Read Kahua MANE NI HAGAOTONGA 17 Bible Online

MANE NI HAGAOTONGA 17 - Kahua bible

MANE NI HAGAOTONGA 17

¹I ta na tangiana ta na mane o Miga ngaia ki oga igê na hungani i Eparaimi.

²Ngaia ki vi tanga kenana, ki vi: “I nago, matena na mane hanago ki hanagogi na 1, 100 na maani na haga na siliva tenigo, igo ko kuasia na mane ngekana. Inê kê rongogo, vigo kato vikana. Bâ, ngaigi igê. Inê kanigê hanagogi.” Kenana ki vi: “O kareku, na Araha ke korokoro tangago.”

³O Miga ki vatea aporo na haga tanga kenana. Kenana ki vi: “Hanana na kuasiha siana ke tarahugo o kareku, inê mareku be tagarenigi nga na siliva tanga na Araha. Inê kê page tahea na nununa na ataro ma kê page taruhia renigi na siliva. Ia, be vatego aporo na maani na siliva.”

⁴Hoi, o Miga ki vatea aporo kenana. Kenana ki tavogi na 200 na maani na siliva ma ki vatea na mane i manisingenigi na tagaraha renigi na siliva. Na mane ngekana ki tahea na nununa na ataro ma ki taruhia renia na siliva. O Miga ki naka i ruma iana.

⁵O Miga ki nahunia marena na agua ni vogasiha ni ataro. Ngaia ki tagarahigi tani na nunuta na ataro ma na hê ni girarasiha. Ngaia ki kasia na hitangita o karena ki vora re na mane ni vogasiha.

⁶I na matena ngekana na maneraha ki mamênga vige gâga i Isiraele. Na ara ni enoni ka râ surigi na obaniha iata mareta.

⁷I na matena i hinua i Beteleheme i Juta ki oga igê ta na mane na gapu haoru. Ngaia ki na levita, na mane ni hagarahenga.

⁸Ngaia ki pania i Beteleheme, hanana vi tarahua tagua ki gâga igê. Igê na râha iana igê na hungani i Eparaimi ngaia ki ata i ruma iana o Miga.

⁹O Miga ki hagatea, ki vi: “Go râ me i he?” Ngaia ki arami, ki vi: “Inê kê râ me tenia i Beteleheme i Juta. Inê ki na levita, na mane ni hagarahenga. Inê kê bâbâ renia na agua vigê goga igê.”

¹⁰O Miga ki vi: “Gu oga so heniê ikê. Inê kê nahunia na tagaraha tangago. Igo ko voravora re na mane ni hagaotonga iaku ma na mane ni vogasiha iaku. Inê kê vurigo renigi na maani tangahuru na siliva i na ara ni harisi henigi tani na gahu ma na ngauha tangago.”

¹¹Na levita ngekê ki agana ki oga henia o Miga. O Miga ki katoa renia vi o karena.

¹²O Miga ki atea ki vora re na mane ni vogasiha iana, i oga henia i ruma iana.

¹³O Miga ki vi: “Hoi, i ngekê inê kê nahunia na levita, na mane ni vogasiha iaku. Inê kê kahu girara, vi na Araha ki page katogi na ara ni marâ ki tavoraha bâkoro tangê.”