Read Kahua MANE NI HAGAOTONGA 16 Bible Online

MANE NI HAGAOTONGA 16 - Kahua bible

MANE NI HAGAOTONGA 16

¹I ta na tangiana o Simesone ki râ i Gasa na hitangini na hinua iata na ai ni Pilisitia. I ngekana ngaia ki tarahua igê na êrâ ma ki memêru.

²Na ai ni Gasa ka tarahua, vi o Simesone ki oga i ngekana. Vikê ngaira ura rihia na ruma, ma na mane ga anumasia na maani para ni hinua ka ura naasia suria na bungiana hagenani. Ngaira ka oga naasia ma vige tangi, suria ngaira ka tako, ka vi: “Naka ki tangitangi râ ma ka nanahuia ki meme.”

³O Simesone ki mêru ki tariha ma igê na gupuna bungiana. Ngaia ki aharaga ma ki here igê na maani para ni hinua ma ki ragea akê hagenani henigi na purupuru ni maani ruma, na u, na raburina ma na marâ vigana. Ngaia ki tora gapara renigi ma ki migitagere igê na botena na hungana bê vato renia i Heberone.

⁴I murina ngekana na gete ka Telila ki râ me i parongana o Simesone. I pasina na gete ngekê kani Maruguna i Soreke.

⁵Na mane raha gi rima iata na ai ni Pilisitia ka râ i pasina ka Telila ma ka vi tanga, ka vi: “Gu hagaparua o Simesone, ke hagarongogo, vi suria i hega kani ramoramo bâraha, ma ki manga i he kani vi igami teharia, kami rakua ma kami hatungia na ramoha iana. Na ara ni hitangimami ki page vatevatego renigi na maani na siliva 1, 100.”

⁶Hoi, ka Telila ki vi tanga o Simesone, ki vi: “Gu visia me, na ta kani katogo ko ramoramo bâraha vikana? Manga ta na enoni ma ki obania vi rakugo ma ki hatungia na ramoha iamu, ki katokato marâ ta?”

⁷O Simesone ki arami, ki vi: “Manga vi ngaira ma ka rakuê renigi na varo nepage gi pi, na ani haoru ga pe mamata, hoi, inê kê kahu pe ramoramo. Inê kê kahu manga na ani mavê na enoni.”

⁸Hoita na maneraha iata na Pilisitina ka vatea ka Telila na varo nepage gi pi, na ani haoru ga pe mamata, ma ngaia ki rakua o Simesone renigi.

⁹Igê na kiboru râ getea ka oga nanê igê tani na me ni Pilisitia. Ka Telila ki ngere, ki vi: “Simesone, na ai ni Pilisitia ka râ me!” O Simesone ki musigi na varo nepage manga vi na kere sigani na varo i tihu. Vikê ngaira ka mamênga vige girara, vi manga i he kani ramoramo.

¹⁰Ka Telila ki vi tanga o Simesone, ki vi: “Bâ, igo ko hagaparuê ma ko pe tamasi monari. Hoi, visia me, manga vi ta na enoni ma ke rakugo, vikana ke hega?”

¹¹O Simesone i vi tanga, ki vi: “Manga vi ngaira ma ka rakuê renigi na varo haoru, ga pe raku rârâ renigi, hoi, inê kê page mangara na enoni getera ga pe ramoramo.”

¹²Vikê ka Telila ki tavogi na varo haoru ma ki rakua renigi. Ma hemuri ki ngere, ki vi: “Simesone, na Pilisitina ka râ me!” Na Pilisitina ka oga nanê i rarona na kiboru getea. Ma o Simesone ki musigi na varo i rimana manga na kere sigani na varo.

¹³Ka Telila ki vi tanga o Simesone, ki vi: “Igo ko hagaparuê. Igo ko pe tamasi monari. Gu visia me, manga ta na enoni ma ke rakugu, ke rakugo hega?” O Simesone ki vi tanga, ki vi: “Gu hêrigi na kakaveragani gi pi na varehuku henia na varo igê na marâ ni hêhênga ma ko rugia so gatagata igê. Vikana inê kê page mangara na enoni getera ga pe ramoramo.”

¹⁴Ka Telila ki rurumia o Simesone ki mêru. Hemuri ngaia ki hêrigi na kakaveragani gi pi na varehuna igê na marâ ni hêhênga ma ki rugia gatagata igê. Hemuri ngaia ki ngere, ki vi: “Simesone, na Pilisitina ka râ me!” O Simesone ki rite ma ki okegi hura na varehuna tenia na marâ ni hêhênga.

