Read Kahua MANE NI HAGAOTONGA 8 Bible Online

MANE NI HAGAOTONGA 8 - Kahua bible

MANE NI HAGAOTONGA 8

¹Na mane ni Eparaimi ka hagatea o Giteone, ka vi: “Tanu hega ko pe unigami matena go râ ko meraheariha na Mitianita? Tanu hega ko katogami vikana?” Ngaira ka haravi bâraha renia.

²Mo Giteone ki vi tangara, ki vi: “Inê kê katoa na tarana i pe raha, ma igamu hete kamu katoa na tarana i raha teha ngavê. Na kere marâ mu katoa, igamu na me ni Eparaimi, ki raha teharia na marâ i katoa na varo ninuni hagenani iaku.

³Bâ, igamu kamu nahuhunirerua o Orebe mo Sebe na maneraha iata na Mitianita! Ma inê kê pe katoa rârâ ta na tarana vige raha vikana.” Matena ngaia ki vi vikana, ngaira ki hato na mangariaganiha iata.

⁴O Giteone ma na tangarê gi oru na mane ni me iana ka bani ata i ve i Jotano ma ka bani tarêhia. Ngaira ki me na apeta. Henaka, ma ngaira ka ama ni tarigenira nga na merongata.

⁵Matena ga ata i Sukote, o Giteone ki vi tangara na me i hinua ngekana, ki vi: “Vatera na me iaku na bereti. Ngaia ki me bâraha na apeta. Inê kê tarigenirerua o Sebaga mo Salamuna na maneraha iata na Mitianita.”

⁶Ma na enoni raha i Sukote ka vi: “Tanu hega ki tuguhigami, vigami hagangêra na mane ni me iamu? Igo ki mamênga vigu taurerua o Sebaga mo Salamuna.”

⁷O Giteone ki vi: “I koro ma! Matena na Araha ki tagarenirerua hato igê tangê o Sebaga mo Salamuna, inê kê page ramusigamu renigi na tone ma na varo kakaruga ga akê igê na masusu.”

⁸O Giteone ki râ nga tanga i Penuele ma ki nungira nikâ na enoni i ngekana, ma na me i Penuele ka arami manga na me i Sukote.

⁹O Giteone ki vi tangara, ki vi: “Inê kê page apeape koro ma, matena gê aporo me. Tahema inê kê page hogea na bebetehe ngekê.”

¹⁰O Sebaga mo Salamuna henira na mane ni me iaterua ka goga i Karakore. Na mane ni me tenia na bagamasusu raha ka hita râ na ararina na 15, 000, ma na 120, 000 ka me.

¹¹O Giteone ki râ suria na tara i na akerena na masusu kerekê i Nobaga ma i Jogobea ma ki taharia hagakangia na tênga iaterua o Sebaga mo Salamuna.

¹²Na maneraha gi rua iata na Mitianita karu gava. O Giteone ki tarigenirerua ma ki têrerua ma ki tê erasira na mane ni me hato iaterua.

¹³Matena o Giteone karena o Joasi ki aporo noga tenia na hearihatana suria na marahiragana i Geresi,

¹⁴ngaia ki têa na mane na gapu haoru ni Sukote ma ki hagatea. Na mane na gapu hoaru ngekê ki segegi so tanga o Giteone na atata na enoni raha tangahuru gi pi matara gi pi i Sukote.

¹⁵Hemuri o Giteone ki râ i Sukote ma ki vi tangara na me i ngekana, ki vi: “Mu takusia mênga nga vari na matena mu usi vigamu tamaniê? Igamu kamu vi, vi i bara tangagamu, vigamu hagangêra na me iaku i me na apeta, suria vi inê ki mamênga vi ve taurerua o Sebaga mo Salamuna. Hoi, ngairerua igê!”

¹⁶Hoita, ngaia ki tavogi na tone ma na varo kakaruga ga akê igê na masusu, ma ki ramusira na enoni raha i Sukote renigi.

