Read Kahua RANGANIHA 7 Bible Online

RANGANIHA 7 - Kahua bible

RANGANIHA 7

¹Ma hemuri inê kê bâsira na angelo ge he, ga ura tonganigi na ariruguni ge he na maveta, ma ka hagabarasigi na maani na tangi ge he, hanana siana ta na roga ki hihisia na ano, se vi na asi, se vi na apinige.

²Ma inê kê bâsia nikâ ta na angelo getea, i so me tenia i kere kê, i merâ me na marâ, ga segea renia na girarana na God mamauri. Ngaia ki ngirira raha na angelo ge he, na angelo, God i bani vatera renia na ramoha, hanana vi ga erasirerua na ano ma na asi renia.

³Na angelo ki vi: “Siana kamu erasigi na ano, se vi na asi, se vi na apinige, mataro me igami kami segea hato na segesegeha iana God igê na raeta na kariana na God iaka.”

⁴Ma kê rongoa, vi na ani gi hita ka segegi na raeta renia na girarana na God: ngaira ka na rehagaro tangarê gi tage ma na tangahuru ge he matara ke he tenigi na ara ni varo ninuni iata na Isiraelita.

⁵Ga bani segera na rehagaro tangahuru matarerua tenia na varo ninuni iana o Juta; na rehagaro tangahuru matarerua tenia na varo ninuni iana o Rubeni; na rehagaro tangahuru matarerua tenia na varo ninuni iana o Gata;

⁶na rehagaro tangahuru matarerua tenia na varo ninuni iana o Asere; na rehagaro tangahuru matarerua tenia na varo ninuni iana o Napatali; na rehagaro tangahuru matarerua tenia na varo ninuni iana o Manase;

⁷na rehagaro tangahuru matarerua tenia na varo ninuni iana o Simeone; na rehagaro tangahuru matarerua tenia na varo ninuni iana o Levi; na rehagaro tangahuru matarerua tenia na varo ninuni iana o Isakare;

⁸na rehagaro tangahuru matarerua tenia na varo ninuni iana o Sebuluni; na rehagaro tangahuru matarerua tenia na varo ninuni iana o Josepo; ma na rehagaro tangahuru matarerua tenia na varo ninuni iana o Benamino.

⁹Ma i hemuri inê kê bâsira na rehagaro raha teha ngavê. I bara tanga ta na enoni, vi ge tomanira. Ngaira ka râ me tenigi na ara ni agua i maveta tenigi na ara ni varo ninuni hehegitigi iata na enoni, tenira na ara ni enoni, ga bâ hehegitigi, ma tenigi na ara ni tamasinga hehegitigi. Ngaira ka ura i maaterua na atohana raha ma na Karena Sipi. Ngaira ka tuguni siki, ma ka têgi na nini i rimata, suria ngaira ka teha.

¹⁰Ngaira ka ngerengere raha, ka vivi: “Na tahingamami ki râ me tenia na God iamami, i oga so igê na atohanana raha, ma tenia na Karena Sipi!”

¹¹Na angelo hato, na meraha, ma na marâ mamauri ge he ka ura rihia na atohana raha. Ngaira ka susure ka abahigi na maata i maana na atohana raha, ma ka rahesia God.

¹²Ngaira ka vi: “Monari! Tare ma tare ma ka visia raha God ma ka kasia akê, ka visia koro ma ka hagarahasia, ma têtê viteana na God iaka, i takotako mataha ngavê, ma ki raramohaga hunia! Monari!”

¹³Ta na hitangita na meraha ki hagateê, ki vi, “Ti ka na enoni, ga tuguni siki? Ngaira ka râ me tenia i he?”

¹⁴Inê kê arami, kê vi: “Uva, pe hagare, araha. Igo ko girara.” Ngaia ki vi tangê, ki vi: “Ngaira ka na enoni, ga bani tahi tenia na bagabevoana raha. Na tuguni iata ka siki, suria ga tananigi renia na gapuna na Karena Sipi.

¹⁵Tahema ngaira ka ura i maana na atohana raha God, ma ka rahesia i ruma ni rotu iana tare, na tangiani ma na bungiani. Ma na ani, i oga so igê na atohana raha, ki page gâga henira, ma ki page anumasira.

¹⁶Ngaira ki hato hagetage, vi ge page magê, se vi ge page mamata na riota. Ma ki hato nikâ na arito, se na ani mavê na bababana raha, vi ge page singira.

¹⁷Renia na Karena Sipi, i oga i utumigana na atohana raha, ki page marupera manga na avanuta na sipi, ma ki page bêngenira tange na ve banga ni mêriha. Ma God ki page taruhigi râ na ara ni tavoni na maata.”