¹⁵Vikê ka Telila ki vi tanga o Simesone, ki vi: “Tanu hega ko vi vigo takuiê? Igo ko tamasi purupuru ma. Igo ko bani hagaparuê hageoru ma ko mamênga vigu hagagirarê renia vi na ta kani katogo ko ramoramo ngavê vikê.”

¹⁶Ka Telila ki ama ni hagatea nga i na ara ni tangiani. O Simesone ki ogagita ma ki usi na apena renia na hagatenga tare iana.

¹⁷Vikana ki rârâ ma ki hagarongoa ka Telila renia. Ngaia ki vi: “Na varehuku ka pe tapurugi rârâ. Inê ka na nasireta haganega me tenia na matena gê vora igê ma kê vora re na anina God. Manga viga tapurugi râ na varehuku, hoi, na raramohaku ki kahu hatohato. Inê kê page mangara na enoni getera ga pe ramoramo.

¹⁸Matena ka Telila ki tahetara renia vi o Simesone ki tamasi monari, ngaia ki kasi tamasinga tangara na maneraha iata na Pilisitina, ki vi: “Mu aporo hagetage me nikâ. O Simesone ki kahu tamasi monari tangê.” Hoita ngaira ka râ me ma ka migirâ me na haga.

¹⁹Ka Telila ki rurumia o Simesone ki mêru. Hemuri ngaia ki unia me ta na mane ki tapurugi râ na kakaveragani gi pi na varehuna o Simesone. Hemuri ka Telila ki haganega ki hagamamasiaga o Simesone, suria i hato na raramohana.

²⁰Ka Telila ki ngere, ki vi: “Simesone, na Pilisitina ka râ me!” O Simesone ki rite ma ki tako ki vi: “I koro ma. Inê kê girara gê gavagava tenira ma kê tahitahi manga i nago.” Ngaia ki mamênga vige girara, vi God ki pe ngahisia i ngekê.

²¹Na Pilisitina ka rakua ma ka akarogi na maana. Ngaira ka mêra i Gasa ma ka rakua renirerua na seni gi rua i rarona na ruma ni hagaitangiha. Ngaira ka hagatagarahia ki horoa na bagahê raha i aberabera tanga i menamenarigi na koni.

²²Ma na varehuna ka haganega ka sugi borahu aporo nikâ.

²³Na maneraha iata na Pilisitina ka haku, hanana ga hagahigasia na ataro iata o Tagone ma ka vogasia. Ngaira ka kiki, ka vi: “Na ataro iaka ki katogia ka teharia o Simesone na merongaka!”

²⁴Ngaira ka vagevage, ka vi: “O Simesone ke râ me, hanana ge memarabe!” Matena ga torea hura tenia na ruma ni hagaitangiha, ngaira ka memarabe. Ngaira ka katoa ki ura i berarogaterua na u na ruma. Matena na enoni ka bâsia, ngaira ka kiria na ataro iata, ka vi: “Na ataro iaka ki katogia ka teharia na merongaka, i ruhuruhua na apanena iaka ma ki nahuira ka me rako na hitangika.”

²⁶O Simesone ki vi tanga na kere mane i urua, ki vi: “Gu nakê be hatarirerua na u na ruma. Inê kê obania be matarigirerua.”

²⁷Na ruma ki vunu renira na mane ma na gete. Ngaira hato na vere rima na maneraha iata na Pilisitina ka oga nogata i ngekana. Igê na gerina aberabera na ruma ka oga igê na ararina na rehagaro gi oru na mane ma na gete, ga memarabe o Simesone.

²⁸Hoita, o Simesone ki nunginungi, ki vi: “Araha raramohaga hunigo, gu takuiê. God, gu vateê na raramohaku hagetage râ nikâ, hanana ve marabarura be mutera so nga hagetage na Pilisitina, suria ngaira ka akangirerua na maaku.”

²⁹Vikê o Simesone ki têrerua na u na ruma i gupu, ta rimana igê tani ma ta rimana igê tani. Ngaia ki bugurenirerua hegitigi.

³⁰Ngaia ki ngere, ki vi: “Naka be me henira na Pilisitina!” Ngaia ki bugurenirerua ramo ngavê, ma na ruma ki aruhu so hunira na maneraha gi rima ma na enoni hato igê. Matena o Simesone ki me, ngaia ki nahuira ka me rako era na enoni teharira na ani i mutera matena i mauri mênga.

³¹Na goana ma na enoni hato getera igê na ahemata iana ka râ me ma ka torea vê na gahuana. Ngaira ka torea aporo ma ka bagia igê na matiku iana o Manoaga o vaemana i berarogaterua i Sora me Esetaole. O Simesone ki hagaotora na Isiraelita surigi na tangahuri harisi gi rua.