Read Kahua RUTI 1 Bible Online

RUTI 1 - Kahua bible

RUTI 1

¹I kerevê noga, matena i mamênga na maneraha i Isiraele, ngaia ki na magêha raha igê na agua. Ta na mane i Beteleheme i Juta, ngaia henira kaniana mo karena gi rua ka râ i Moaba.

²Ngaia ki no Elemeleki. Kaniana kani ka Naomi, mo karena gi rua ka no Magalone mo Kilione. Ngaira ka na ai ni Eparate ma ka oga i Beteleheme i Juta. Ngaira ka gava râ noga i Moaba tenia na magêha.

³Matena ga oga i ngekana, o Elemeleki ki me. Ka Naomi ki hita so henirerua o karena gi rua.

⁴O karena gi rua ngegê karu êragirerua na kere gete ni Moaba. Tani kani ka Oropa ma tani kani ka Ruti. Igê na ararina na tangahuri harisi

⁵o Magalone mo Kilione ngairerua karu me. Naomi ki hita so ngaia getea, ma ki mareha rârâ vi o vaniana se vi o karena.

⁶Ki rârâ ma ka Naomi ki rongoa, vi na Araha ki koro tangara na kariana, suria i hagarakogi na ngêra tangara. Vikê ngaia ki hagarurugu, ma ki pania i Moaba henirerua ka hungâna.

⁷Ngaira ka tage tavoraha ka aporo tanga i Juta. Matena ga rârâ,

⁸ka Naomi ki vi tangarerua ka hungâna, ki vi: “Muru aporo i pasimurua, i pasiterua kenamurua hegitigi. Na Araha ke korokoro tangagamurua, manga igamurua muru koro tangê ma tangarerua o kareku garu me.

⁹Na Araha ke katogamuru kamuru êragi aporo nikâ ma kamu nahuni ruma.” Vikê ka Naomi ki siginirerua ma ki arirerua. Ma ngairerua karu angi,

¹⁰ma karu vi tanga, karu vi: “Mareha. Igamirua kamuru arâ henigo i pasita na goamu.”

¹¹Ka Naomi ki arami, ki vi: “Mareha ka hungâku. Muru aporo nga. Tanu hega kani muru obania, vigamurua arâ heniê? Muru takusia vari, vi inê kê girara vigê page apararerua nikâ na kare mane gi rua, hanana vigamuru auragirerua?

¹²Muru aporo nga. Inê kê gemêa ngavê, hanana vi ve êragi aporo nikâ. Manga vi inê ma be takusia, vi i pe bara tangê ma be mêru henia na mane i rikini bungi ma be apararerua na kare mane,

¹³ki hega, igamuru kamuru girara ma muru gâga naasirerua karu raharaha? Mareha ka hungâku! Muru girara vi bara vê tangagamurua. Inê kê takigamurua bâraha. Na ta be visia? Suria na Araha ki urapusiê.”

¹⁴Ngairerua karu angi nikâ. Ka Oropa ki siginia ka hungâna, ki aria ma ki aporo i pasina. Ma ka Ruti ki ama ni ruia nga.

¹⁵Vikê ka Naomi ki vi tanga, ki vi: “Ka Ruti, kehamu ki aporo noga tangara na kariana ma tanga na ataro iana. Gu aporo nogamu suria.”

¹⁶Ma ka Ruti ki arami, ki vi: “Siana ko bonasiê kê panigo! Gu nakê be râ henigo! Na agua mavê go arâ igê, inê nogaku kê arâ vê igê! Na goamu ka na goaku! Na God iamu ka na God iaku!

¹⁷Na agua mavê go meme igê, inê nogaku kê meme igê! Na agua mavê ga bagigo igê, ka bagiê nogaku igê! Na Araha ke hagaitangiê ngavê, manga vi inê ma kê naka ta na marâ ki toreê tenigo, nga noga ma na mera!”

¹⁸Matena ka Naomi ki girara ka Ruti ki togeaga vi arâ henia, ngaia ki muni mavê ma.

¹⁹Ngairerua karu râ mataro me karu ata i Beteleheme. Matena garu ata vê, na enoni hato i hinua ka heasiasi me ka kone renia. Na gete hato ka hagakita, ka vi: “E, ka Naomi monari ngekana?”

²⁰Ngaia ki aramira, ki vi: “Siana kamu hêtaku vi ka Naomi, vi ka Vagevage. Mu hêtaku hete vi ka Mara, ka Maheha, suria na Araha raramohaga hunia ki katoa na ogaha iaku ki mahe.

²¹Matena gê pania na hinua ikê, inê kê nahunigi rako na marâ, ma na Araha ki katoê kê aporo me baguru. I tanu hega kamu hêtaku vi ka Naomi, ka Vagevageha, matena na Araha raramohaga hunia ki katoa na ogaha iaku ki mahe ma ki katoê kê oga igê na mamasiaganiha?”

²²Ngaia kani manga i he ka Naomi ki aporo me tenia i Moaba henia ka Ruti ka hungâna na gete ni Moaba. Matena garu ata i Beteleheme, na mu ni koni ka mêa, ma na enoni ka haganega ka huhuhu.