Read Kahua RUTI 3 Bible Online

RUTI 3 - Kahua bible

RUTI 3

¹I ta na tangiana ka Naomi ki vi tanga ka Ruti, ki vi: “Inê be garia nga na mane tangago, hanana go panepane ruma.

²Igo ko bani girara, vi o Boasi, na ani mu bani tagara i mu iana igo ma na gete getera, ngaia ki na raraha iaka. Hoi, gu rongo. I rikini i manurahi ngaia ki page râ igê na agua i haata igê na koni.

³Hoi, gu mamanu bâkoro, ko monego renia na marâ i sigini koro, ma ko tuguni renigi na ani bâkoro ngavê. Hemuri ko arâ igê na agua i haata igê. Go gâga i ngekana ma siana ki bâsigo mataro me ki ngêngê ma ki totono hato.

⁴Go bâsia maninga, vi i he kani vi page tâtâ igê ki mauru. Matena i mauru bore, go gaia râ na aruhana ma ko tâtâ so i gusigana. Ngaia ki page visia tangago, na ta ko page katoa.”

⁵Ka Ruti ki arami, ki vi: “Na ara ni marâ go visigi kê page katogi nga.”

⁶Hoita, ka Ruti ki râ igê na agua ni hatanga ma ki râ surigi maninga na tamasinga iana ka hungâna tanga.

⁷Matena o Boasi ki ngê ma ki tono hato, ngaia ki koro na apena. Ngaia ki râ igê na agua ga naka igê na koni, ma ki tâ so ki mauru i ngekana. Ka Ruti ki kakauni me, ki gaia râ na aruhana ma ki tâ so i gusigana.

⁸Igê na bungiana o Boasi ki gasuga ki rite. Ngaia ki ahoro râ ma ki kone ngavê, suria i bâsia ta na gete i tâtâ i gusigana.

⁹Ngaia ki hagatea, ki vi: “Ka ti igo?” Ka Ruti ki arami, ki vi: “Ka Ruti kani inê. Suria na raraha iaku kanigo igo tahema ki tuguhigo, vigo anumasiê. Hoi, gu êragiê.”

¹⁰O Boasi ki vi: “Na Araha ke korokoro tangago. Inê kê bani girara, vi igo ko toto suria ka hungâmu. Ma i ngekê inê kê kahu girara, vi igo ko toto suria ngavê na raraha iamu. Igo ko pe amane rârâ henira na mane haoru, henaka na ani ga ruruguha se na ani ga matareha.

¹¹Hoi, ka Ruti, siana ko tako bâraha. Inê be katogi na ara ni marâ go obanigi. Na enoni hato i hinua ngaira ka bani girarago, vi igo ka na gete koro.

¹²I monari, vi inê ka na raraha gê hagarangigo, ma ki tuguhiê, vigê anumasigo. Ma ta na mane hete na raraha hagarangigo tehariê inê ki gâga.

¹³Go gâga ikê i rikini bungi akê. I gomaha mavoraro igerua karu page tarahua, manga vi ngaia ma ki obania vi anumasigo se i mareha. Manga vi obania, ki koro era. Manga i mareha, hoi, inê kê tohe renia God mamauri, vi inênga kê page anumasigo. Hoi, gu oga so i rikini bungi akê ma ku tâ ku mêru.”

¹⁴Vikê ka Ruti ki tâ ki mêru, i gusigana o Boasi. Matena i bungibungi mênga, ngaia ki rite, suria o Boasi ki pe obania, ta na enoni vige girara, vi ka Ruti ki oga i ngekana.

¹⁵O Boasi ki vi tanga ka Ruti, ki vi: “Gu tavoa na aruha iamu ma ku vatarangenia ikê.” Ka Ruti ki kato vikana. O Boasi ki kara so igê na koni na ararina na 30 kilo ma ki tamania karu raga ki tâ i gaparana ka Ruti. Ma ka Ruti ki migiaporo i hinua.

¹⁶Matena ka Ruti ki ata vê, ka hungâna ki hagate, ki vi: “Kareku, na mani marâ ki koro ma?” Ka Ruti ki hagarongoa ka hungâna renigi na ara ni marâ i tanugi o Boasi tanga.

¹⁷Ma ngaia ki vi nikâ, ki vi: “O Boasi ki vi tangê, ki vi, i pe koro vi ve aporo me baguru tangago. Tahema ngaia ki vateê renigi na koni hato igê.”

¹⁸Ka Naomi ki vi tanga, ki vi: “Ka Ruti, gu piringiape, mataro me ka arâ manga hanani na tarani hato ngegê. Inê kê girara o Boasi ki page takotako tarana i ngekê.”