Read Kahua JUTA 1 Bible Online

JUTA 1 - Kahua bible

JUTA 1

¹Inê Juta, na kariana o Jesu Kirisito, ma na goana o Jakobo. Inê kê sege tangagamu, renia God ki bani ategamu. Ma God Vaemana ki takuigamu, mo Jesu Kirisito ki anumasigamu.

²I koro, ka raharaha teha i pasimi na takiha, na marapeha ma na hetakuiha.

³Goaku hetakui, inê kê bani uhungia, kê sege tangagamu renia na vuripusiaka. Ma i ngekê ki tuguhiê, vi gê segesege tangagamu, be nganinganigamu, kamu gatagata igê na tongesuriha, God i bani vatera su na kariana.

⁴Renia tani na enoni era ka bani banu me i pasimi, megamu kamu pe giraragi na parongata. Ngaira ka erasia na taroha renia na koroha iana God, hanana vi ga hagaparura mareta renigi na bagatarihata. Ma ngaira ka kitenia o Jesu Kirisito, na Maneraha ma na Araha iaka i gi tage togo. I nago vê noga na Buka Apuna ki bani visia, vi God ki page hagaitangira.

⁵Henaka vi igamu kamu bani giraragi na marâ hato ngegana, ma be hagatakusigamu, renia vi manga i he ka na Araha i bani hagatahira na Isiraelita tenia i Esipito. Ma hemuri ngaia ki nahuira ka me na enoni, ga pe tongesuria.

⁶Mu takusira na angelo. Ngaira ka pe oga nga igê na atohata henigi na raramohata, ma ka bani panigi hete na atohata. God ki bani kasira vato, ka oga igê na roto hono. Ma ki bani rakura, ka tâ tare i ngekana, karia na Tangiana na Suriha Raha, hanana ga page hagaitangira igê.

⁷Mu takusigi na hinua i Sotomo me Gomora ma na hinua hagarangirerua. Na enoni i hinua ngegana ka paronga mangara na angelo ngegana, ma ka gamogamo, ma ka tatagara bera. God ki hagaitangira, ma ngaira ka hatamia na mamasiaganiha renia na gi, i noro tare. Na hagaitangiha ngekana ki hagesurira na enoni hato.

⁸I tagenana ma nikâ renira na enoni ngegana. Ngaira ka marute, ma ka hagaata, ma hemuri ka paronga iera renigi na apeta mareta. Ma ngaira ka ruhia God na Araha. Ma ka guharira na angelo raramohaga iana God.

⁹Henaka o Mikaele, na angelo raha, ngaia ki pe katoa rârâ na tarana ngekana. Ngaia ma Satana karu heariha. Karu hetuguri renia vi o ti kani nahunia na gahuana o Moise. O Mikaele ki magu, vi ge guharia Satana, ma ki vi ma hete, “Na Araha ki ramonigo.”

¹⁰Ma na mane ngegana ka guharigi na marâ, ga pe rongo mataha renigi. Ma ka oga na marâ, ngaira ga giraragi suri barisuta mangara na marâ vasiga i mu. Ma na marâ nga ngegana ka erasira.

¹¹I era ngavê tangara! Ngaira ka bani râ suria na parongana o Kaini. Ngaira ka bani tasi manga o Balama, suria ngaira ka vanasigi na haga. Ngaira ka guguruga manga o Kora, ma God ki hagaitangira ka me.

¹²Ngaira ka mangagi na tongo makoraga, matena mu merângê haku, renia ngaira ka hagamakigamu, suria ga ngêngê ma ka totono papasi. Ngaira ka takusira mareta ma. Ngaira ka mangagi na vaha, ga totora roto, ma ki asa, vi ge rangi. Ngaira ka mangagi na apinige, ga pe hunguhungu igê na matena ni hunguta, se ga mangagi na apinigê, ga ahabogo, ma ka me ngavê.

¹³Ngaira ka mangagi na navo, ga aputaputa, ma na makiha i bagaparongata ka manga na hutohuto. Ngaira ka mangagi na aena na higu. God ki bani hagarêa na agua igê na roto hono tangara ka oga tare igê.

¹⁴O Enoke nogana, na pita na raraha iana o Atama, ki bani tamasi renira i nago vê, ki vi: “Bâ, na Araha ki page arâ me henira rako na rehagaro na angelo koro iana,

¹⁵hanana i page surira na enoni hato. Ma ki page hagaitangira na enoni era hato renigi ara ni bagaparongata hato ma renigi na tamasinga bera, na enoni era ngegana ga bani visia bera God renigi.”

¹⁶Na enoni ngegana ka tamasi ngurunguru tare, ma ka torahurira na enoni getera. Ngaira ka râ surigi na teniha era iata mareta. Ngaira ka hagarahasira mareta, ma ka nakanaka bêta tangara na enoni getera, suria ga obanigi ta na marâ tangara mareta.

¹⁷Goaku, mu takusia aporo na hagesuringa iata na aposotolo iana na Araha iaka o Jesu Kirisito.

¹⁸Renia ngaira ka bani vi tangagamu, ka vi, “Matena i hagarangi me noga na Hagahatongina, ka page voravora me na enoni, ga page rurusigamu, na enoni, ga arâ surigi na teniha era iata mareta.”

¹⁹Na enoni ngegana ka tanua na hevoavoatana, ma ka râ suri barisuta mareta, ma ka pe arâ suria na Higona Apu.

²⁰Ma igamu, na goaku, mu hagagatagatanigamu maremi igê na tongesuriha apuna ngavê iami. Mu nunginungi, suria na Higona Apu raramohaga ki angarigamu.

²¹Ma kamu gâga igê na hetakuiha iana God, matena mu naasia na Araha iaka o Jesu Kirisito, i page vategamu renia na mauriha mora ma tarema, suria ngaia ki takuigamu.

²²Mu takusira na enoni, ga tako tugupu.

²³Mu hagatahira, renia mu tahurara tenia na gi. Ma kamu takira nikâ na enoni getera, ma kamu hinarura; ma kamu kikitenigi hagetage na gahu iata, suria ga makoraga renigi na teniha era iata.

²⁴Ka visia raha God. Ngaia ki girara i anumasigamu, hanana siana kamu votavota, ma ki girara i toregamu i maana, matena mu matarotaro, ma kamu vagevage.

²⁵Ka visia raha God gi tage togo, na Hagamauri iaka, renia o Jesu Kirisito na Araha iaka, suria ngaia ki tonga na bâbâhana raha, na arahanga raha iana, na raramohana raha, ma na ramatana raha, matena i nago vê noga, me rikini, ma i hemuri me, tare ma tarema. Monari.