¹⁷Ngaia ki hogea nikâ na bebetehe i Penuele ma ki nahuira ka me na me i hinua ngekana.

¹⁸Hemuri o Giteone ki hagatererua o Sebaga mo Salamuna, ki vi: “Na mane muru nahuira ka me i Tabore, ka bâ hega?” Ngairerua karu arami, karu vi: “Ngaira ka bâ manga igo. Ngaira hato ka bâ mangara o karena na maneraha.”

¹⁹O Giteone ki vi: “Ngaira ka no goaku, mi vora i na oba gi tage. Inê kê tohe, manga vi igamurua ma kamuru pe nahuira, inê ki asa be nahuigamurua kamuru meme.”

²⁰Ma hemuri ngaia ki vi tanga o Jetere na bêbê ni kare mane iana, ki vi: “Hoi, gu nahuirerua karu me.” Ma na kere mane ki pe amuria na tatapa borahu iana. Ngaia ki tugupu, suria ngaia ki sisite mênga.

²¹Hemuri o Sebaga mo Salamuna karu vi tanga o Giteone, karu vi: “Râ me, ku nahuigamirua igo maremu! Igo ki mareha vi na kare!” Vikê o Giteone ki nahuirerua karu me ma ki tavogi râ na rêni i riota na kamelo iaterua.

²²Hemuri na Isiraelita ka vi tanga o Giteone, ka vi: “Igo nga ka na mane ni hagaotonga iamami, igo ma na apaparaha iamu. Igo kanigo hagatahigami tenira na Mitianita.”

²³O Giteone ki arami, ki vi: “Mareha! Inê ki mareha, mo kareku nikâ. Ngaia nga na Araha kani page bêngenigamu.

²⁴Hoi, mu nakê be nungia ta na marâ tenigamu. Na ara ni hitangimi ki vateê nga na mumu ni karinga mu henahuraugi tenira na Mitianita. Na Mitianita ma na enoni getera ga oga ige na bagamasusu raha, ngaira ka rêni renigi na golo na mumu ni karinga.

²⁵Na enoni ka arami, ka vi: “Igami kami vagevage ma, vigami vatego renigi.” Ngaira ka vatea nikâ na mahe, na rêni ma na gahu rotorotoaga memera iaterua na maneraha ni Mitiani ma na rêni i riota na kamelo iaterua.

²⁶Na higahigani na golo na mumu ni karinga ki 17 kilo.

²⁷O Giteone ki tagarahia na nununa na ataro renia na golo ma ki naka i Opera na hinua iana. Na Isiraelita hato ka murisigea God ma ka râ i ngekana, hanana ga rahesia igê na ataro. Na tarana ngekana ngaia ki na perenga tangara o Giteone ma na ahemata iana.

²⁸Hoi, na Isiraelita ka teharira na Mitianita. Na Mitianita ki hato vige kahu hagamakuku. I Kanani ki oga igê na marapeha surigi na tangahuri harisi ge he ma ki kahu me o Giteone.

²⁹O Giteone ki aporo i pasina ma ki oga igê.

³⁰Ngaia ki aparara o karena tangahuru gi pi, suria i heroga.

³¹Ngaia ki nahunia nikâ na gete iana râ ma i Sigeme. Ngairerua karu apara na kare mane mo Giteone ki hêtana renia vi o Abimeleki.

³²O Giteone karena o Joasi ki me igê na matena i merahaga ki araria, ma ka bagia igê na matiku iana o Joasi o vaemana i hinua i Opera, na hinua iata na raraha iana o Abiesere.

³³I na murina i me igê o Giteone, na Isiraelita ka pe toto suria nikâ God ma ka vogasia na ataro o Bala. Ngaira ka atea o Bala ni Suruheri ki vora re na ataro iata.

³⁴Ngaira ki hato vige rahesia na Araha God iata, i bani hagatahira me tenira na merongata hato rihira.

³⁵Ngaira ka pe visira koro nikâ na ahemata iana o Giteone renigi na ara ni marâ koro hato, i bani tamanira me na Isiraelita renigi.