Read Kahua MANE NI HAGAOTONGA 9 Bible Online

MANE NI HAGAOTONGA 9 - Kahua bible

MANE NI HAGAOTONGA 9

¹O Abimeleki karena o Giteone ki râ i hinua i Sigeme, ga oga igê na kariana kenana. Ngaia ki vi tangara, ki vi:

²“Mu hagatera na enoni i Sigeme, kamu vivi, ‘Na ta kamu obania? I hega, mu obanira hato vari o karena tangahuru gi pi o Giteone viga marungigamu, se mu obania vari na vere tage ma kani vi marungigamu? Mu girara o Abimeleki ki na goami.’”

³Hoi, na kariana kenana ka meratamasi vikana na me i Sigeme. Na me i Sigeme ka vi i koro ma, ma ka atea o Abimeleki ki marungira, suria ngaia ki na goata.

⁴Ngaira ka vatea renigi na tangahuru gi pi na maani na siliva tenia na ngêsu iana o Bala ni Suruheri. Ngaia ki vatevatera na eragani nuni ga oga sutaga renigi, hanana viga hakunia.

⁵Ngaia ki râ i Opera i ruma iana o vaemana. I ngekana ngaia ki nahuhunira igê na goana tangahuru gi pi o karena o Giteone igê na agua gi tage na hê. Ma o Jotama o karena hemuri o Giteone, ngaia ki ahi ki tahi.

⁶Hemuri na me hato i Sigeme me Betemilo ngaira ka haku i Sigeme igê na apinige apuna. Ngaira ka atea o Abimeleki ki maneraha tangara.

⁷Matena o Jotama ki rongo vikana, ngaia ki tagere ki ura igê na hungana i Gerisimi, ma ki ngirira vato, ki vi: “Igamu na ai ni Sigeme, mu karingê, ma God ke rongogamu!

⁸Ta na tangiana na apinige ka haku, hanana ga atea na maneraha iata mareta. Ngaira ka vi tanga na apinige ni olive, ka vi, ‘Gu maneraha igo tangagami!’

⁹Na apinige ni olive ki arami, ki vi, ‘Manga vigê maneraha tangagmu, inê ki hato vi ve hungu renigi nikâ na oile tanga na hagahigasiana na ataro ma tangara na enoni.’

¹⁰Hemuri na apinige ka vi tanga na apinige na fiki, ka vi, ‘Gu maneraha igo tangagami!’

¹¹Ma na apinige na fiki ki arami, ki vi, ‘Manga ngekana, inê ki hato vi ve hungu renigi na guaku koro ge mamaki.’

¹²Vikê na apinige ka vi tanga na apinige na vaini, ka vi, ‘Gu maneraha igo tangagami!’

¹³Ma na apinige na vaini ki arami, ki vi, ‘Manga ngekana, inê ki hato vive hungu nikâ tanga na vaini, i hagakoro obata na ataro ma na enoni.’

¹⁴Hoita, na apinige hato ka vi tanga na tone, ka vi, ‘Gu maneraha igo tangagami!’

¹⁵Na tone ki arami, ki vi, ‘Manga mu obaniê monari vigê maneraha tangagamu, hoi, mu rukuruku i mamarugaku. Manga i mareha, na gi ki page vavata igê na araku kakaruga ma ki page ngaugi na apinige raha i Libanone.’

¹⁶“Hoi, igamu na ai ni Sigeme, matena mu atea o Abimeleki ki maneraha tangagamu, ki hega, mu takusia monari vikana? Vigamu obania monari? I hega, igamu kamu hagahigasia monari vari o Giteone i me? I hega, mu katora maninga vari na ahemata, suria vi tamanigamu bâkoro?

¹⁷Mu girara o vaemaku ngaia kani heariha pusigamu. Ngaia ki kasi manavana, hanana i hagatahigamu tenira na Mitianita.

¹⁸Ma i ngekê igamu kamu merongasira na ahemata iana o vaemaku. Igamu kamu nahuhunira o karena tangahuru gi pi igê na agua gi tage na hê. Igamu kamu atea o Abimeleki ki maneraha i Sigeme, suria ma vi ngaia ka na goami, suria o vaemaku ma na gete râ ma iana karu apara.

