Read Kahua RANGANIHA 5 Bible Online

RANGANIHA 5 - Kahua bible

RANGANIHA 5

¹Inê kê bâsia na rumina na pepa i rimana i otona na ani, i oga so igê na atohana raha. Ga sege igê na apanena heri, ma igê ka bani puruia igê na agua gi pi.

²Ma kê bâsia na angelo raramohaga, i ngere raha, ki vi: “Ti ki araria, vi hasuigi râ na puru?”

³Ma i pasina God, ma i maveta, ma i ruguhana na maveta ka pe tarahua rârâ igê na ani, vi ge girara ge gasia na rumina na pepa, hanana vi ge bâbâ i rarona.

⁴Inê kê angi bâraha, suria ga pe tarahua rârâ na ani, vi ge araria, ge gasia na rumina na pepa, se vi ge bâbâ i rarona.

⁵Ma na hitangita na meraha ki vi tangê, ki vi: “Siana ko angi! Gu bâ! Na Laioni tenia na varo ninuni iana o Juta, na Araha tenia na raraha iana o Tavite ki bani teha, ma ki girara i hasuigi râ na puru gi pi, ma ki gasia na rumina na pepa.”

⁶Ma inê kê bâsia na Karena Sipi, i ura i utumigana na maana na atohana raha, ma na marâ mamauri ge he ma na meraha ka ura rihia. I bâ, manga na Karena Sipi ga bani nahuia. Ngaia ki tonga renigi na hona gi pi, ma na maana gi pi. Ngaigi ka na higona gi pi iana God, i bani hagatorangenira i maveta hagenani.

⁷Na Karena Sipi ki râ, ma ki tavoa na rumina na pepa tenia na rimana i otona na ani, i oga so igê na atohana raha.

⁸Matena ngaia ki kato vikana, na marâ mamauri ge he ma na meraha tangahuru gi rua matara ke he ka susure i maana na Karena Sipi. Na ara ni hitangita ki nahunia na kita ma na apira na golo, i vunu renigi na marâ sigini koro, ga sungigi. Ngaigi ka na nunginungiha iata na kariana God.

⁹Ngaira ka kiria na ki haoru, ka vi: “Igo nga kani ararigo, vigo tavoa na rumina na pepa, ma ko hasuigi râ na puru igê. Suria ga bani nahuigo go me ma renia na mera iamu igo ko bani vurira aporo na enoni tanga God tenigi na ara ni varo ninuni, tenigi na ara ni tamasinga hehegitigi, tenira na ara ninuni ga bâ hehegitigi, ma tenigi na ara ni agua hato i maveta.

¹⁰Igo ko bani katora, ka vora na hakuta raha na enoni ni vogasiha, hanana ga tagara tanga God iamami. Ma ngaira ka page marungia na maveta.”

¹¹Ma hemuri inê kê bâ nikâ, ma kê rongora na rehagaro ma na rehagaro na angelo. I asa, vi ge tomanira. Ngaira ka ura rihia na atohana raha, ma rihira na mara mamauri ge he, ma na meraha.

¹²Ma ngaira ka kiki raha, ka vi: “Na Karena Sipi, ga bani nahuia, ki araria, i taugi na arahanga ma na ruruguha, na takoha mataha ma na ramoha. Ma ki araria, viga kasia akê, ka visia raha ma ka visia koro!”

¹³Minê kê rongora na ara ni marâ hato, ga oga i pasina God, i maveta, ma i ruguhana na maveta, ma na ara ni marâ hato, ga oga i asi. Na ara ni marâ hatohato ngegê ka ki, ka vi: “Tare ki bê ki arâ ka visirerua koro ma ka kasirerua akê, ka visirerua raha ma ka têtê viteaterua na ani, i oga so igê na atohana raha, ma na Karena Sipi!”

¹⁴Na marâ mamauri ge he ka arami, ka vi, “Monari!” Ma na meraha ka susure, ma ka rahesirerua.