Read Kahua MANE NI HAGAOTONGA 6 Bible Online

MANE NI HAGAOTONGA 6 - Kahua bible

MANE NI HAGAOTONGA 6

¹Na Isiraelita ka haritohea nikâ na Araha. Tahema na Araha ki nakara na ai ni Mitiani ka marungira surigi na harisi gi pi.

²Na me ni Mitiani ka ramo teharira na Isiraelita, ma na Isiraelita ka ahi tenira igê na vaba ma igê na agua vigana igê na hungani.

³Na ara ni mateni na Isiraelita ka hasihasi na mu iata, na ai ni Mitiani henira na Amalekita ma na varo nununi igê na bagamasusu raha ka arâ me ka taharira.

⁴Ngaira ka taunga i mu ma ka erasigi na ngêra igê ki râ ki tariha i Gasa. Ngaira ka hanagora na sipi, na puruka ma na tonki hato, ma na Isiraelita ki pe tongasira rârâ ta na marâ, hanana vige mauri re.

⁵Na merongata ka merârâ me na togoha iata ma ka migirâ me na ruma na gahu iata. Ngaira ka mangara na ruruha raha ni pê. Ngaira henira na kamelo iata ki bara vige tomanira. Ngaira ka taharia na agua ma ka erasigi ngavê na ara ni marâ igê.

⁶Na ai ni Mitiani ka katora na Isiraelita ki bara ngavê tangara. Tahema na Isiraelita ka avarasia na Araha.

⁷Na Isiraelita ka avarasia na Araha, hanana vi tamanira tenira na Mitianita.

⁸Na Araha ki kasia me na poropete tangara. Na Araha God iata na Isiraelita ki tamasi i harana tangara, ki vi: “Inê kê bani hagatahigamu tenia i Esipito, na agua mu vora re igê na kare rakuraku.

⁹Inê bani hagatahigamu tenira na ai ni Esipito ma tenira na enoni ga megamuheariha igê na agua ikê. Inê kê tarigenira hura tarami ma kê haganahunigamu renia na apanena iata.

¹⁰Inê kê bani vi tangagamu, vi inê ka na Araha God iami. Siana kamu hagapera na ataro iata na Amorita, mu ogasia na apanena iata i ngekê. Ma igamu kamu pe tê viteaku.”

¹¹Hoita, na angero iana na Araha ki râ i hinua i Opera. Ngaia ki oga so i mamarugana na apinige i arubebe iana o Joasi, na mane na raraha iana o Abiesere. O Giteone o karena ki nuinuigi pinihi na koni igê na hohorê ga rusirusi huria na vaini, hanana na Mitianita siana ka bâsia henigi.

¹²Na angero iana na Araha ki vora me tanga i ngekana ma ki vi: “Igo ki na mane ramo. Gu pe magu. Na Araha ki ngahisigo.”

¹³O Giteone ki vi tanga, ki vi: “Nakê be hagatego: Manga vi na Araha ma ki ngahisigami, tanu hega kani tarahugami na tarani hato ngegana? Tanu hega, i ngekê na Araha kani pe katogi na mena manga i nago? Na êvarimami ka hagarongogami, vi i nago ngaia ki bani katogi na mena, matena i bêngenira hura tenia i Esipito. Na Araha ki kasi renigami vari? Ngaia ki nakagami vari i ruguhata na Mitianita?”

¹⁴Hoi, na Araha ki bonasia, ki vi: “Gu merarâ na mane ni me iamu. Igo ko ramo teha ngavê. Gu taharira na Mitianita ma ku hagatahira na Isiraelita tenira. Inê nga kani gê hagatorangenigo.”

¹⁵O Giteone ki arami, ki vi: “Araha, manga i he kê girara gê hagatahira na Isiraelita? Na hagosi ninuni iaku igê na varo nununi iana o Manase ka na hagosi ninuni purua ma, ma igê na apaparaha iana o vaemaku inê kê pe nahunia na ramoha.”

¹⁶Na Araha ki arami, ki vi: “Igo ko girara ma, suria inê kê tamanigo. Igo ko page têtê erasira ngavê na Mitianita. I mataku ma tangago, suria tangago igo ngaira ka manga vi na vere tage ma.”

¹⁷O Giteone ki arami, ki vi: “Manga go obaniê, hoi, gu hagatanga monari tangê, vi igo ko na Araha monari.

¹⁸Siana ko arâ. Inê be tagarenia noga na ngêra tangago ma ko kahu arâ.” Na Araha ki vi: “Hoi, i koro ma. Inê kê gâga karigo.”

¹⁹Hoita, o Giteone ki banu i ruma iana ma ki hagamakoa na karena na goti ma ki hahigi na bereti i pe ahunga. Ngaia ki hagaunia na heni renigi na ganiani ma na vena ki karangia igê na apira. Ngaia ki toregi tanga na angero iana na Araha, i oga i mamarugana na apinige i arubebe ma ki vatea renigi.

²⁰Na angero ki vi tanga, ki vi: “Gu nakagi na ganiani ma na bereti igê na hê ikê ma ko karangia na vena na ganiani hurigi.” O Giteone ki kato vikana.

