Read Kahua RANGANIHA 6 Bible Online

RANGANIHA 6 - Kahua bible

RANGANIHA 6

¹Ma hemuri inê kê bâsia na Karena Sipi, i hasuia râ na ani gi tage na hitangini na puru gi pi, ma kê rongoa na hitangita na marâ mamauri ge he, i tamasi, ki rongo raha manga na akurua, ki vi: “Râ me!”

²Inê kê bâ vê, ma ki vora me na hosi siki. Na ani, i tagiria na hosi, ki têa na epage, ma ka hagamahea renia na tarepuri. Ngaia ki tage vê ki râ, manga na ani, i teha, hanana i tehateha.

³Ma hemuri na Karena Sipi ki hasuia râ na ruata na puru. Ma inê kê rongoa na ruata na marâ mamauri, i vi: “Râ me!”

⁴Ma ki vora me ta na hosi nikâ, na ani memera. Ka vatea na ramoha tanga na ani, i tagiria, hanana i katoa na hearihatana i maveta, hanana na enoni ka henahunahu. Ma ka vatea na tatapa borahu.

⁵Ma hemuri na Karena Sipi ki hasuia râ na oruta na puru. Ma inê kê rongoa na oruta na marâ mamauri, i vi: “Râ me!” Kê bâ vê, ma ki vora me na hosi masuri. Na ani, i tagiria, ki têa na marâ ni hagararinga ni higata i rimana.

⁶Inê kê rongoa ta na marâ, i rongo manga na ringena, i râ me i berarogata na marâ mamauri ge he. Ngaia ki vi: “Na roharoha gi tage na pulaoa ki araria na mena na tagaraha igê na tangiana hagenani, ma na roharoha gi oru na koni ka araria na mena na tagaraha igê na tangiana hagenani. Ma siana ko erasigi na apinige na olive ma na vaini!”

⁷Ma hemuri na Karena Sipi ki hasuia râ na heta na puru. Ma inê kê rongoa na heta na marâ mamauri, i vi: “Râ me!”

⁸Inê kê bâ vê, ma ki vora me na hosi rahurahugaga. Na atana na ani, i tagiria, ngaia ki na Mera, ma Hatesi, na hinua iata na enoni, ga me, ki râ suria. Ma ka vatererua na ramoha, hanana garu nahuia na heta na apanena na maveta renia na tatapa borahu, renia na magêha, renia na ringa, ma renira na marâ vasiga i maveta.

⁹Ma hemuri na Karena Sipi ki hasuia râ na rimata na puru. Ma i ruguhana na bea ni vogasiha inê kê bâsira igê na atarota na enoni, ga bani nahuira, suria ngaira ka bani tarohenia na tamasinga iana God, ma ka pe rumakaka igê na tongesuriha iata, ga tarohenia.

¹⁰Ngaira ka ngere raha, ka vi: “Araha raramohaga hunigo, i ararigo, vi ga rahesigo ma ka hagêguri togo renigo. I na keta kanigo kahu surira igê na enoni i maveta, ma ko hagaitangira, suria ngaira ka nahuigami?”

¹¹Na ara ni hitangita ka vatea na tuguni siki. Ma ka vi tangara, ka mamaro sisite noga, mataro me ka hatohato me na tamata ma na goata igê na tongesuriha, ga page nahuira nogata manga ngaira.

¹²Ma hemuri inê kê bâsia na Karena Sipi, i hasuia râ na onota na puru. Ma ki vora me na apena na baganunu raha, ma na arito ki roto, ma ki masuri manga na gahu masuri ngavê, ma na hageha ki memera ngavê manga na gapu.

¹³Na higu ka vota so i maveta tenia na vavearo mangagi na buni na apinige na fiki, ga anunu renia na roga raha.

¹⁴Na vavearo ki magahuru manga na rumina na pepa, ga rumia, ma na ara ni barani ma na marê ka suga tenigi na atohani.

¹⁵Ma na araha ni maveta, ma na maneraha, ma na araha iata na mane ni me, na ani ga ruruguha, ma na ani ga raramohaga, ma ngaira hato na enoni getera, na ani ga vora re na kare vurivuri, ma na ani ga mareha, ngaira hato ka ahi igê na vaba, ma i ruguhani na hê raha igê na hungani.

¹⁶Ngaira ka ngirigi na hungani ma na hê raha, ka vivi: “Mu apuri hurigami, ma kamu pinihigami tenia na maana na ani, i oga so igê na atohana raha, ma tenia na hagaitangiha iana na Karena Sipi tangagami!

¹⁷Suria i ngekê ki ata me na tangiana raha ni hagaitangiha iaterua tangagami, ma ti kani girara vi gatagata renia?”