Read Kahua MANE NI HAGAOTONGA 15 Bible Online

MANE NI HAGAOTONGA 15 - Kahua bible

MANE NI HAGAOTONGA 15

¹I ta na matena i hemuri o Simesone ki râ ki vatugia kaniana. Ngaia ki torea râ na karena na goti tanga. Ngaia ki na matena i mêa igê na mu ni koni. Ngaia ki vi tanga o vaemana kaniana, ki vi: “Inê kê obania be banu i na kiboru iana kaniaku.” Ma o hungâna ki manimani.

²Ngaia ki vi tanga o Simesone, ki vi: “Inê kê vi ma, vi igo ko bani kasia. Tahema gê hagauragingenia tanga na tamamu. Ma ku bâ. Kesina ngaia ki na kere gete i bâkoro ngavê teharia. Go girara ma ko auragia ngaia hete.”

³O Simesone ki arami, ki vi: “Hoi, i ngekê siana kamu visiê renigi na tarani gê page katogi tangara na ai ni Pilisitia.”

⁴Vikê ngaia ki râ ma ki têra na o vasiga tangarê gi oru. Ngaia ki sururerua haku na kereterua na ara ni o gi rua ma ki hagêra na ahame tonganigi na taretareni na kereta.

⁵Ngaia ki tangagi na ahame ma ki kasira vê na o ka râ i mu ni koni iata na Pilisitina. Vikana ngaia ki sungigi na ehogoni na koni ma na ani ga mamênga vige retegi, ma nikâ na pariki ni olive ma ni vaini.

⁶Matena na ai ni Pilisitia ka hehagateri, ka vi: “Ti kani kato vikana?” ngaira ka kahu girara, vi o Simesone kani katoa, suria o hungâna na mane ni Timina, ngaia ki tagarenia kaniana o Simesone tanga na tamana o Simesone. Tahema na ai ni Pilisitia ka râ ka sungia na ruma iana o vaemana na gete ngekana, ma ngaia ki me.

⁷O Simesone ki vi tangara na Pilisitina, ki vi: “Manga mu kato vikana, hoi, inê nogaku! Inê kê tohe. Nga noga gê barua na siva ma ki kahu hatohato!”

⁸Ngaia ki nahuira ngavê ma na ani ga rako ka me. Hemuri ngaia ki râ ki oga igê na vaba igê na tarihana i Etama.

⁹Na me ni Pilisitia ka râ me ka tênga i Juta ma ka taharia na hinua i Legi.

¹⁰Na me ni Juta ka hagatera, ka vi: “Tanu hega mu taharigami?” Ngaira ka arami, ka vi: “Igami kami râ me hanana vigami taua o Simesone ma kami katoa nogamami manga i katogami.”

¹¹Vikê na rehagaro gi oru na me ni Juta ka râ tanga na vaba igê na tarihana i Etama. Ngaira ka vi tanga o Simesone, ka vi: “Go pe girara vari, vi ai ni Pilisitia kaniga marungigami? Tanu hega ko erasigami vikana?” Ngaia ki aramira, ki vi: “Inê kê barua na bagatauhata tangê.”

¹²Ngaira ka vi tanga, ka vi: “Igami kami râ me ikê, hanana vigami rakugo ma kami tagarenigo tangara na me ni Pilisitia.” O Simesone ki arami, ki vi: “I koro ma. Ma kamu surua, vi igamu maremi, ki mareha vigamu nahuiê be meme.”

¹³Ngaira ka vi: “I koro ma! Igami kami rakugo ma, ma kami tagarenigo tangara. I asa vigami nahuigo ko meme.” Vikê ngaira ka rakua renirerua na varo haoru gi rua ma ka merâ tenia na vaba.

¹⁴Matena o Simesone ki ata vê i Legi, na me ni Pilisitia ka ngiria ka hetangohi me tanga. Na raramohana na Araha ki parama, ma ki angaria o Simesone. Ngaia ki musirerua na varo i rimana ma i bangobango ni rimana manga na kere sigana na varo i tihu.

¹⁵I ngekana i ano ki tâ igê na suri na paratena na tonki i gatagata. O Simesone ki bâsia, ki maroro so ma ki tavoa, ma ki nahuira ka me na rehagaro na mane ni me renia.

¹⁶Tahema o Simesone ki ki vikê: “Inê kê nahuira ka me na rehagaro na mane ni me renia na suri na paratena na tonki. Renia na suri na paratena na tonki inê kê pagera haku.”

¹⁷Hemuri ngaia ki kasia râ na suri na paratena na tonki, ma ki hêtana na agua ngekana vi Ramate Legi, i vi Hungana ni Paratena.

¹⁸O Simesone ki mamata ngavê na riona. Vikê ngaia ki avarasia na Araha, ki vi: “Igo ko katoê kê teha. I ngekê inê kê mesi tonoha vari? Na me ahuroto ni Pilisitia ka sugi tauê vari?”

¹⁹Ma i ngekana i Legi God ki katoa na ano ki avaga ma ki hura me igê na ve. O Simesone ki tono ma ki kahu mamêriga na apena. Tahema na ve banga ngekana ngaia ki hêtana renia vi Enakore, i vi Vebanga ni Avarasiha. Ngaia ki gâga mênga i Legi i ngekê.

²⁰O Simesone ki bêngenira na Isiraelita surigi na harisi tangahuru gi rua, matena na ai ni Pilisitia ka marungira.