²¹Ma na angero iana na Araha ki têa na vato ma ki tagarenia râ ki hatarigi na ganiani ma na bereti renia. Na gi ki riki me igê na hê ma ki ngêgi na ganiani ma na bereti. Ma na angero ki magahuru râ.

²²Ngekana o Giteone ki kahu tahetara, renia vi ngaia ki bâsia na angero iana na Araha. Ngaia ki magu ngavê, ma ki vi: “Araha raramohaga hunigo! Inê kê memato hetanga na angero iamu!”

²³Ma na Araha ki vi tanga, ki vi: “Haritagi! Siana ko magu. I asa vigu me.”

²⁴O Giteone ki tagarahia i ngekana na bea ni vogasiha tanga na Araha ma ki hêtana renia vi “Na Araha ni Marepeha.” Na bea ni vogasiha ngekana ki gâga mênga i Opera, na hinua iata na hagosi ninuni iana o Abiesere.

²⁵Igê na bungiana na Araha ki bonasia o Giteone, ki vi: “Go torea na hitangiterua na puruka mane iana o vaemanu, na ani i tongatonga na harisi gi pi iana. Go hogea na bea ni vogasiha iana o vaemamu tanga o Bala. Go tapitapia so na nununa ka Asetareta na ataro, i oga i na apanena na bea ni vogasiha.

²⁶Go tagarahia bâkoro na bea ni vogasiha tanga na Araha God iamu igê na botena na hinua. Go tanga igê na gi renia na nununa ka Asetareta, go bani tapitapia so ma ko susu renia na puruka mane.”

²⁷Hoita, O Giteone ki merarâ na tangahuru na hitangita na kariana, ma ki katoa na marâ na Araha i bonasia renia. Ngaia ki katoa igê na bungiana, mareha vi igê na tangiana, suria i magutenira ngavê na apaparaha iana o vaemana na enoni i hinua.

²⁸Matena na enoni i hinua ka rite me igê na mahogotana, ngaira ka bâsia i ahoge na bea ni vogasiha tanga o Bala, ma ka tarahua vi na nununa ka Asetareta ka bani tapitapia so. Ngaira ka tarahua nikâ, vi na puruka mane ka bani susu renia igê na bea ni vogasiha, i bani uhu ki oga i ngekana.

²⁹Ngaira ka hehagateri, ka vi: “Ti kani katogi na marâ ngegana?” Ngaira ka gari rârâ ma ka tarahua, vi o Giteone karena o Joasi kani katogi.

³⁰Vikê ngaira ka vi tanga o Joasi, ka vi: “Gu mehura me o karemu, hanana mi nahuia ki meme! Ngaia kani hogea na bea ni vogasiha tanga o Bala ma ki tapitapia so na nununa ka Asetareta i oga i na apanena.”

³¹Ma o Joasi ki aramira na enoni hato ga haku me i pasina, ki vi: “I hega, mu rohe pusia o Bala? I hega mu pane henia? Na anima na enoni i roherohe pusia o Bala ngaia ki meme râ i ngekê nga. Manga vi na ataro monari ka no Bala, hoi, ngaia ki girara i roherohe pusia so marena. Na bea ni vogasiha iana nga ki ahoge.”

³²Haganega tenia na matena ngekana ngaira ka hêtana o Giteone vi o Jerubala, suria o Joasi ki vi, ‘Naka vê o Bala ke rohe pusia marena. Na bea ni vogasiha iana nga kani ahoge.’

³³Hoita, na Mitianita, na Amalekita ma na varo ninuni igê na bagamasusu raha ngaira hato ka haku, ka tarêhia na ve i Jotano ma ka tênga igê na maruguna i Jiserele.

³⁴Na raramohana na Araha ki angaria o Giteone. O Giteone ki uhia na ahuri, ki unira na mane tenia na hagosi ninuni iana o Abiesere, hanana viga takua.

³⁵Ngaia ki hagatorangenira na mane tora tamasinga suria na apanena hagenani iana o Manase, hanana i unira me ka takua. Ngaia ki hagatorangenira na mane tora tamasinga tangara na varo ninuni iata hehegitigi o Asere, o Sebuluni mo Napatali. Ma ngaira nikâ ka hakunia.

³⁶O Giteone ki vi tanga God, ki vi: “Igo ko bani vi, vi igo ko ateê kê hagatahira na Isiraelita.

³⁷Hoi, inê kê nakagi so i ano na varehuna na sipi igê na agua ni hatanga ni koni. Hoi, manga i mavoraro ma na varehuna na sipi ki vokavoka renia na kârupu, ma i ano ki mareha, hoi, inê kê tahetara, vi igo ko ateê, kê hagatahira na Isiraelita.”

³⁸Na tarana nga vikana ki vora me. Matena o Giteone ki rite me igê na mahogotana, ngaia ki rusia na varehuna na sipi ma ki hioa ki gogo na kârupu, i araria vi vunuvunu renia na apira.

³⁹Ma o Giteone ki vi tanga God, ki vi: “Nakê be uhungigo râ nikâ renia na varehuna na sipi. Inê kê obania vi rikiriki na varehuna na sipi ma na ano ki vokavoka renia na kârupu.”

⁴⁰Igê na bungiana God ki katogi vigana. Igê na mahogotana na varehuna na sipi ki riki ma na ano ki voka renia na kârupu.