Read Kahua RANGANIHA 21 Bible Online

RANGANIHA 21 - Kahua bible

RANGANIHA 21

¹Ma hemuri inê kê bâsirerua na vavearo haoru ma na maveta haoru. Na bani vavearo ma na bani maveta karu magahuru. Ma na asi ki magahuru.

²Ma inê kê bâsia na Hinua Apuna, i Jerusaleme haoru, i so me tenia i pasina God. Ngaia ki rêni, ma ki hagesuru haoru manga na kere gete, i hagesuru haoru, hanana vi arâ vurusia na mane iana.

³Inê kê rongoa na ringena, i tamasi raha tenia na atohana raha, ki vi: “I ngekê God ki oga henira na enoni! Ngaia ki page gâga henira, ma ngaira ka page vora re na kariana. God ngaia marena ki page gâga henira, ma ki page God iata.

⁴Ngaia ki page taruhigi râ na tavoni na maata. Ki hato na enoni, vi ge me, vi ge rugu na obata, vi ge angiangi, se vi ge hatamia na mamasiaganiha. Na bani tarani ka bani magahuru.”

⁵Ma hemuri na ani, i oga so igê na atohana raha, ki vi, “Hoi, i ngekê inê kê hagahârungigi na ara ni marâ hato!” Nikâ ngaia ki vi tangê, ki vi, “Gu sege so vikê, renigi na tamasinga ngegê ka monari, ma ka hagêguritogo renigi.”

⁶Ma ngaia ki vi: “I bani vora me! Inê ki na Alapa ma na Omega, i vi, Inê ki na Haganegahana ma na Hagahatongina. Na ani mavê na enoni, i mamata na riona, inê be hagatonomia purua renia na ve tenia na ve banga na ve ni mêriha.

⁷Na ani mavê na enoni, i tehateha, inê be katoa vikê: inê na God iana, ma ngaia ki na kareku.

⁸Ma na enoni ga rumakaka, na enoni ga pe hagamonarigi na tamasinga iata, ma na enoni i aharêsira na paronga era, na enoni ga henahu, na enoni ga gamogamo, na enoni ga hekuasi, ma na enoni ga hagarapera na ataro, ma na enoni hato ga hagahagaparu, ngaira hato ka arâ igê na agua raha ni gi, i karekare ni sivi. Ngaia ki na ruata na mera.”

⁹Na hitangita na angelo gi pi, ga nahunigi na apira gi pi, ga vunu renigi na hatongini na hagaitangiha, ki râ me tangê, ma ki vi, “Râ me, be hagabâsigo renia na gete êragi haoru, na hehene iana na Karena Sipi.”

¹⁰Na Higona Apu ki angariê, ma na angelo ki meêtagere i haha igê na barana raha era.

¹¹Ngaia ki hagabâsiê renia i Jerusaleme, na Hinua Apuna, i so me tenia i pasina God, ma ki togatoga renia na bâbâhana raha God. Na hinua raha ki togatoga manga na hê ahe, manga na hê ahe rotorotoaga memera, manga na hê misi ni bo.

¹²Na para raha ki akê era, i rihuia na hinua raha. Na maa ni para tangahuru gi tage matarerua. Ma na angelo tangahuru matarerua ka ura tonganigi na maa ni para. Igê na ara ni maa ni para ka bani segea igê na hitangini na atata na varo ninuni tangahuru matarerua iata na Isiraelita.

¹³Igê na ara ni apaneni ge he na para ka oga igê na maa ni para gi oru: na ani gi oru igê na apanena kere kê, na ani gi oru i na apanena na târagina, na ani gi oru igê na apanena na avarosi, ma na ani gi oru igê na apanena kere so.

¹⁴Ma ka bani tagarahia na para na hinua raha igê na bagahê raha tangahuru matarerua. Ma igê na ara ni hê ka bani segea igê na atana na hitangita na aposotolo tangahuru matarerua iana na Karena Sipi.

¹⁵Na angelo, i tamasi tangê, ki nahunia na apinige na golo ni hagevovo, hanana i hagevoregi na hinua raha, na maa ni para, ma na para na hinua.

¹⁶Na hinua raha ki heavore ngavê, hagarabo ma hagaoto. Na angelo ki hagevorea na hinua raha renia na apinige ni hagevovo. Ngaia ki 2,000 kilomita borahu, ma ki aberabera, ma ki akê.

¹⁷Nikâ na angelo ki hagevorea na para, ma ki hurakê me 144 mita manga bani hanana na enoni ga hagevovo.

¹⁸Na para ka bani tagarahia renigi na hê ahe rotorotaga memera. Ma na hinua raha ka bani tagarahia renia na golo taranina, i marava vê manga na hê misi ni bo.

¹⁹Na hê, ga tagarahia igê na para ni hinua raha, ka reoreoga renigi na ani mavê manga na hê ahe. Na ani gi tage na hê, ga tagarahia igê na para, ki na hê ahe rotorotoaga memera. Na ruata ki na hê ahe maravarava manga na vavearo. Na oruta ki na hê ahe rahurahugaga. Na heta ki na hê ahe maravarava manga na go.

²⁰Na rimata ki na hê ahe uririga. Na onota ki na hê ahe hereherega. Na pita ki na hê ahe toratorakaga. Na varuta ki na hê ahe makomakoga. Na sivata ki na hê ahe hereherega toratorakaga. Na tangahuruta ki na hê ahe siki. Ma matare tage na hê ki na hê ahe pusupusuga. Ma matarerua na hê ki na hê ahe memera.

²¹Na maa ni para tangahuru matarerua ka tagarahigi renigi na maani na egugu: na maana na egugu gi tage tanga na maa ni para gi tage. Na tara na hinua raha ki na golo taranina, i marava manga na hê misi ni bo.

²²Inê kê pe bâsia na ruma ni rotu i hinua raha, suria na ruma ni rotu igê ngaia ki na Araha God raramohaga hunia ma na Karena Sipi.

²³Na hinua raha ki pe obanirerua na arito ma na hageha, vi garu mavesia, renia na bâbâhana raha God ki mavesia, ma na Karena Sipi ngaia ki na laiti.

²⁴Na enoni i maveta hagenani ka page râ suria na mavetana, ma na maneraha i maveta hagenani ka page migirâ igê na ruruguha iata.

²⁵Na maa ni para na hinua raha ka page tahataha tare na tangiana hagenani. I asa, vi ge purusigi, suria i mareha na bungiana.

²⁶Na enoni hato i maveta hagenani ka page migirâ me na nahuninga ma na ruruguha iata igê na hinua raha.

²⁷Ma na marâ era ki asa, vi ge bêbanu igê na hinua raha, ma nikâ i mareha ta na enoni, vi ge tanugi na marâ era, se vi ge hagahagaparu. Nga noga ma na ani, ga bani segegi so na atata igê na buka ni mêriha iana na Karena Sipi, ngaira ka page bêbanu igê na hinua raha.