Read Kahua MANE NI HAGAOTONGA 19 Bible Online

MANE NI HAGAOTONGA 19 - Kahua bible

MANE NI HAGAOTONGA 19

¹I na matena i Isiraele ki mamênga vige gâga igê na maneraha, ta na levita na mane ni hagarahenga ki oga hagatê igê na hungani i Eparaimi. Ngaia ki torea na kere gete i Beteleheme i Juta, hanana i vora re na gete iana râ ma.

²Ma na kere gete ngekê ki mangariaga tanga ma ki gava aporo i Beteleheme i pasina o vaemana, ma ki oga i ngekana surigi na hageha ge he.

³Hemuri na mane ni hagarahenga ki râ ki metamasi, hanana vi meaporo. Na kariana henirerua na tonki gi rua ki râ henia. Na kere gete ki unia banu na mane ni hagarahenga i ruma. Matena o vaemana na kere gete ki bâsia, ngaia ki vagevage renia.

⁴O vaemana na kere gete ki tuguria, hanana vi gâga so noga. Vikê na mane ni hagarahenga ki oga so surigi na tangiani gi oru. Ngairerua karu ngê ma karu tono ma karu mêru so.

⁵Ki tangi me na heta na tangiana na mane ni hagarahenga ki bani rite ma ki hagarurugu vi arâ. Ma o vaemana na kere gete ki vi tanga, ki vi: “Gu ngê noga. Siana ko hagasu.”

⁶Vikê ngaia ki oga so ma ngairerua karu ngê. O vaemana na kere gete ki vi tanga na mane ni hagarahenga, ki vi: “Gu mêru so nikâ, ke koro na apemu.”

⁷Ma ngaia ki aharaga vi arâ, ma o vaemana na kere gete ki tuguria, ki oga so nikâ. Vikê ngaia ki mauru so nikâ.

⁸Ki tangi me na rimata na tangiana, na mane ni hagarahenga ki hagarurugu vi arâ, ma o vaemana na kere gete ki vi tanga, ki vi: “Gu ngê noga. Siana ko hagasu!” Vikê ngairerua karu oga so karu ngê.

⁹Matena na mane ni hagarahenga henia na gete iana râ ma, ma na kariana ka nanê ni râha, o vaemana na kere gete ki vi: “Bâ, i bungi noga. Gu mêru so nikâ. I su noga na arito. Gu oga so ke koro na apemu. I gomaha ko bani riterite ma ko kahu aporo i pasimu.”

¹⁰Na mane ni hagarahenga ki usi vige mêru so nikâ. Ngaia ki nakagi na âgâga i geriterua na tonki iana, ma ngaia ma na gete râ ma iana karu râ. Ngairerua karu ata hagarangia i Jebusi. Ngaia kani i Jerusaleme i ngekê.

¹¹Suria ga ata râ noga i hinua ma ki sugi bungi, na kariana na mane ni hagarahenga ki vi: “I hega, i arari vari ge mêru so ikê i hinua iata na Jebusita?”

¹²Na mane ni hagarahenga ki arami, ki vi: “Mareha, i pe ararigia vige mauru so igê na hinua ga pe oga igê na Isiraelita.

¹³Igia ka riritenia ma ka arâ ka mêru i Gibea se i Rama.”

¹⁴Vikê ngaira ka ritenia i Jebusi ma ka râ nga. Ngaira ka ata i Gibea i na apanena iata na varo ninuni iana o Benamino, matena i su na arito.

¹⁵Ngaira ka apariri, hanana viga arâ ma ka mêru i ngekana. Ngaira ka banu i hinua ma ka oga so igê na mahera i hinua, ma ki mareha rârâ ta na enoni vige unira banu ke mêru i pasina.

¹⁶Matena ga ngani ka gâga i ngekana, ta na meraha i râ ki tagara i mu iana suria na tangiana hagenani, ngaia ki ata me. I pasina kani igê na hungani i Eparaimi ma ki suga me i Gibea. Na enoni getera i hinua ka na raraha iana o Benamino.

¹⁷Na meraha ki bâsira ga oga so ma igê na mahera i hinua, ma ki hagatea na mane ni hagarahenga, ki vi: “I he ko râ me igê? Go arâ i he?”

¹⁸Na mane ni hagarahenga ki arami, ki vi: “Igami kami râ me tenia i Beteleheme i Juta, ma kami aporo i pasimami hagatê igê na hungani i Eparaimi. I mareha rârâ ta na enoni vige unigami banu, hanana vigami mêru so i pasina.

¹⁹Ma igami kami nahunigi na ngêra: na go maria tangarerua na tonki iamami ma na bereti ma na vaini tangagami igami, inê ma na gete râ ma iaku ma na kariaku. Igami kami nahunigi na marâ mi obanigi, nga noga ma na agua ni mêruha.”

²⁰Na meraha ki vi: “Mu râ me i pasiku. Inê kê bâbâ surigamu. I pe arari, vigamu mauru so ma i metara igê na mahera i hinua.”

²¹Vikê ngaia ki merabanu i pasina ma ki hagangêrerua na tonki. Ngaira ka tanani uga ma ka oga so ka ngê.

²²Ngaira ki koro na apeta. Ki parama ma tani na mane ni hevarangiha i hinua ka ura rihia na ruma. Ngaira ka tahuru raha igê na maani ruma. Ngaira ka ngere tanga na meraha, ka vi: “Gu mehura me na mane i gâga i pasimu. Igami kami tenia vigami mehevarangi!”

²³Na meraha ki hura ma ki vi tangara, ki vi: “Bamane, i mareha! Siana kamu katoa na tarana i erataga vikana. Siana kamu tasi henia. Inê kanigê bâsuria, suria inê kê unia me i pasiku.

²⁴Bâ, na gete iana râ ma ma ka kareku i kare viru karu gâga i ruma. Inê be torererua hura me tangagamu. Igamu ma kamu girara na ta kamu katoa henirerua. Ma siana kamu hevarangi henia na mane ngekana!”

²⁵Ngaira ka usitenia vikana. Ma na mane ni hagarahenga ki ranguia na gete râ ma iana ma ki kasia hura tangara. Ngaira ka merongo era ma ka erasia suria na bungiana hagenani rârâ ma ki tangi.

²⁶Matena i tangi râ, na gete ngekê ki aporo me tanga na ruma iana na meraha i oga igê o vaniana, ma ki apuri so i maani ruma. Ngaia ki tâ rârâ i ngekana ma ki mave bera.

²⁷O vaniana ki rite me ma ki tangahia na maani ruma, hanana vi tavoraha nikâ ki arâ. Ngaia ki bâsia kaniana râ ma i tâtâ, i matara i tagara râ na rimana tanga na maani ruma.

²⁸Na mane ni hagarahenga ki vi: “Aharaga! Ke râ!” Ma na aramiha ki mareha rârâ. Vikê ngaia ki hagatâhia hagarabo na gahuana i gerina na tonki, ma ki tavoraha ki aporo i pasina.

²⁹Matena i ata vê, ngaia ki banu i ruma ma ki tavoa na gira. Ngaia ki têa na gahuana kaniana râ ma, ma ki rete vuruvurusia ki vora na mavoroni na tangahuru matarerua. Ma ngaia ki kasigi na mavoroni tonganira na varo ninuni tangahuru matarerua iata na Isiraelita.

³⁰Na enoni hato ga bâsia, ngaira ka vi: “Na tarana vikana ki pe vora me rârâ, haganega tenia na matena na Isiraelita ka hura pania i Esipito. Ge gari takoha renia. Na ta ke katoa?”