Read Kahua RANGANIHA 3 Bible Online

RANGANIHA 3 - Kahua bible

RANGANIHA 3

¹“Tanga na angelo iana na haku na enoni i Satisi, ga tongesuri, gu sege vikê tanga: “Ikê ki na taroha tenia na ani, i nahunira na higona gi pi iana God ma na higu gi pi. Inê kê bani girara na parongami. Inê kê girara, vi igamu kamu bâ manga vigamu mauri, ma hete mu me.

²Mu rite, ma kamu hagamêrigi na marâ, mu nahunigi mênga, hanana siana ka meme ngavê. Suria inê kê tarahua, vi na parongami ka pe koro bâkoro i maana God iaku.

³Hoi, mu takusigi aporo na marâ, ga bani hagesurigamu renigi, ma kamu bani rongogi. Mu arâ surigi, ma kamu murisigegi na tasi iami, ma kamu urisi parongami. Manga mu pe riterite, inê kê page hagakangigamu manga na mane hanago, ma ki asa iami, vi gamu girara na matena ta, kanigê page arâ me igê.

⁴Ma i pasimi i Satisi ka gâga igê tani na enoni, ga pe hagatongogi na gahu iata. Ngaira ka page tuguni siki, ma ka page takuê, suria i marisita vikana.

⁵Na ani, i teha, ki page tuguni siki manga ngekana, ma inê ki asa, vi ve ahunia râ na atana tenia na buka ni mêriha. I maata o Vaemaku ma na angelo iana inê kê page visia mataha, vi ngaia ki na aniku.

⁶“Manga mu girara mu karinga, mu karinga na marâ, i visia na Higona Apu tangara na haku na enoni, ga tongesuri!

⁷“Tanga na angelo iana na haku na enoni i Pilatelepia, ga tongesuri, gu sege vikê tanga: “Ikê ki na taroha tenia na ani, i apuna ma ka hagêguritogo renia, ma ki nahunia na raramohana o Tavite. Matena i tangahia na maa ni ruma, i bara tanga ta na enoni, vi ge girara, ge purusia aporo; ma na matena i purusia, ki bara tanga ta na enoni, vi ge girara ge tangahia aporo.

⁸Inê kê bani girara na parongami. Inê kê girara, vi igamu kamu nahunia na kere ramoha. Igamu kamu bani râ suria na hagesuringa iaku, ma kamu pe hagaiga pusigamu maremi reniê. Inê kê bani tangahia na maa ni ruma tangagamu, ma ma ki bara tanga ta na enoni, vi ge girara ge purusia aporo.

⁹Mu rongo! Inê kê page katora na kariana Satana ka arâ me i maami, ma ka susure ka bêtuhigamu. Ngaira ka na enoni ni hagaparunga, ga vi, vi ngaira ka na Siu, ma hete i mareha. Ngaira hato ka page girara, vi inê kê takuigamu.

¹⁰Suria igamu kamu bani piringiape, manga hanana gê bani bonasigamu, inê kê page anumasigamu nikâ tenigi na bagabevoani, ga page tarahua na maveta hagenani, hanana ga uhungira na enoni hato i maveta.

¹¹Inê ki sugia ma vi ve râ me. Mu taua gatagata nga na marâ, mu nahunia, hanana siana ta na enoni ki hanagoa tenigamu na mahemi, na meni mu teha.

¹²Inê kê page katoa na ani, i tehateha, ki manga na u i rarona na ruma ni rotu iana na God iaku, ma i ngekana ngaia ki page gâga tare nga igê. Ma inê be segererua na atana na God iaku ma na atana na hinua iana na God iaku igê. Ngaia kini Jerusaleme haoru, i page soso me tenia i pasina na God iaku. Ma nikâ inê be segea na ataku haoru igê.

¹³“Manga mu girara mu karinga, mu karinga na marâ, na Higona Apu i visia tangara na haku na enoni, ga tongesuri!

¹⁴“Tanga na angelo iana na haku na enoni i Laotisea, ga tongesuri, gu sege vikê tanga: “Ikê ki na taroha tenia God ni monariha, i tamasi monari tare, ma ki asa, vi ge hagaparu, ma i pasina ngaia ka vora me na ara ni marâ hato, God i bani hagavorara.

¹⁵Inê kê bani girara na parongami. Inê kê girara, vi igamu kamu pe manga na ngêra, i mako se i maga. E, ma ke manga vi igamu, ma kamu maratorana na hitangiterua, vikê ke koro!

¹⁶Ma suria igamu kamu manga na ngêra, i mako okaga, i vi, i pe mako ma ki pe maga, inê kê page momoatenigamu.

¹⁷Igamu kamu vi, vi ‘Inê kê ruruguha. Na ara ni marâ hato i pasiku. Inê kê pe obanigi vi tani me nikâ na marâ.’ Ma igamu kamu pe girara, vi igamu kamu bâ heruruhi, ma kamu bâ hetaki ngavê. Igamu kamu matareha, kamu rupaturi, ma ka guru na maami.

¹⁸Hoi, be vi tangagamu: mu vurivuri na golo teniê inê, na golo taranina, hanana mu ruruguha. Mu vurivuri nikâ na gahu siki, hanana mu gahugahu pusigamu maremi renigi, hanana mu pinihia na makiha, suria mu rupaturi. Mu vurivuri nikâ na meresini tangagi na maami, hanana mu girara mu bâbâ.

¹⁹Inê kê ramonira, ma kê hagaitangira na enoni hato, gê takuira. Hoi, mu takotako maninga, ma kamu murisigegi na tasi iami, ma kamu urisi parongami.

²⁰Mu rongo! Inê kê ura i maa ni ruma, ma kê korekore. Manga vi ta na enoni, i rongoê, ma ki tangahia na maa ni ruma taraku, inê kê page bêbanu i ruma iana, ma inê ma ngaia kamuru bêrihu.

²¹Inê kê page katoa na ani, i tehateha, ki gâga so heniê igê na atohaku raha. Inê kê bani teha nogaku, ma i ngekê inê kê oga so henia o Vaemaku igê na atohana raha.

²²“Manga mu girara mu karinga, mu karinga na marâ, i visia na Higona Apu tangara na haku na enoni, ga tongesuri!”