Read Kahua MANE NI HAGAOTONGA 21 Bible Online

MANE NI HAGAOTONGA 21 - Kahua bible

MANE NI HAGAOTONGA 21

¹Matena na Isiraelita ka haku i Misipa, ngaira ka tohe renia na Araha, ka vi: “Igami kami manimanira ka karemami, vi siana ka auragira na mane tenia na varo ninuni iana o Benamino.”

²Hoi, na Isiraelita ka râ i Betele ma ka oga so i maana God mataro me ki bungi. Ngaira ka angiangi maramara raha, ka vi:

³“Araha God iata na Isiraelita, tanu hega kani manga ikê? Tanu hega na goamami tenia na varo ninuni iana o Benamino kaniga sugi magahuru i Isiraele?”

⁴I tangi me i mavoraro na enoni ka rite ma ka tagarahia na bea ni vogasiha i ngekana. Ngaira ka susu igê ma ka ngê haku na ngêra ni vogasiha.

⁵Ngaira ka hagate, ka vi: “I hega, ta na hitangika na varo ninuni hato iana o Isiraele ka pe râ vari tanga na hekarigiana igê na agua apuna iana na Araha i Misipa?” Ngaira ka bani tohe, viga nahuira ka meme na anima na hitangita ga pe râ i Misipa.

⁶Na Isiraelita ka takira na goata na raraha iana o Benamino ma ka vi: “I ngekê i Isiraele ki magahuru noga igê ta na varo ninuni, na varo ninuni iana o Benamino.

⁷I he ka tarahura igê na gete tangara na mane tenia na varo ninuni iana o Benamino ga hita so. Igia ka bani tohe renia na Araha, vi siana ka hagamarumungenira ka kareka tangara.”

⁸Matena ga hagate renira, vi tani na enoni tenigi na varo ninuni iata na Isiraelita, na ani ga pe râ tanga na hekarigiana i Misipa, ngaira ka tarahua, vi na ai ni Jabesi i Gileata kaniga pe râ.

⁹Matena ga unira haku na mane ni me, na me i Jabesi ka pe râ me.

¹⁰Vikana na Isiraelita ka hagatorangenira na 12,000 na mane ni me ramo iata ma ka bonasira, ka vi: “Mu râ kamu mutera hato na ai ni Jabesi henira na gete ma na kare.

¹¹Mu mutera na mane hato ma nikâ na gete hato ga pe kare viru.”

¹²Ngaira ka tarahua na 400 na kare viru i berarogata na ai ni Jabesi. Vikê ngaira ka torera me tanga na tênga i Silo i Kanani.

¹³Hemuri na Isiraelita ka kasi tamasinga tangara na mane tenia varo ninuni iana o Benamino, ga oga i hê i Rimone, hanana ga merahekorokoro aporo.

¹⁴Na mane tenia na varo ninuni iana o Benamino ka aporo me ma na goata na Isiraelita ka vatera renira na kere gete ni Jabesi, ga tahi râ. Ma na kere gete ngaira ka pe rako ke ararira, hanana vige tonganira.

¹⁵Na Isiraelita ka takira na raraha iana o Benamino, suria na Araha ki voasia tenigi na varo ninuni getigi iata na Isiraelita.

¹⁶Vikê na mane na bêta na Isiraelita ka vi: “I mareha rârâ vi na gete igê na varo ninuni iana o Benamino. I he ka tarahura igê na gete tangara na mane ga hita râ?

¹⁷I pe koro, vi ta na hitangita na varo ninuni na tangahuru matarerua iana o Isiraele, vige magahuru. I tuguhigia, viga tarahura tani na gete, hanana vi siana na varo nununi iana o Benamino ke magahuru.

¹⁸Ma ki bara tangagia, vige hagamarumungenira ka kareka, hanana vige êragira, suria igia ka bani tohe, viga kuasira na anima na hitangika ga hagamarumungenira ka kareta tangara na mane tenia na varo ninuni iana o Benamino.”

¹⁹Hoi, ngaira ka takusia, vi na tangiana raha tanga na Araha i Silo i na ara ni harisi ki sugi ata me. I Silo ki oga i berarogaterua i Betele me Lebona, i na apanena akê na tara i berarogaterua i Betele me Sigeme.

²⁰Ngaira ka vi tangara na mane tenia na varo ninuni iana o Benamino, ka vi: “Mu râ kamu ahi igê na pariki ni vaini.

²¹Kamu bâbâ. Matena na kare viru ni Silo ka huhura me ka mâmâ igê na tangiana raha ngekana, hoi, mu vagavaga me tenigi na pariki ni vaini. Na ara ni hitangimi ki hanagoa na hitangita na kare viru ma ki merâ tanga na apanena iana o Benamino.

²²Manga vi o vaemata se o goata ma ka arâ me ka ramonigamu, hoi, mu vi tangara, kamu vivi: ‘Mu nakara so tangagami, suria igami kami pe henahuraura tenigamu, hanana vigami êragira. Ma suria mu manimanira tenigami, igamu kamu pe aharêngia na suruha iami.’”

²³Na mane tenia na varo ninuni o Benamino ka kato vikana. Na ara ni hitangita ki hanagoa na hitangita na kare viru ga mâ i Silo ma ki merâ. Ngaira ka aporo tanga na apanena iata, ka tagarahigi aporo na hinua iata ma ka ogasigi.

²⁴Igê nga na matena ngekana na goata na Isiraelita ka râ nogata ma ka aporo i pasita. Na ara ni hitangita ki aporo tanga na apanena iana na varo ninuni iana, tanga na ahemata iana ma tanga na mako iana.

²⁵Igê na matena ngekana i Isiraele ki mamênga vige gâga igê na maneraha. Na enoni hato ka râ surigi ma na obaniha iata mareta.