Read Kahua MANE NI HAGAOTONGA 7 Bible Online

MANE NI HAGAOTONGA 7 - Kahua bible

MANE NI HAGAOTONGA 7

¹I ta na tangiana igê na mahogotana o Giteone ma na mane ni me hato iana ka râ ma ka tênga igê na ve banga i Garote. Na tênga iata na Mitianita ki oga igê na bena hagarangia na hungana i More.

²Na Araha ki vi tanga o Giteone, ki vi: “Na mane ni me iamu ka rako teha. I asa vi ve katora ke teharira na Mitianita. I era ma, ka vi ma, vi ngaira mareta kaniga teharira na Mitianita, ma vi inê ki mareha.

³Go vi tangara na me, ko vivi, ‘Na anima na hitangimi i magu, ki araria i aporo i pasina, ma igami kami gâga so igê na hungani i Giliboa.’” Vikê na 20, 000 ka aporo i pasita ma na 10, 000 ka oga so.

⁴Ma na Araha ki vi tanga o Giteone, ki vi: “Ga rakorako mêngara na mane ni me iamu. Gu meravato so i ve. I ngekana inê kê page voasira igê tangago. Inê kê page hagarongogo, vi o ti ki page takugo ma o ti ki mareha.”

⁵O Giteone ki meravato i ve na mane ni me iana. Na Araha ki bonasia, ki vi: “Go voasira na ani ga totono na ve renigi na meata mangara na o tenira na ani ga susure ma ka totono.

⁶Na tangarê gi oru na me ka apegi na ve renigi na rimata ma ka tono manga na o. Na ani getera hato ka susure ma ka tono.

⁷Na Araha ki vi tanga o Giteone, ki vi: “Inê kê page hagatahira na Isiraelita, suria inê kê page katogamu, igo ma na tangarê gi oru na mane ni me, ga tono na ve mangara na o, kamu teharira na Mitianita. Gu bonasira na ani getera hato ke aporo i pasita.”

⁸Vikê o Giteone ki hagaguhira aporo na Isiralita hato i pasita, nga noga ma na tangarê gi oru, ga nahunigi na ngêra ma na ahuri hato. Na tênga iata na Mitianita ki oga kereso igê na bena igê na maruguna.

⁹Igê na bungiana na Araha ki bonasia o Giteone, ki vi: “Râ, taharia na tênga iata na Mitianita. Inê be katogo ku teharira.

¹⁰Manga go magu, hanana vigu taharira, go meso o Pura na kariamu tanga na tênga.

¹¹Igo ko page rongora na Mitianita ga tamasi, ma hemuri ko kahu ramoramo, hanana go taharira.” Vikê o Giteone mo Pura na kariana karu so tanga na basigu na tênga iata na merongaterua.

¹²Na Mitianita, na Amalekita ma na varo ninuni tenia na bagamasusu raha ngaira ka oga manasia na maruguna manga na ruruha ni pê. Na kamelo iata ka rako mangagi na one i one.

¹³Matena o Giteone ki ata so, ngaia ki rongoa ta na mane i hagarongoa na tamana renia na maruteha iana, i vi vikê: “Inê kê marute, vi na guana na bereti ki apuripuri so me igê na tênga iaka ma ki hataria na ruma na gahu. Ma na ruma na gahu ki ehu ki tâ hatara i ano.”

¹⁴Na tamana ki arami, ki vi: “E, na tatapa borahu nga iata na Isriaelita ngekana. Na girarana Giteone nga karena o Joasi nga ngekana! God kani katoa, ki teharigia, igia na mane ni me hato ma na Mitianita!”

¹⁵Matena o Giteone ki rongogi hato na maruteha iana na mane ngekana ma na girarana, ngaia ki susure ki hagarahasia na Araha. Ma hemuri ki aporo tanga na tênga iata na Isiraelita, ma ki vi: “Nika! Na Araha ki katogamu hanana mu teharira na mane ni me iata na Mitianita.”

¹⁶Ngaia ki voasira na me iana tangarê gi oru ka vora na apaneni me gi oru. Ngaia ki vatea na ara ni hitangita na mane ni me na ahuri ma na pi, i oga igê na mangate i tarê.

¹⁷Ngaia ki vi tangara, ki vi: “Matena gê mataro râ igê na basigu na tênga, mu bâsiê nga ma kamu katoa nga na tarana gê katoa inê.

¹⁸Matena inê ma na me iaku kami uhigi na ahuri, mu uhigi nogami na animi rihia na tênga, ma kamu ngerengere kamu vivi, ‘Tanga na Araha ma tanga o Giteone!’”

¹⁹O Giteone henira na tangarê gi tage na mane ni me iana, ngaira ka mataro me igê na basigu na tênga i murina ma na matena ga heurusige igê na mane ni anumasiha ni tênga. I sugia ma vige gupu ni bungi. Ngaira ka uhigi na ahuri ma ka botagigi na pi.

²⁰Na apaneni me getera ka kato vikana nogata. Ngaira ka têgi na mangate i mahata ma na ahuri i otota. Ngaira ka ngerengere, ka vi: “Heariha tanga na Araha ma tanga o Giteone!”

²¹Na ara ni hitangita ki ura igê na atohana ka rihia na tênga. Na merongata hato ka tugupu ma ka gava.

²²Matena na me iana o Giteone ka uhigi na ahuri iata, God ki katora na mane ni me iata na Mitianita ka ahuraraheri so mareta. Ngaira ka gava tanga i Serera ka râ ka tariha i Betehasita, ka rârâ ma ka tariha i hinua i Abele Megola hagarangia i Tabata.

²³Hemuri Giteone ki unira me na varo ninuni iata hehegitigi o Napatali, o Asere ma na apaneni me gi rua iana o Manase, ma ngaira ka tarigenira na Mitianita.

²⁴O Giteone ki hagatorangenira na mane tora tamasinga surigi na hungani hato i Eparaimi, ka vi: “So me! Meraheariha na Mitianita. Mu rêrapusigi na ve i Jotano ma na ve getigi ki râ ki tariha i Betebara tenira na Mitianita, hanana siana ka tarêhigi.” Na me ni Eparaimi ka haku ma ka urapusigi na ve i Jotano ma na ve getigi, ki rârâ ma ki tariha i Betebara.

²⁵Ngaira ka têrerua o Orebe mo Sebe na maneraha gi rua iata na Mitianita. Ngaira ka nahuirerua karu me: o Orebe igê na hê iana o Orebe mo Sebe igê na rusi ni vaini iana o Sebe. Ngaira ka ama ni tarigenira nga na Mitianita ma ka toregi na bêterua o Orebe mo Sebe tanga o Giteone, i oga i ngekê kerekê i Jotano.