Read Kahua NUNGINUNGIHA IANA O MANASE 1 Bible Online

NUNGINUNGIHA IANA O MANASE 1 - Kahua bible

NUNGINUNGIHA IANA O MANASE 1

¹Araha raramohaga hunigo, God iata na êvarimami, God iata o Abarahamo, o Isako mo Jakobo, God iata na raraha iata, ga hagakoro obamu.

²Igo ko hagavoragi na ano ma na vavearo ma na ara ni marâ hato henigi na bâkorohani igê.

³Igo ko bonasia na asi ma ngaia ki tê viteamu ma ki pe vunu ahaharê. Igo ko nakagi na rutuni na asi ka oga tonge igê na atohani, suria igo ko raramohaga hunigo ma ki rongo raha na atamu.

⁴Matena go hagabângenia na raramohamu raha, na ara ni marâ hato go hagavorara, ka tatata.

⁵Na bâbâhamu raha ki hagamamagutaga ngavê ma na mangariaganiha iamu ki nahuira ngavê na enoni tasi.

⁶Na takoruguana go surua ki raha teha, hanana vigami aitangisia se vigami hagararingenia.

⁷Igo ko Araha raha teha ngavê. I mareha rârâ tani vige maratoramu. Igo ko piringiape, ko haritagi ma ko hetaki. Matena mi mamasiaga meni na bagaparongamami, igo ko hagamahagagami. Araha, igê na korohamu ma na takoruguana iamu igo ko surugi na bonoteniha ni tasi ma na tahinga tangara na ani ga angitenigi na bagatauhata ma ka urisi parongata.

⁸Igo nga Araha ka na God iata na enoni ga hagakoro obamu. Igo ko pe hagaitangira o Abarahamo, o Isako mo Jakobo meni na bagaparongata, suria ngaira ka pe murisigego. Ma tangê inê na enoni tasi igo ko hagaitangiê meni na tasi iaku.

⁹Na tasi iaku ka rako teharigi na one i one. Ngaigi ki rako teha ngavê, Araha, rako teha ngavê! Inê kê bani bagatauhaku me teha ngavê. Tahema ki pe arariê, vi ve ahaukê be maatigo.

¹⁰Na higahigani na tasi iaku ka piringi menamenariê. Inê kê tukuê so renia na seni na aiani i higeê. Inê kê pe manava taraku rârâ, suria gê hagamangarigo. Inê kê hagêrasigi na nunuta na ataro i na ara ni agua. Inê kê katogi na tarani go usitenigi ngavê.

¹¹Ma i ngekê inê kê tangahuriê kê susure ma kê tubê so i ano, ma kê nungigo, hanana vigo takotako rugu reniê.

¹²Araha, inê kê tasi, ma kê haritohego. Inê kê ranganigi na bagatauhaku.

¹³Araha, inê kê nungigo ma kê avarasigo. Gu bonotenigi na tasi iaku ma na bagatauhaku. Siana ko hagamesiê renigi na bagaparongaku. Siana ko mangariaga tare tangê, se vigu ama ni nakagi nga na hagaitangiha tangê. Siana ko suriê kê arâ igê na agua iata na enoni ga me, suria igo Araha, ko bonotenigi na tasi iata na ani ga angitenigi maninga.

¹⁴Gu takuiê, ku korokoro tangê ma ku hagatahiê, henaka vi ga pe arari tangê.

¹⁵Ma hemuri inê be ama ni hagarahasigo nga suria na ogaha hagenani iaku. Na ara ni marâ hato ga tonga na raramohata i vavearo ka kirigo ka hagarahasigo. Na bâbâhamu raha ki asa vige page hato. Monari!