Read Kahua RANGANIHA 16 Bible Online

RANGANIHA 16 - Kahua bible

RANGANIHA 16

¹Ma hemuri inê kê rongoa na ringena, i râ me i ruma ni rotu, ma ki tamasi raha tangara na angelo gi pi, ki vi: “Mu râ, ma kamu karangigi i maveta na apira gi pi ni hagaitangiha tenia God!”

²Na ani gi tage na angelo ki râ, ma ki karangia i maveta na apira iana. Na ani, ga nahunia na segesegeha iana na marâ vasiga ma na ani, ga rahesia na nununa, ga tahea, ka hatamia na mamasiaganiha raha, renia ga gahuira na garu.

³Ma hemuri na ruata na angelo ki karangia i asi na anina na apira. Na asi ki vora renia na gapu, na gapuna na gahua, ma na ara ni ega hato ka makama.

⁴Ma hemuri na oruta na angelo ki karangia i ve ma igê na ve banga na anina na apira. Ma ngaigi nogani ka vora renia na gapu.

⁵Inê kê rongoa na angelo, i bâsurigi na ve, i vi: “God raramohaga hunigo, go gâga i ngekê, ma ko bani oga me i nago. Na hagaitangiha, go vatera, ka oto!

⁶Ga nahuira ka me na kariamu ma na poropete iamu, tahema igo ko hagatunumira renia na gapu. Ngaia ki ararira!”

⁷Ma hemuri, tenia na bea ni vogasiha, inê kê rongoa, i râ me ta na ringena ki vi, “Araha, God raramohaga hunigo! Na suriha iamu ka koro teha ngavê, ma ka oto ngavê!”

⁸Ma hemuri na heta na angelo ki karangia igê na arito na anina na apira, hanana na arito ki girara i singira na enoni renia na babahana raha.

⁹Na enoni ka noro renia na babahana raha, ma ka tamasi erasia na atana God, i araha tangagi na mamasiaganiha ngegana. Ngaira ka usi, vi ge urisi parongata tenigi na tasi, ma ka usi, vi ge visia raha na Araha.

¹⁰Ma hemuri na rimata na angelo ki karangia igê na atohana na marâ vasiga na anina na apira. Na roto hono ki buhia na agua, na marâ vasiga ki araha tanga, ma na enoni ka makuka, ma ka ngasigi na meata.

¹¹Ngaira ka tamasi erasia God, i marungia na vavearo, renigi na mamasiaganiha iata ma na garuta. Ma ka pe urisi parongata era.

¹²Ma hemuri na onota na angelo ki karangia igê na ve raha i Uparatesi na anina na apira, ma na ve ki mamata rârâ vê hanana vi na maneraha tenia kerekê ka tarê igê.

¹³Ma hemuri inê kê bâsira na ataro era gi oru, ga bâ mangara na sibara. Tani ki hura me tenia na harana na hua raha, tani ki hura me tenia na harana na marâ vasiga, ma tani ki hura me tenia na harana na poropete hagaparu.

¹⁴Ngaira ka na nunuta na ataro, ga katogi na mena. Na ataro gi oru ngegana ka arâ tangara na ara ni maneraha hato i maveta hagenani, hanana vi ga hagahakura me, ka meheariha God raramohaga hunia igê na tangiana raha iana.

¹⁵“Mu rongo! Inê kê arâ me manga na mane hanago! I babarisi na enoni, i hinaru, ma ki anumasigi na gahu iana, hanana siana ki arârâ rupaturi, ma ki maki i maata na enoni!”

¹⁶Ma hemuri na ataro ka hagahakura me na maneraha igê na agua, na Siu ka hêtana vi Aramagetoni.

¹⁷Ma hemuri na pita na angelo ki karangia igê na bevoa tatahe na anina na apira. Ta na ringena tenia na atohana raha i ruma ni rotu ki tamasi raha, ki vi: “I hato nga!”

¹⁸Ga vora me na marangea, na gugusuhia, ma na akurua, ma na apena na baganunu raha. Haganega tenia i nago kere vê noga, na enoni ka pe hatamia noga na nunu raha manga na ani ngekana. Na nunu ngekê ki era teha ngavê!

¹⁹Na hinua raha ki avaga, ki vora ki oru, ma na nunu ki erasigi ngavê na hinua hato i maveta hagenani. God ki takusia aporo i Babilone, ma ki hagatonomia renia na vaini igê na kâkâ iana, na vaini ni mangariaganiha iana.

²⁰Na marê hato ka magahuru, ma na ara ni barani hato ka magahuru nogani.

²¹Na êsusuna na rangi ka mangagi na apeni na bagahê raha, ma ka higa ngavê, vari na 50 kilo. Ngaira ka rangisira na enoni. Ma na enoni ka tamasi erasia God suria na hagaitangiha renigi na êsusu, ga mangagi na hê ngegê, suria ga hagamamasiagara bâraha.