¹⁹Hoita, na tarana mu katoa i ngekê tangara o Giteone ma na ahemata iana ma ki manga na tarana mu takusia monari ma kamu obania maninga, hoi, mu vagevagesia o Abimeleki ma ngaia ke vagevagesigamu nogami.

²⁰Manga i mareha, na vavatana na gi ki huhura me tenia o Abimeleki ma ki ngaura na ai ni Sigeme me Betemilo. Na vavatana na gi ki huhura me tenira na ai ni Sigeme me Betemilo ma ki ngaua o Abimeleki.”

²¹Hemuri o Jotama ki gava, suria i magutenia o Abimeleki o veogana, ma ki râ ki oga i Bere.

²²O Abimeleki ki marungia i Isiraele surigi na harisi gi oru.

²³Hemuri God ki katora o Abimeleki ma na me i Sigeme ka hemeronge. Na me i Sigeme ka usitenia ngavê.

²⁴God ki kato vikana, hanana vi o Abimeleki ma na me i Sigeme ka kasikasi mena na bagaparongata, suria ga kanukanua o Abimeleki ki nahuhunira o karena tangahuru gi pi o Giteone.

²⁵Na me i Sigeme ka kasira na mane ni me ka gamorahia o Abimeleki kere tagere igê na hungana. Ngaira ka hanago tenira na enoni hato ga râ i ngekana. O Abimeleki ki rongo vikana.

²⁶Hemuri o Gala karena o Ebeti ki râ me i Sigeme henira na me iana. Na me i Sigeme ka rarunitogo renia.

²⁷Ngaira hato ka râ igê na pariki ni vaini iata, ka husigi na guani na vaini, ka tagarahigi na vaini renigi ma ka magoto. Ngaira ka banu igê na ngêsu iana na ataro iata, ka ngêngê ma ka totono igê ma ka hagaruru igê renia o Abimeleki.

²⁸O Gala ki vi: “Na ani ta na enoni kani igia i Sigeme? Tanu hega kaniga oga i ruguhana o Abimeleki? O bagati raha kani ngaia? Ngaia ka no karena ma o Giteone! O Sebulu ma kani araria vi gâga i ruguhana, ma igia tanga na ta? Mu tototo suria hete o Hemore na êvarimi, i haganega na varo ninuni iami!

²⁹Manga vi inê ma be bêngenira na enoni ngegê, vikê inê be kasia hura o Abimeleki. Inê be vi tanga, be vi, ‘Gu hagarakonira na mane ni me iamu. Râ me, kamu megamiheariha!’”

³⁰Matena o Sebulu, i marungia na hinua, ki rongo vikana, ngaia ki mangariaga.

³¹Ngaia ki hagatorangenira na mane tora tamasinga tanga o Abimeleki i Aruma, ka vi: “O Gala karena o Ebeti henira na goana ki râ i Sigeme ma ngaira ka manimanigo, vi siana ko bêbanu i hinua.

³²Hoita, igo ma na mane ni me iamu, kamu arâ me nga suria na bungiana ma kamu ahehi i bemu.

³³I gomaha i mavoraro matena i raboa na arito, mu hagakakangi kamu taharia na hinua. Ma na matena ka huhura me o Gala ma na me iana ka megamuheariha, mu mutera hato nga.”

³⁴Vikê o Abimeleki ma na mane ni me hato iana ka râ suria na bungiana, ka voasira so mareta ka vora na apaneni me ge he ma ka ahi i metara i Sigeme.

³⁵Matena o Abimeleki ma na mane ni me iana ka bâsia o Gala i hura me ma ki ura hagarangia na maani para na hinua, ngaira ka aharaga tenigi na agua ga ahi igê.

³⁶O Gala ki bâsira ma ki vi tanga o Sebulu, ki vi: “Bâ, na mane ni me igana! Ga vato me!” O Sebulu ki arami, ki vi: “Mareha rârâ! Mareha vi na mane ngegana. Ngaigi ka na nununi ta na marâ igê na hungani nge.”

³⁷Mo Gala ki vi nikâ: “Bâ! Na mane kaniga rerere me tenigi na hungani agana. Bâ ta apaneni me nikâ ki vato me suria na tara, i haganega me tenia na apinige apuna i Hinarunga!”

