Read Kahua RANGANIHA 4 Bible Online

RANGANIHA 4 - Kahua bible

RANGANIHA 4

¹Ma hemuri inê kê bâsia ta na marâ getea. Inê kê bâsia, i tahataha ta na maa ni ruma tanga i pasina God. Ma na ringena, i rongo raha manga na ahuri, ma ki bani tamasi tangê i nago, ngaia ki vi, “Gu akê me, be hagabâsigo renigi na marâ, ga page voravora me i murini na tarani ngegana.”

²Ki parama na Higona Apu, ma ki angariê ngavê. I ngekana i pasina God ki oga igê na atohana raha, i oga so igê.

³Na maana ki togatoga mangagi na hê ahe bâkoro era, manga na hê ahe toratorakaga ma na hê ahe memera, ma na rorovagaro ki togatoga manga na hê ahe maravarava, i rihia na atohana raha.

⁴Ma na âgâga tangahuru gi rua matara ke he ka oga rihia na atohana raha, ma na meraha tangahuru gi rua matara ke he ka oga so igê. Ngaira ka tuguni siki. Ngaira ka mahe renigi na tarepuri na golo.

⁵Na marangea, ma na gugusuhia, ma na akurua ka râ me tenia na atohana raha. Na magnate gi pi ka vavata ma ka mave i maana na atohana raha. Ngaira ka na higona gi pi iana God.

⁶I maana na atohana raha ki oga igê ta na marâ, i manga na asi, i aberabera ngavê, i manamanaga, ma ki vora na taketakena, ma ki togatoga manga na hê ahe. Ma igê na apaneni ge he na atohana raha na marâ mamauri ge he ka oga rihia. Na ara ni hitangita ki tonga renigi na maana, ga gahuia na matona ma na murina.

⁷Na ani gi tage na marâ mamauri ki bâ manga na laioni. Na ruata ki bâ manga na puruka mane. Na maana na oruta ki bâ manga na maana na enoni. Ma na heta ki bâ manga na ahetaronga, i aheahe.

⁸Na ara ni hitangita na marâ mamauri ge he ngegana ki nahunigi na gagahana ge ono, ma ki tonga renigi na maana, ga manasia na apena hagenani, i metara, ma i rarona na apena nikâ. Ngaira ka ama ni kiki nga tare surigi na tangiani ma na bungiani, ka vivi: “I apuna teha ngavê na Araha God raramohaga hunia, i bani goga me i nago, i gâga i ngekê, ma ki page arâ me.”

⁹Na ara ni matena na marâ mamauri gi he ngegana ka kiki, ma ka visia raha, ma ka kasia akê, ma ka visia koro na ani, i oga so igê na atohana raha, ma ki mauri tare ma tare ma,

¹⁰na meraha tangahuru gi rua matara ke he ka susure i maana na ani, i oga so igê na atohana raha, ma ka rahesia na ani, i mauri tare ki bê ki arâ. Ngaira ka nakagi so na tarepuri iata i maana na atohana raha, ma ka vi:

¹¹“Araha God iamami! I ararigo, viga kasigo akê, ma ka visigo raha, ma ka têtê viteamu. Suria igo ko hagavorara na ara ni marâ hato, ma suria na obaniha iamu ngaira ka gâga ma ka mauri.”