Read Kahua MANE NI HAGAOTONGA 2 Bible Online

MANE NI HAGAOTONGA 2 - Kahua bible

MANE NI HAGAOTONGA 2

¹Na angero iana na Araha ki tavoraha i Gilegale tanga i Bokimi, ma ki vi tangara na Isiraelita, ki vi: “Inê kê toregamu hura tenia i Esipito ma kê bêngenigamu tanga na agua, gê bani surua tangara na êvarimi. Inê kê bani vi, vi inê ki asa be aharêngia na suruheri iaku henigamu.

²Siana kamu naka ta na suruheri henira na enoni, ga oga igê na apanena ikê. Mu hogegi nga na bea ni vogasiha iata. Ma igamu kamu pe râ suria na tamasinga iaku. Tanu hega mu kato vikana?

³Hoita, be vi tangagamu, inê ki asa be tarigenira hura tarami na enoni ngegana. Ngaira ka page merongasigamu ma na vogasiha tangara na ataro iata ki page hagaerasigamu ngavê.”

⁴Matena na angero ki tamasi hato vikana, na Isiraelita ka heangisi hato.

⁵Tahema na agua ngekana ka hêtana renia vi Bokimi, i vi Angiangiha. Ngaira ka vogasia na Araha i ngekana.

⁶I murina o Josua ki tamasi hato tangara na enoni, ngaia ki kasira vê ka râ. Na ara ni varo ninuni iata na Isiraelita ka tabegi na apaneni ga hêtata hegitigi renigi, hanana ga ogasigi.

⁷Matena i gâga mênga o Josua, na Isiraelita ka toto suria na Araha. Ma i murina i me ngaia, na Isiraelita ka ama ni râ suria nga vikana, suria na enoni raha iata, ga bâsigi re maata na mena iana na Araha tangara, ka goga mêngara.

⁸Na kariana koro na Araha o Josua karena o Nune ki tonga na 110 na harisi iana ma ki kahu me.

⁹Ngaira ka bagia igê na mako iana marena i Timinate Geresi igê na apanena huhunganiga i Eparaimi hagarangia na hungana i Gasi.

¹⁰Ngaira hato na tage voraha henia o Josua, ngaira ka me, ma na enoni na voraha i muri me ka pe girara na Araha ma ka pe hagaregi na tauhana tangara na Isiraelita.

¹¹Hoi, na Isiraelita ka haritohea na Araha ma ka haganega ka vogasira na nununa na ataro mane o Bala.

¹²Ngaira ki hato vige rahesia nikâ na Araha God iata na êvarita, i bêngenira hura tenia i Esipito. Ngaira ka haganega ka vogasira hete na ataro iata na enoni, ga oga rihira. Ngaira ka bêtuhira ma ka hagamangaria na Araha.

¹³Ngaira ki hato vige rahesia nikâ na Araha, ma ka vogasira hete na nunuterua na ataro mane o Bala ma na ataro hehene ka Asetareta.

¹⁴Tahema na Araha ki mangariaga ngavê tangara na Isiraelita ma ki nakara na merongata ka taharira ma ka rurugu tenira. Ngaia ki nakara na merongata rihira ka teharira. Na Isiraelita ki bara tangara vige rohe pusira mareta.

¹⁵I na ara ni mateni ga arâ tanga na hearihatana, na Araha ki pe tamanira, manga i bani visia. Vikana ngaira ka oga igê na eraha.

¹⁶Hemuri na Araha ki katora ka ura akê na mane ni hagaotonga i berarogata na Isiraelita, hanana ga hagatahira tenira na merongata.

¹⁷Ma na Isiraelita ka pe tê viteata. Na Isiraelita ka pe toto suria na Araha ma ka vogasira ma na ataro. Na êvarita ka marupegi na ramata iana na Araha ma na voraha haoru ngekê ka hatani rumakaka vige kato vikana.

¹⁸Na ara ni mateni na Araha ki atea igê na mane ni hagaotonga tangara na Isiraelita, na Araha ki tamania ma ki hagatahira na enoni tenira na merongata. God ki kato vikana suria na ogaha hagenani iana na mane ni hagaotonga. Na Araha ki takuira na Isiraelita, suria ngaira ka gegege renigi na mamasiaganiha ma na hagamamasiaganiha tangara.

¹⁹Ma na matena i meme na mane ni hagaotonga, na enoni ka taugi aporo na bani bagatauhata, ma na bagaparongata ka erataga teharigi na bagaparongata na voraha iata na enata. Ngaira ka hagarapera ma ka vogasira na ataro ma ka ama ni togeaga nga ka bagatauhata.

²⁰Vikê na Araha ki mangariaga ngavê tangara na Isiraelita, ma ki vi: “Na enoni na voraha i ngekê ka aharêngia tare na suruheri, gê naka henira na êvarita, hanana viga marupea. Na voraha haoru ngekê ka guguruga ngavê tangê.

²¹Inê ki hato be tarigenira hura na apaneni me, ga gâga mêngara igê na agua, matena i me Josua.

²²Renira na enoni ngegana inê kê page tarahua, vi na Isiraelita ngegana ka page tototo suriê mangara na êvarita se mareha.”

²³Tahema na Araha ki hagamarumungenira na apaneni me ngegana ka oga so ma i Kanani. Ngaia ki katoa o Josua ki pe teharira. Ma i murina i me o Josua, na Araha ki pe tarigenira hura rêrê.