Read Kahua MANE NI HAGAOTONGA 14 Bible Online

MANE NI HAGAOTONGA 14 - Kahua bible

MANE NI HAGAOTONGA 14

¹I ta na tangiana o Simesone ki so i Timina, ma i ngekana ngaia ki bâsia igê ta na kere gete ni Pilisitia.

²Ngaia ki aporo i pasina ma ki hagarongorerua o vaemana ma kenana, ki vi: “I Timina inê kê bâsia igê na kere gete na Pilisitina, i râ me i parongaku. Muru torea me tangê be êragia.”

³O vaemana ma kenana karu hagatea, karu vi: “Tanu hega kanigo râ i pasita na Pilisitina, hanana vigo auragi igê? Ngaira ka na ahuroto. I hega, i bara ngavê, vigu tarahua na kere gete na hagosi ninuni iaka, se vi so ma i pasika?” Ma o Simesone ki vi tanga o vaemana, ki vi: “Ngaia nga ka na ani gê obanigo, vigo torea me tangê. Inê kê obania.”

⁴Na enana karu pe hagarea, vi na Araha kani katoa na tarana ngekana tanga o Simesone, suria na Araha ki kato vi meraheariha na ai ni Pilisitia. Igê na matena ngekana na me ni Pilisitia ka marungia i Isiraele.

⁵Hoita, o Simesone ki so i Timina henirerua o vaemana ma kenana. Matena ga ri igê na pariki ni vaini i ngekana, o Simesone ki rongoa na bêhâgana na laione i tora hegara me.

⁶Na raramohana na Araha ki parama, ma ki angaria o Simesone. O Simesone ki ranguia na laione ma ki oke musia renigi na rimana gonari. Ngaia ki katoa na laione manga vi ngaia ki na karena na goti. Ma ngaia ki pe hagarongorerua rârâ na enana renia na tarana ngekana.

⁷Hemuri ngaia ki râ ki metamasi na kere gete ma ki obania bâraha.

⁸I murini ta na kere tangiani ngaia ki aporo râ nikâ i pasina na kere gete, hanana vi auragia. Matena i rârâ, ngaia ki aharê tenia na tara, hanana vi bâsia na laione, i bani nahuhunia. Ngaia ki bâsia na ruruha ni mamanivo ma na pirui i rarona na gahuana na laione. Ngaia ki konetenia.

⁹Ngaia tarorogi me na pirui i rimana, ma ki ngê gogogo renigi. Ngaia ki râ i pasiterua o vaemana ma kenana ma ki vatererua tani. Ngairerua karu ngê, ma o Simesone ki pe hagarongorerua rârâ, vi ngaia ki tora na pirui tenia na rarona na gahuana na laione.

¹⁰O vaemana ki râ i ruma iana na kere gete. O Simesone ki magoto i ngekana. Ngaia ki na tauhata na mane na gapu haoru.

¹¹Matena na me ni Pilisitia ka bâsia o Simesone, ngaira ka atera na tangahuru gi oru na mane na gapu haoru ka oga henia.

¹²O Simesone ki vi tangara, ki vi: “Naka be hagahigamu. Na ngêra na hagataku ki goga surigi na tangiani gi pi. Manga mu girara mu visia me na girarana na hagahinga i raroni na tangiani gi pi ngegana, hoi, inê kê page vategamu, na ara ni hitangimi, na gahu ma na tuguni.

¹³Ma ki manga mu pe girara, hoi, mu vateê igamu, na ara ni hitangimi, na gahu ma na tuguni.” Ngaira ka vi: “Hoita, i koro ma! Gu hagahi tangagami.”

¹⁴O Simesone ki vi: “Hagahi! Hagahi! Tenia na ani i ngêngê ki huhura me igê na ngêra. Tenia na ani i ramoramo ki huhura me igê na marâ i mamaki ngavê.” Ga hato noga na taniani gi oru, ma ngaira ka mamênga vige tarahua na girarana.

¹⁵Igê na heta na tangiana ngaira ka vi tanga kaniana o Simesone, ka vi: “Gu katoa o vaniamu ke hagarongogo renia na girarana na hagahinga, hanana gami girara. Manga go usi, igami kami sungigo henia na ruma iana o vaemanu. Igamurua kamuru unigami me, hanana vigamuru hanago tenigami, iê?”

¹⁶Vikê na gete ki râ tanga o Simesone o vaniana. Ngaia ki angi hagaparu, ki vi: “Igo ko pe koro tangê. Igo ko kiteniê. Igo ko hagahi tangara na tamaku ma ki mareha vigu hagarongoê renia na girarana!” O Simesone ki vi: “Bâ, inê kê pe hagarongorerua rârâ nikâ o vaemaku ma kenaku. Tanu hega kani vigê hagarongogo igo?”

¹⁷Surigi na tangiani gi pi ni ngêra ni hagataku ngaia ki ama ni angi tutu nga. Igê na pita na tangiana o Simesone ki hagarongoa kaniana renia na girarana na hagahinga, suria i râraera renia. Ma kaniana ki hagarongora na me ni Pilisitia renia.

¹⁸Vikê igê na pita na tangiana, matena o Simesone ki mamênga vige mauru, na me i hinua ka vi tanga, ka vi: “Na ta ki mamaki teharia na purui? na ta ki ramo teharia na laione?” O Simesone ki arami, ki vi: “Manga siana kaniaku igamu ki bara vigamu girara.”

¹⁹Na raramohana na Araha ki parama ma ki angaria o Simesone. O Simesone ki so i Asekelone ma ki nahuira igê na mane tangahuru gi oru. Ngaia ki tasigi na gahu ma na tuguni iata ma ki tore ki vatera renigi na mane, ga tarahua na hagahinga. Hemuri ngaia ki aporo i pasina. Ngaia ki mangariaga renia na tarana ngekana.

²⁰Kaniana ngaira ka vatea tanga na hitangita na mane na gapu haoru tangahuru gi oru, ga oga henia igê na ngêra na hagataku.