Read Kahua RANGANIHA 8 Bible Online

RANGANIHA 8 - Kahua bible

RANGANIHA 8

¹Matena na Karena Sipi ki hasuia râ na pita na puru, i pasina God ki mangumanguaga sisite râ noga.

²Ma hemuri inê kê bâsira na angelo gi pi, ga ura i maana God. Ga vatera na ahuri gi pi, ka têgi.

³Ma ta na angelo getea ki râ me, ma ki ura i maana na bea ni vogasiha. Ngaia ki têa na apira na golo, ga sungigi igê na marâ, i sigini koro. Ka vatea renigi rako na marâ, ga sigini koro, hanana vi sungigi, ma ki tagarenigi haku henigi na nunginungiha iata na kariana hato God igê na bea ni vogasiha, i ura i maana na atohana raha.

⁴Na roboni na marâ, ga sigini koro, henigi na nunginungiha iata na kariana God ka akê tenirerua na rimana na angelo, i ura i maana God.

⁵Ma hemuri na angelo ki torea na apira, ga sungigi igê na marâ, i sigini koro, ma ki hagavunusia renia na gi igê na bea ni vogasiha, ma ki kasia so i maveta. Ma i ngekana ka vora me na gugusuhia, ma na akurua, ma na marangea, ma na nunu.

⁶Ma hemuri na angelo gi pi henigi na ahuri gi pi ka nanê, hanana vi ga uhigi.

⁷Na ani gi tage na angelo ki uhia na anina na ahuri. Na rangi manga na hêni na aisi ma na gi, haku henia na gapu, ka rangisia ngavê na maveta. Na oruta na apanena na maveta ki tete, ma na apinige igê nikâ ka tete, ma na go maravarava hato igê ka tete.

⁸Ma hemuri na ruata na angelo ki uhia na anina na ahuri. Ma ka kasia i asi ta na marâ, i bâ manga na barana raha era, i tarê igê na gi.

⁹Ma na oruta na apanena na asi ki vora renia na gapu. Ma na ega hato, ga oga igê, ka me, ma na haka hato, ga oga igê, ka akamakama vê.

¹⁰Ma hemuri na oruta na angelo ki uhia na anina na ahuri. Na apena na bagahigu raha, i noro manga na mangate, ki vota tenia na vavearo, ma ki vota hurigi na ara ni oruta na ve ma na ve banga.

¹¹Na atana na higu ngekana ki Maheha. Na ara ni oruta na ve ka mahe, ma ka rako na enoni, ga me, renia ga tonomigi na ve, ga mahe.

¹²Ma hemuri na heta na angelo ki uhia na anina na ahuri. Ma ka roto na oruta na apanena na arito, ma na oruta na apanena na hageha, ma na ara ni oruta na higu. Ki roto na oruta na apanena na tangiana, ma ki roto hono nikâ na oruta na apanena na bungiana.

¹³Ma hemuri inê kê bâsia na ahetaronga, i aheahe i haha, ma kê rongoa, i angi raha, ki vivi: “Uvê, i era ngavê! I era ngavê! Uvê, i page era ngavê tangara na ani hato, ga oga i maveta, matena ga angiangi na ahuri, na angelo gi oru getera ga kahu uhigi!”