Read Kahua RANGANIHA 13 Bible Online

RANGANIHA 13 - Kahua bible

RANGANIHA 13

¹Ma i hemuri inê kê bâsia ta na marâ vasiga, i hurakê me tenia na asi, ma ki banu i one. Ngaia ki nahunigi na hona tangahuru gi tage ma na bêna gi pi. Na ara ni hona ki nahunia na tarepuri, ma igê na ara ni bêna ka bani segea igê na ata, i tamasi erasia God.

²Na marâ vasiga, gê bâsia, ki bâ manga na apena na bagapusi raha. Na êgana ka bâ mangagi na êgana na apena na baga o raha, ma na harana ki manga na harana na laioni. Na hua raha ki hagatarêngenigi na raramohana marena, na atohana ma na arahanga iana tanga na marâ vasiga.

³Ta na hitangini na bêna na marâ vasiga ngekê ki bâ, manga ga bani hagamamaria, vi meme. Ma na maara ngekana ki bani mavo. Na maveta hagenani ki kone, ma ki râ suria na marâ vasiga.

⁴Na enoni hato ka rahesia na hua raha, suria ngaia ki bani vatea na arahanga iana tanga na marâ vasiga. Ngaira ka rahesia na marâ vasiga nikâ, ka vi: “O ti kani teha manga na marâ vasiga? O ti kani girara i meheariha?”

⁵Ga hagamarumungenia na marâ vasiga, hanana i tamasi paroparo, ma ki tamasi erasia God, ma ka hagamarumungenia, ki araha surigi na hageha tangahuru ge he matara ki rua.

⁶Ngaia ki haganega ki tamasi erasia God, ma na atana God, ma na atohana, ma ki tamasi erasira ngaira hato, ga oga i pasina God.

⁷Ga hagamarumungenia, hanana vi meraheariha na kariana God, ma ki teharira, ma ka kasia, ki araha tangara na ara ni raraha iata na enoni, ma tangara na enoni, ga bâ hehegitigi, tangara na enoni i na ara ni tamasinga hehegitigi, ma tangagi na ara ni agua hato i maveta.

⁸Na enoni hato, ga oga i maveta, ka page rahesia, i vi, vi na ani, ga pe bani segegi na atata igê na buka ni mêriha, matena na maveta ki mamênga. Na buka ngekê ki na anina na Karena Sipi, ga bani nahuia ki me.

⁹“Hoita, mu rongo, manga mu karinga!

¹⁰O ti i tâ tanga vi ga rakua, ka page rakua nga. O ti i tâ tanga vi ga nanahuia renia na tatapa borahu, ka page nahuia nga renia na tatapa borahu. I vi, vi i tuguhira na kariana God, vi ga piringiape, ma siana ka rumakaka, ma ka nganganihaga nga hete igê na tongesuriha.”

¹¹Ma i hemuri inê kê bâsia na ruata na marâ vasiga, i hurakê me tenia na ano. Ngaia ki nahunirerua na hona gi rua, garu bâ manga na hona na karena sipi, ma ki tamasi manga na hua raha.

¹²Ma i maana ngaia ki nahunia na arahanga raha iana na ani i nago na marâ vasiga. Ngaia ki katora na maveta ma na enoni hato, ga oga igê, hanana vi ga rahesia na ani i nago na marâ vasiga, ga bani hagamamaria, vi ge meme, ma ki mavo.

¹³Na ruata na marâ vasiga ngekê ki katogi na mena raha. I maata na enoni hato ngaia ki katoa na gi, ki so me tenia na vavearo tanga na maveta.

¹⁴Ma ki hagaparura na enoni hato, ga oga i maveta, renigi na mena, ga hagamarumungenia, ki katogi i maana na ani i nago na marâ vasiga. Na marâ vasiga ki vi tangara na enoni hato i maveta, hanana vi ga tahea na nununa na marâ vasiga, ga bani hagamamaria renia na tatapa borahu, vi ge meme, ma ki tahitahi mênga.

¹⁵Na ruata na marâ vasiga ka hagamarumungenia, ki raravaia ki mêri na nununa na ani i nago na marâ vasiga, hanana ki na nununa, ki girara i tamasi, ma ki hagamesira na enoni hato, ga usi, vi ge rahesia.

¹⁶Na marâ vasiga ki tuguhira na enoni hato, na ani, ga araha, ma na ani purua, na ani, ga ruruguha, ma na ani, ga matareha, na enoni vurivuri ma na ani, ga mareha, hanana vi ga nahunia na segesegeha igê na rimata na otota, ma igê na raeta.

¹⁷I asa ta na enoni, vi ge vurivuri, se vi ge hagavuri, manga vi ngaia, ma ki pe nahunia na segesegeha ngekana, i vi, vi na atana na marâ vasiga, se na namba, i visia na atana.

¹⁸Mu takotako maninga! Na enoni, i tako mataha, ngaia ki girara i tarahua na girarana na namba iana na marâ vasiga, suria na namba ki visia na atana ta na mane. Na namba ki manga ikê: na tangarê ge ono matara na tangahuru ge ono matara ke ono.