Read Kahua RANGANIHA 12 Bible Online

RANGANIHA 12 - Kahua bible

RANGANIHA 12

¹Ma hemuri ki vora me na giraraha raha i vavearo. I vora me ta na gete, i tuguni renia na arito, ma na hageha i ruguhani na êgana, ma na tarepuri na higu tangahuru matarerua ki oga i bêna.

²Ngaia ki sugia ma, vi ge apara; i riki na gerina, ma ki ngere raha renigi na mamasiaganiha.

³Ma ta na giraraha getea ki vora me i vavearo. I vora me na apena na bagahua raha memera. Ngaia ki tonga renigi na bêna gi pi, ma na hona tangahuru gi tage, ma na tarepuri ka oga tonganigi na bêna.

⁴Ngaia ki tarorora na ara ni oruta na higu tenia na vavearo renia na kerena, ma ki kasigi so i maveta. Ngaia ki ura i maana na gete, i sugi apara, hanana vi ngaua ototo râ nga na kare, i apara me.

⁵Ma na gete ki apara na kare mane, i page marungira na enoni hato i maveta renia na mata na aiani. Ga tahura vê na kare, ma ka torea tanga God, i maana na atohana raha.

⁶Na gete ki gava igê na bagamasusu raha. God ki bani hagarêa na agua ngekana tanga, hanana ga page marupea igê surigi na 1,260 na tangiani.

⁷Ma hemuri na hearihatana ki vora me i pasina God. Mikaele ma na angelo iana ka meheariha na hua raha, ma na hua raha ma na angelo iana ka meraheariha bê aporo.

⁸Ma na hua raha ki so, ma ngaia ma na angelo iana ka pe hagamarumungira, hanana vi ge page oga nikâ i pasina God.

⁹Ga paia na apena na bagahua raha. Ngaia ki na bani ma, na atana ki na Merongana God, se Satana, i hagabekasia na maveta hagenani. Ngaia ma na angelo iana ka kasira so i maveta.

¹⁰Ma hemuri inê kê rongoa, i tamasi raha ta na ringena i pasina God, ki vi: “I ngekê God ki kahu hagatahigia! I ngekê God ki kahu hagabângenia na raramohana vi Araha! I ngekê na Mesaia iana ki kahu hagabângenia na arahanga iana! Suria tenia i pasina God ka bani kasia hura Satana, i torahurira na goaka igê na tongesuriha. Ngaia ki ura i maana God, ma ki torahurira igê na tangiani ma na bungiani.

¹¹Na goaka igê na tongesuriha ka teharia renia na gapuna na Karena Sipi, ma renia na monariha, ngaira ka tarohenia; ma ka agana, hanana ga kasikasi manavata, ma ka meme.

¹²I manga ngekê, mu vagevage igamu na kariana God ma igamu hato mu oga i ngekana i pasina God! Ma ki era ngavê tangarerua na ano ma na asi! Suria Satana ki bani so tangagamurua, ma ki mangariaga teha, renia ngaia ki girara, vi nahunia ma na kere matena abubu.”

¹³Matena na hua raha ki bani girara, vi ga bani kasia so i maveta, ngaia ki haganega ki tanguhia na gete, i bani apara na kere mane.

¹⁴Ma God ki vatea re na gete ngekana na gagahana gi rua na ahetaronga raha, hanana i gaha renirerua tanga na atohana igê na bagamasusu raha. Ma i ngekana ka page marupea igê surigi na harisi gi oru ma na hageha ge ono, ma na ma ki asa, vi ge erasia.

¹⁵Ma na ma ki pusuria na hehene renia na ve tenia na harana. Ngaia ki manga na ve i maganu, hanana vi ahegenia râ.

¹⁶Ma na ano ki tamania na gete. Ngaia ki manganga, ma ki unumia na ve, i râ me tenia na harana na hua raha.

¹⁷Ma na hua raha ki mangariaga ngavê tanga na gete, ma ki râ vê, hanana vi merongasira na karena hato getera. Ngaira ka na enoni, ga râ surigi na ramata iana God, ma ka tongesuria gatagata na monariha, o Jesu i bani hagagirarara renia.

¹⁸Ma na hua raha ki ura i one.