Read Kahua MANE NI HAGAOTONGA 4 Bible Online

MANE NI HAGAOTONGA 4 - Kahua bible

MANE NI HAGAOTONGA 4

¹I murina i me o Ehute, na Isiraelita ka haritohea nikâ na Araha.

²Tahema na Araha ki naka na maneraha iata na Kananita o Jabini ki henahuraura na Isiraelita. O Jabini ki marungia na hinua raha i Hasore. O Sisera ki na mane i bêngenira na mane ni me iana o Jabini ma ki oga i Garoseti Ahuroto.

³O Jabini ki nahunigi na kati ni me na aiani na tangarê gi siva. Ngaia ki marungira na Isiraelita surigi na harisi tangahuru gi rua. Ngaia ki hagamamasiagara ngavê ma ki nahuira. Hemuri na Isiraelita ka avarasia na Araha.

⁴Hoita, ka Tebora, kaniana o Lapitote, ngaia ka na poropete. Ngaia ki na enoni ni hagaotonga iata na Isiraelita igê na matena ngekana.

⁵Na Isiraelita ka arâ i pasina, hanana i hagaotogi na berarogata. Ngaia ki hagatamasira tare igê na mamarugani na geara i berarogaterua na hinua i Rama me Betele igê na hungani i Eparaimi.

⁶I ta tangiana ngaia ki unia me o Baraka karena o Abinoame i hinua i Ketesi i Napatali. Ngaia ki vi tanga, ki vi: “Na Araha God iata na Isiraelita ki bonasigo vikê, ki vi, ‘Gu atera na mane ni me na rehagaro tangahuru gi tage tenigi na varo ninuni iaterua hegitigi o Napatali mo Sebuluni ma ku bêngenira tanga na hungana i Tabore.

⁷Inê kê page katoa o Sisera, ki bêngenira na mane ni me iana o Jabini, hanana ga megoheariha i ve i Kesone. Henaka i nahunira na kati ni me ma na mane ni me iana, ma inê kê page katogo, ko teharia!”

⁸O Baraka ki arami, ki vi: “Inê kê girara ma gê arâ, manga vi igo ma ko takuê. Ma ki manga i mareha, inê ki asa ma ve râ.”

⁹Ka Tebora ki arami, ki vi: “I koro ma. Inê kê arâ henigo. Ma siana ko takusia, vi igo kanigo page teharia o Sisera, suria na Araha kani page tagarenia o Sisera tanga na gete. “Hoita, ka Tebora mo Baraka karu râ tanga i Ketesi.

¹⁰O Baraka ki unira me na mane ni me iaterua o Sebuluni mo Napatali tanga i Ketesi. Na rehagaro tangahuru gi tage na mane ni me kaniga râ me henia. Ka Tebora nikâ ki râ henia.

¹¹I na matena ngekana o Gebere na Kenita ki bani gasia na ruma na gahu iana i ruguhana na apinige raha i Sananaimi hagarangenia i Ketesi. Ngaia ki bani râ panira na Kenita getera, na raraha iana o Gobaba o vehana o Moise.

¹²Matena o Sisera ki rongoa, vi o Baraka ki bani tagere igê na hungana i Tabore,

¹³ngaia ki unira haku na kati ni me na ararina na tangarê gi siva ma na mane ni me hato iana, ma ki hagatorangenira tenia i Garoseti Ahuroto tanga na ve i Kisone.

¹⁴Hoi, ka Tebora ki bonasia o Baraka, ki vi: “Gu râ. Na Araha ki ngahisigo. Ngaia ki page katogo, ko teharia o Sisera i ngekê. Vikê o Baraka ki meravato na mane ni me na rehagaro tangahuru gi tage iana tenia na hungana i Tabore.

¹⁵Matena o Baraka henira na mane ni me iana ka taharia o Sisera, na Araha ki katora o Sisera henigi na kati ni me hato iana ma na mane ni me iana ka tugupu ngavê. O Sisera ki vato tenia na kati ni me iana ma ki gava re ugana.

¹⁶O Baraka ki tarigenira na kati ni me ma na mane ni me rârâ ma ki tariha i Garoseti Ahuroto. Ngaia ki nahuira hato ngavê na mane ni me iana o Sisera. I mareha rârâ tani vige tahi.

¹⁷O Sisera ki gava tanga na ruma na gahu iana ka Jaele kaniana o Gebere na Kenita, suria o Jabini na maneraha i Hasore ma na ahemata iana o Gebere ka oga igê na hekomaniha.

¹⁸Ka Jaele ki hura me ki mehetarahu o Sisera ma ki vi tanga, ki vi: “Râ me! Gu banu me i ruma na gahu iaku. Siana ko magu!” Vikê ngaia ki banu ma ka Jaele ki pinihia igê na apanena banu na gahu.

¹⁹O Sisera ki vi tanga ka Jaele, ki vi: “Inê kê pasi tono. Me na ve!” Ka Jaele ki tangahia na anga na gavona na puruka, i gâga igê na tavona na susuna na puruka, ma ki vatea ki tono, ma hemuri ki pinihia aporo nikâ.

²⁰Mo Sisera ki vi tanga, ki vi: “Gu ura i maani ruma na ruma na gahu. Manga ta na enoni ma ki arâ me, ki hagatego, vi manga ta na enoni i rarona, go hagaiga, ko vivi, “Mareha!”

²¹O Sisera ki me ngavê na apena ma ki tâ ki mêru bore. Hoi, ka Jaele ki tavorerua na etahuru ma na rapurapu tanga na ruma na gahu. Ngaia ki unute ki râ tanga o Sisera ma ki raputarasia na bêna renia, ki susu na rapurapu i ano.

²²Matena o Baraka ki râ me ki bâbâ renia o Sisera, ka Jaele ki hura vurusia ma ki vi tanga, ki vi: “Râ me, be hagabâsigo renia na mane go bâbâ renia.” Vikê ngairerua karu banu igê na ruma na gahu. Bâ o Sisera kani tâtâ i ano, i me, na rapurapu ki tarasia na bêna.

²³Na matena ngekana God ki katora na Isiraelita ka teharia igê o Jabini na maneraha iata na Kananita.

²⁴Ngaira ka ama ni raramohaga nga ka meheariha mataro me ka tê erasia ngavê.