Read Kahua MANE NI HAGAOTONGA 3 Bible Online

MANE NI HAGAOTONGA 3 - Kahua bible

MANE NI HAGAOTONGA 3

¹Hoita, na Araha ki hagahitara so tani na apaneni me i Kanani, hanana vi uhungira na Isiraelita, na ani i mareha rârâ vige râ noga igê na hearihatana i Kanani.

²Ngaia ki kato vikana, hanana i hagesurira na ara ni voraha haoru iata na Isiraelita renia na hearihatana ma ngaira nga ka na ani ga pe bani râ noga igê na hearihatana i nago.

³Ngaira ga hita so i Kanani ka na Pilisitina, ga ogasigi na hinua gi rima, na Kananita hato, na ai ni Sitone, ma na Givita, ga ogasigi na hungani i Libanone, haganega tenia na hungana i Bala Heremone ki tariha igê na marahiragana i Hamata.

⁴Ngaira ka na uhungiha tangara na Isiraelita, hanana na Araha ki tarahua, vi na Isiraelita ka marupegi na ramata i bani vatea o Moise renigi tangara na êvarita, se i mareha.

⁵Vikê na Isiraelita ka oga i berarogata na Kananita, na Hitita, na Amorita, na Perisita, na Givita ma na Jebusita.

⁶Ngaira ka auragi hetarênge henira ma ka hagarapera na ataro iata.

⁷Na Isiraelita ka pe botage renia na Araha God iata. Ngaira ka haritohea. Ngaira ka hagarapera na nunuterua na ataro o Bala ma ka Asetareta.

⁸Tahema na Araha ki mangariaga tangara na Isiraelita. Ngaia ki naka na maneraha i Mesopotamia o Kusani Risataimi ki henahuraura. Ngaia ki marungira surigi na harisi ge varu.

⁹Hemuri na Isiraelita ka avarasia na Araha. Na Araha ki hagatora ta na mane, ki hagatahira. Ngaia ka no Otoniele, karena o Kenasi, vesina o Kalebe.

¹⁰Na raramohana na Araha ki angaria ma ki katoa ki vora re na mane ni hagaotonga iata na Isiraelita. O Otoniele ki meheariha na maneraha i Mesopotamia ma na Araha ki katoa ki teharia.

¹¹Na marapeha ki oga i Kanani surigi na harisi tangahuru ge he ma ki kahu me o Otoniele.

¹²Na Isiraelita ka murisigea nikâ na Araha. Tahema na Araha ki naka o Egelone na maneraha i Moaba ki ramo teharira na Isiraelita.

¹³O Egelone ki katora na Amonita ma na Amalekita ka haku me henia. Ngaira haku ka teharira na Isiraelita ma ka henahuraua i Jeriko, na hinua ni geara.

¹⁴O Egelone ki marungira na Isiraelita surigi na harisi tangahuru matara ke varu.

¹⁵Hemuri na Isiraelita ka avarasia na Araha. Na Araha ki hagatora ta na mane ki hagatahira. Ngaia ka no Ehute, karena o Gera tenia na varo ninuni iana o Benamino. O Ehute ki maha. Na Isiraelita ka hagatorangenia ki râ i pasina o Egelone na maneraha i Moaba, hanana i vatea renigi na mahatanga.

¹⁶O Ehute ki bani tagarahia na tatapa borahu i masiheri. Ngaia ki kuharenia i otona igê na hogosina i rarona na tuguni iana.

¹⁷Hoi, ngaia ki migirâ na mahatanga tanga o Egelone, na mane i bigabigaraga ngavê.

¹⁸Matena o Ehute ki tagarenigi hato na mahatanga tanga, ngaia ma na kariana ka aporo. Matena ga tariha igê na hê na pereperega hagarangia i Gilegale, ngaia ki bonasira na kariana, ga bani tora na mahatanga, ka aporo i pasita.

¹⁹Ma o Ehute ki arigu ki aporo i pasina o Egelone ma ki vi tanga, ki vi: “Maneraha, be hagarongogo pinihi renia ta na marâ.” Vikana na maneraha ki bonasira na kariana, ki vi: “Mu râ vê tenigamirua!” Ma ngaira hato ka hura.

²⁰Hoita, matena na maneraha ki oga so ngaia getea igê na kiboru magarohaga iana igê na gerina na ruma, o Ehute ki ura râ tanga, ki vi: “Inê kê merâ me na tamasinga iana God tangago.” Na maneraha ki ura aharaga.

²¹O Ehute ki amuria na tatapa boraha i otona renia na mahana ma ki ahura renia na obana na maneraha.

²²Na tatapa borahu hagenani henia na gatana ki mahuni banu ma na êbena ki purutaku pusia aporo. O Ehute ki pe okea hura na tatapa borahu tenia na obana na maneraha. Na tatapa borahu ki ami i gerina.

²³Hemuri o Ehute ki purusigi na maani ruma ki raburigi, ma ki hura igê na mabaha,

²⁴ma ki râ. Na kariana na maneraha ka râ me ma ka bâsigi na maani ruma ga bani raburigi. Ngaira ka vi ma, vi na maneraha ki oga ki hehega i rarona.

²⁵Vikê ngaira ka ura ka nanê hagagara. Ma suria i pe tangahia na maani ruma, ngaira ka torea na ki ma ka tangahia. E, na maneraha ki tâ i ano, i me!

²⁶O Ehute ki bani gava, matena ga ura nanasi ngaira. Ngaia ki teharenigi na hê na pereperega ma ki gava tanga i Seira.

²⁷Matena i ata râ i ngekana igê na hungani i Eparaimi, ngaia ki uhia na ahuri, hanana i unira me na mane ni me iata na Isiraelita tanga na hearihatana. Hemuri ngaia ki meravato tenigi na hungani.

²⁸Ngaia ki bonasira, ki vi: “Nika, ge râ! Na Araha ki page katogamu, kamu teharira na Moabita na merongami.” Vikê ngaira ka takua vato o Ehute, ka râ i Jotano ma ka oga pusigi na tara tarê, hanana i bara tangara na Moabita vige tarê tanga i Kanani.

²⁹I na tangiana ngekana ngaira ka nahuira ka me na ararina na rehagaro tangahuru gi tage na mane ni me iata na Moabita, ga manisingenia na hearihatana. I mareha rârâ ta na hitangita vige tahi.

³⁰Na tangiana ngekana na Isiraelita ka teharira igê na Moabita. I Kanani ki oga igê na marapeha surigi na harisi tangahuru ge varu.

³¹O Samagare karena o Anate ki urusia o Ehute ki mane ni hagaotonga. Ngaia ki nahuira ka me na tangarê ge ono na Pilisitina renia na vato ni hetari ni puruka. Ngaia ki hagatahira na Isiraelita tenira vikana.