ko ngaugi na ngêra i apu tangago.

⁵Matena i voravora me o karemu, siana hagetage ko tapurua igê na ogaha iana hagenani, suria i haganega tenia na tangiana i vora igê, ngaia ki na anina God, suria ngaia ki na nasireta. Ngaia ki page haganega ki hagatahira na Isiraelita tenira na ai Pilisitia.”

⁶Hemuri na gete ki râ ki hagarongoa o vaniana, ki vi: “Ta na kariana God ki râ me i pasiku. Ngaia ki bâ mamagutaga manga na angero iana God. Inê kê hagatea, vi i he ki râ me igê. Ma ngaia ki pe hêtana marena tangê.

⁷Ngaia ki vi tangê, vi inê kê page obara ma kê page apara na kare mane. Ngaia ki hagapêpuê, vi siana kê totono na vaini se na bia, ma siana kê ngaugi na ngêra i apu tangê, suria na kare mane ki na anina God, suria ngaia ki na nasireta mataro me ki meme.”

⁸Hemuri o Manoaga ki nunginungi tanga na Araha, ki vi: “Araha, gu hagatorangenia me nikâ na kariana God, go hagatorangenia me noga i nago, hanana ge hagararingenia maninga tangagamirua, vi na tarana ta ki tuguhigamirua, vigamuru katoa renia na kare mane, matena i voravora me.”

⁹God ki aganaria o Manoaga. Na angero iana God ki vatugia nikâ na gete, matena i ngani ki gâga i mu. O Manoaga o vaniana ki pe oga henia.

¹⁰Na gete ki hata ni gaha ototo râ ki hagarongoa o vaniana, ki vi: “E, na mane i râ me noga ea, ki vora tangê nikâ!”

¹¹O Manoaga ki aharaga ma ki râ suria kaniana. Ngaia ki tari oto râ tanga na mane ma ki hagatea, ki vi: “Igo nga na mane go metamasi noga kaniaku?” Ngaia ki arami, ki vi: “Ua.”

¹²O Manoaga ki vi: “Hoi, matena ga vagavaga me mave igê na tamasinga iamu ngekê, na tagaraha ta kani iana na kere mane? Na ogaha iana ki page manga i he?”

¹³Na angero iana na Araha ki arami, ki vi: “Kaniamu ki tuguhia, vi arâ surigi maninga na tamasinga iaku tanga.

¹⁴Siana ki ngaugi na guani na vaini. Siana ki totono na vaini se na bia. Siana ki ngaugi na ngêra ga apu tanga. Ngaia ki tuguhia, vi ototo surigi na ara ni marâ gê bani visigi tanga.”

¹⁵O Manoaga ki pe girara, vi na mane ngekana ki na angero iana na Araha. Tahema ngaia ki vi tanga, ki vi: “Gu oga ma noga. Igamirua kamuru hagamakoa na karena na goti tangago.” Ma na angero ki arami, ki vi: “Manga gê gâga, ki asa ma ve ngêa na ngêra muru vateê. Manga muru obania, vigamuru hagamakoa, hoi, muru susu hete renia tanga na Araha.”

¹⁷O Manoaga ki arami, ki vi: “Visia me na atamu tangagamirua, hanana muru visigo koro, matena i vagavaga me mave na tamasinga iamu.”

¹⁸Na angero ki hagatererua, ki vi: “Tanu hega muru obania, vigamuru girara na ataku? Na ataku ki na ata ni mena.”

¹⁹Hoi, o Manoaga ki têa na karena na goti henigi na koni ma ki susu renigi igê na bea ni vogasiha tanga na Araha, i katogi na mena.

²⁰Matena na vavatani ki ora igê na bea ni vogasiha, o Manoaga ma kaniana karu bâsia na angero iana na Araha i akê suria na vavata tanga i pasina God. O Manoaga ki kahu tahetara renia vi na mane ngekana vi ngaia ki na angero iana na Araha. Ngaia ma kaniana karu susure karu tubê so i ano. Ma na angero ki râ nga vê.

²²O Manoaga ki vi tanga kaniana, ki vi: “Igerua karu meme, suria garu bâsia God!”

²³Kaniana ki arami, ki vi: “Manga vi na Araha ma ke obania vige nahuigerua karu me, vikê ki asa ma vige aganarigi na vogasiha iakerua, se vige hagabâsigerua renigi na tarani ngegana, se vige visigi na marâ ngegana tangagerua i ngekê.”

²⁴Na gete ki apara na kare mane ma ki hêtana vi o Simesone. Na kare ki raharaha ma na Araha ki koro tanga.

²⁵Na raramohana na Araha ki angaria moramora o Simesone, matena i oga i na tênga i Tane i berarogaterua i Sora me Esetaole.