³⁸O Sebulu ki hagatea, ki vi: “I hega, i nanora ko tamasi rikiriki. Igo nga go visigami, vi pe ararigami, vigami gâga i ruguhana o Abimeleki. Na mane go hagaru renira ngegana. Hoi, go râ nga i ngekê ku meraheariha.”

³⁹O Gala ki bêngenira hura na mane ni me i Sigeme ma ki meheariha o Abimeleki.

⁴⁰O Abimeleki ki tarigenia o Gala. O Gala ki gava. Ga rako na hitangita ga mamari ma ka kahu banu i hinua.

⁴¹O Abimeleki ki aporo i Aruma. O Sebulu ki tarigenira o Gala ma na goana ma ki paira tenia i Sigeme.

⁴²Ki tangi me ma o Abimeleki ki tarahua, vi na enoni i Sigeme ka takusia, viga arâ i mu.

⁴³Vikê ngaia ki merarâ na mane ni me iana, ki voasira ka vora na apaneni me gi oru, ma ka ahi i bemu, hanana viga gamorahira. Matena vi bâsira râ na enoni ga huhura me tenia na hinua, ngaia ki tahataha me ki nahuira ka meme.

⁴⁴Matena o Abimeleki ma na me iana ka tangotango me, hanana viga henahuraua na maani para ni hinua, na apaneni me gi rua karu taharira na enoni i mu ma ka mutera hato.

⁴⁵Ngaira ka heariha suria na tangiana hagenani. O Abimeleki ki henahuraua na hinua ma ki mutera na enoni igê. Ngaia ki ruhuruhua na hinua ma ki katoa ki hagagara era, suria i karangia na solo igê.

⁴⁶Matena na enoni raha ga oga hato igê na ruma nganganihaga i Sigeme, ka rongo vikana, ngaira ka ruku igê na vaba i ruguhana na ngêsu iana o Bala ni Suruheri.

⁴⁷O Abimeleki ki rongo, vi ngaira ka oga i ngekana.

⁴⁸Vikê ngaia ki meratagere na mane ni me iana igê na hungana i Salamone. I ngekana ngaia ki papario igê renia na akesi ma ki tora gapara renia na ehogo. Ngaia ki bonasira na me iana ka hatani papario nogata.

⁴⁹Vikê ngaira hato ka papario ma ka râ suria o Abimeleki, ma ka page na ario huria na ruma ngangaihaga. Ngaira ka sungia na ruma nganganihaga henira na enoni i rarona ma na enoni hato igê ka me. Ngaira haku na mane ma na gete ka na ararina na rehagaro gi tage.

⁵⁰Hemuri o Abimeleki ki râ i Tebesi. Ngaia ki oga rihia na hinua ma ki henaheraua.

⁵¹I rarona na hinua ki oga igê na ruma nganganihaga. Na enoni hato, na ara ni mane ma na gete ma na enoni raha, ka ruku igê. Ngaira ka purusira mareta banu igê ma ka akê i gerina aberabera na ruma.

⁵²Matena o Abimeleki ki taharia na ruma nganganihaga, ngaia ki râ tanga na maani ruma ma ki kavia na gi igê na ruma nganganihaga.

⁵³Ma ta na gete ki kasia vato na hê ga menarigi renia na koni. Na hê ki hita i bêna o Abimeleki ma ki botagia na rate bêna.

⁵⁴O Abimeleki ki unia me ototo râ na mane i tora na tangaruha iana ma ki bonasia, ki vi: “Amuria na tatapa borahu iamu ma ku ahurê renia be me, i era ma ka vi, vi na gete kani nahuiê kê me.” Vikê na mane ahura râ nga ki me.

⁵⁵Matena na Isiraelita ka bâsia vi o Abimeleki ki me, ngaira hato ka aporo i pasita.

⁵⁶Vikana God ki hagaitangia o Abimeleki renigi na bagatauhana tanga o vaemana, suria i nahuira na goana tangahuru gi pi, o karena o vaemana.

⁵⁷God ki hagaitangira nikâ na me i Sigeme renigi na bagatauhata, manga i bani vi o Jotama karena o Giteone, matena i kuasira.