Read Kahua MANE NI HAGAOTONGA 5 Bible Online

MANE NI HAGAOTONGA 5 - Kahua bible

MANE NI HAGAOTONGA 5

¹Igê na matena ngekana ka Tebora mo Baraka karena o Abinoame, karu ki vikê:

²“Isiraelita, mu hagarahasia na Araha. Igamu kamu togeaga igê na hearihatana. Igamu kamu magêsia na henahuita.

³Igamu na maneraha, mu rongo! Igamu na mane ni ramoha, mu karinga! Inê be kiria na Araha ma be hagarahasia na Araha God iata na Isiraelita.

⁴Araha, matena go panigi na hungani i Seire, matena go tavoraha tenia na apanena i Etome, hanana go ngahisigami, na ano ki gisigisi, ma na roto ki rangi, na roto ka rangi bâraha ngavê.

⁵Na hungani ki rono i maana na Araha i Sinai i maana na Araha God iata na Isiraelita.

⁶Haganega tenia na matena iana o Samagare o karena o Anate, mataro me igê na matena iana ka Jaele, na tara raha ka bagubaguruga renira na ruruha ninuni hohoronga. Na enoni ka arâ ma igê na tara sisite.

⁷Na hinua i Isiraele ka oga tara renira na enoni ni hagaotonga. Ngaigi ki oga vikana, mataro me na matena inê ka Tebora kê ura akê, kê ura akê kê marupea Isiraele manga vi inê kani kenana.

⁸I na matena ngekana na hearihatana ki tarahura na Isiraelita, suria ngaira ka murisigea na Araha ma ka hagarapera na ataro hete. Na Isiraelita ka nahunira na rehagaro tangahuru ge he na mane ni me iata. Ngaira ka marehasira ngavê na bêata se vi na ora.

⁹Ma i ngekê inê kê ageagesira ngavê na mane ga bêngenira na mane ni me iata na Isiraelita. Inê kê ageagesira ngavê na mane ga magêsia na hearihatana. Ge hagarahasia na Araha.

¹⁰Igamu na ani mu tagirira na tonki siki, mu ogasigi na âgâga i gerita! Igamu na ani mu asitatara igê na agua mavê mu tabegi! Mu tarohenia vi na Araha ki teha!

¹¹Igamu na ani mu merarâ me na togoha iami tangagi na ve karu, hanana mu hagatonomira igê, mu tarohenia raha vi na Araha ki teha ma ki katora na Isiraelita ka teharira na merongata. Hoi, na kariana na Araha ka hura tenigi na hinua iata.

¹²Nika taraha, ka Tebora, nika taraha! Nika taraha, gu kiki, nika taraha! Gu ramo o Baraka karena o Abinoame! Nika taraha, gu henahuraura vê na merongamu.

¹³Hoita, na kariana na Araha ka hakunira na enoni ni hagaotonga iata. Na kariana na Araha ka hakuniê, ka nanê tanga na hearihatana.

¹⁴Na raraha iana o Eparaimi ka râ igê na maruguna. Na raraha iana o Benamino ka mumurira. Na araha iata na mane ni me ka râ me tenia i Makire. Na mane ga bêngenira na mane ni me ka râ me tenia i Sebuluni

¹⁵Na mane ni hagaotonga i Isakare ka râ me heniê inê ka Tebora. Na raraha iana o Isakare ka râ me. Ma o Baraka nikâ. Ngaira ka râ suria tanga na maruguna. Ma na raraha iana o Rubeni ka tora hetatari na takoha iata ma ki bara tangara, vige heaganari ke râ me.

¹⁶Tanu hega mu oga mavê kamu bâsurira na sipi? Tanu hega mu pe râ me? Mu obania ma vigamu rongogi vari na ringeta na togoha ma na avanuta? Monari, na raraha iana o Rubeni ka tora hetatari na takoha iata ma ki bara tangara vige heaganari ke râ me.

¹⁷Na raraha iana o Gata ka oga mavê i na apanena akê i Jotano. Na raraha iana o Tane ka oga mavê igê na haka iata. Na raraha iana o Asere ka oga ma vê igê na tarasini. Ngaira ka oga vê ma igê na hinua iata hagarangia na asi.

¹⁸Ma na raraha iaterua o Sebuluni mo Napatali ka kasi manavata igê na hearihatana.

¹⁹I Tanaka i ve i Megito na maneraha ka haku igê tanga na hearihatana. Na maneraha i Kanani ka meraheariha na Isiraelita ma ki bara tangara, vige henahuraugi na siliva.

²⁰Na higu i vavearo ka meraheariha tenigi na atohani i vavearo Ngaira na higu ka meheariha o Sisera.

²¹Na ve i Kisone ki maganu ma na maganuha ki tarira vê. Inê kê tavo uga. Inê kê ramo. Inê kê ama ni tavo uga nga.

²²Na hosi ka ata ni hetangohi mavê. Na ano ki angingi matena ga hetangohi.

²³Na angero iana na Araha ki vi: “Isiraelita, mu kuasia i Merosi! Kuasira na me i ngekana, hanana ga meme, suria ga pe râ me ke tamania na Araha, suria na mane ni me iata ka pe heariha pusia.”

²⁴Hagarahasia ka Jaele kaniana o Gebere na Kenita, suria ngaia ki koro teharira na gete hato, ga ogasigi na ruma na gahu.

²⁵Ngaia ki vatea o Sisera na miliki ki tono, matena i nungia na ve tenia. Ngaia ki tagarenia tanga na apira i bâkoro, i vunu renia na popona na miliki.

²⁶I ta rimana ngaia ki têa na erupu ma ta rimana ki têa na etahuru i higa. Ngaia ki tahurua na ratana bêna o Sisera, ki botagia ma ki rupukurua.

²⁷O Sisera ki oga rugu, ki ehu ki râ ki tâ manapu i ugana ka Jaele. Ngaia ki oga rugu ma ki ehu i ugana ka Jaele. Ngaia ki me ma ki vota so i ano.

²⁸Kenana o Sisera ki bâbâ hura renia igê na mabaha. Ngaia ki bore hura, ki vi: “Tanu hega na kati ni me iana kani hagarihu vige râ me? Tanu hega na hosi iana kaniga pe aporo me rêrê?”

²⁹Ka kariana ga nahuni takoha maniga ka aramia, ma ngaia ki ama ni vivi nga, ki vivi:

³⁰“Ngaira ka henahuraugi rako na marâ koro vari ma ka votogi ka tonganigi vari. Na kere gete gi tage se gi rua tanga na ara ni mane ni me. Na gahu totoperega tanga o Sisera, na gahu ga turagi igê na marâ i bâkoro, na rêni ga araria na gete iana na maneraha.”

³¹Araha, na merogamu hato ke me vikana ma na ani ga takuigo ke bâ hahanetaga manga na arito i raboa.” I Kanani ki kahu oga igê na marapeha surigi na harisi tangahuru ge he.