Read Kahua 1 SAMUELE 10 Bible Online

1 SAMUELE 10 - Kahua bible

1 SAMUELE 10

¹Hoi, o Samuele ki têa na pi na hê na oile ma ki karangia i bêna o Saulo. Ngaia ki siginia ma ki vi: “Na Araha ki monego, hanana go maneraha tangara na Isiraelita na kariana. Igo ko page marungira na kariana ma ko page anumasira tenira na merongata hato. Na tarana, i hagatanga monari tangago, vi na Araha kani atego ko vora re na maneraha, ki manga ikê.

²Matena gê kasigo vê ko arâ i ngekê, igo ko page tarahurerua na mane gi rua hagarangia na anoanona ka Ragele i Selesaga i na apanena iana o Benamino. Ngairerua karu page hagarongogo, vi na tonki go garira ka bani tarahura ma o vaemamu ki so na takoha iana renira, nga noga ma igo ma hete. Ma ngaia ki ama ni hagate nga, ki vi: “Ma o kareku kê henaka?”

³Matena go arâ tenia i ngekana ma ko tariha igê na apinige apuna i Tabore, igo ko page tarahura igê na mane gi oru, ga arâ tanga i Betele, hanana ga vogasia igê God. Na vere tage na hitangita ki urura na bêhâgata na goti gi oru; tani ki toregi na guani na bereti gi oru; ma tani ki torea na anga na gavona puruka ni vaini.

⁴Ngaira ka page mêri renigo ma ka page vatego na guani gi rua na hitangini na bereti. Go tavorerua nga tenira.

⁵Hemuri ko arâ nga mataro me ko tariha igê na hungana iana God i Gibea. I ngekana ki oga igê na tênga iata na Pilisitina. Igê na maani para ni hinua igo ko page tarahua igê na haku na poropete, ga rerere me tenia na bea ni vogasiha igê na hungana. Ngaira ka page tarugigi na gogo ma ka uhigi na êhihi. Ngaira ka page mâmâ ma ka page ngerengere.

⁶Na raramohana na Araha ki page paraparama ma ki angarigo. Ma igo ko page hakunira igê na mâha ma na ngerengereha ni hagarahenga iata. Ma igo ko page bâbâ riariaga.

⁷Matena ga akê me na tarani ngegana, go katogi na ani mavê na marâ, God ki hagatakusigo renigi.

⁸Igo ko page nanago taraku i Gilegale. I ngekana inê kê page tarahugo igê ma kê page susu ma kê page vogasi renigi na ngêra tanga ga ngêngê haku. Go naasiê nga i ngekana surigi na tangiani gi pi mataro me kê arâ me, hanana gê page hagarongogo renia na ta ki tuguhigo, vigo katoa.”

⁹Matena o Saulo ki karia aharo ki râ tenia o Samuele, God ki katoa o Saulo ki tora getea tenia i nago. Na ara ni marâ o Samuele ki hagarongoa o Saulo renigi, ka vaga me mave igê na tangiana ngekana.

¹⁰Matena o Saulo ma na kariana karu ata i Gibea, na haku na poropete ka mehetarahu o Saulo. Na raramohana God ki parama ma ki angaria o Saulo. O Saulo ki hakunira igê na mâha ma na ngerengereha ma ki bâ riariaga mangara ngaira.

¹¹Na enoni, ga bani girara me i nago, ngaira ka bâsia i kato vikana ma ka hehagateri, ka vi: “Na tarana ta kani tarahua o karena o Kise? I hega, o Saulo ki poropete vari nogana?”

¹²Ma ta na mane i ngekana ki hagate, ki vi: “Na ani getera na poropete ka hega? Mu girarara vari o vaemata?” Tahema ki hagenega na tamasinga, i vi: ‘I hega, o Saulo ki poropete vari nogana?’

¹³Matena o Saulo ki mâ ma ki ngere hato manga na poropete, ngaia ki tagere tanga na bea ni vogasiha igê na hungana.

¹⁴O mona o Saulo ki bâsirerua ngaia ma na kariana ma ki hagatererua, ki vi: “I he kanimuru gâga igê?” O Saulo ki arami, ki vi: “Igamirua kamuru garira na tonki. Suria muru pe tarahura, tahema igamirua kamuru râ kamuru hagatea o Samuele renira.”

¹⁵O mona o Saulo ki hagatea, ki vi: “Na ta kani visia tangagamurua?”

¹⁶O Saulo ki arami, ki vi: “Ngaia ki hagarongogamirua, vi na tonki ka bani tarahura.” Ma o Saulo ki pe hagarongoa rârâ o mona renia na tamasinga iana o Samuele, vi ngaia o Saulo ki maneraha.

¹⁷O Samuele ki unihakura na enoni tanga na hekarigiana igê na agua apuna iana na Araha i Misipa.

¹⁸Ngaia ki vi tangara, ki vi: “Na Araha God iata na Isiraelita ki vi vikê. Inê kê bani bêngenigamu hura tenia i Esipito ma kê bani hagatahigamu tenigi na ara ni bagabevoani ma na mamasiaganiha iami.

¹⁹Ma i ngekê igamu kamu usiteniê, suria mu nungiê, kê vategamu renia na maneraha. I koro ma! Igamu maremi! Hoita, mu ura harahara i maana na Araha, na varo ninuni getera ma na hagosi ninuni getera.”

²⁰Hemuri o Samuele ki unia me na ara ni varo ninuni.

²¹Na Araha ki atea na varo ninuni iana o Benamino. Na Araha ki atea na hagosi ninuni iana o Matiri. Hemuri na ara ni mane igê na hagosi ninuni iana o Matiri ka ura me. Na Araha ki atea o Saulo karena o Kise. Ngaira ka gari ma ka gari makira renia.

²²Tahema ngaira ka hagatea na Araha, ka vi: “Ta na mane i ngekana ki hita râ mênga?” Na Araha ki arami, ki vi: “O Saulo ngekana, i ahi i berarogani na toraha.”

²³Vikê ngaira ka tango râ ma ka torea hura o Saulo i maata na enoni. Ngaira ka bâsira vi na enoni hato ka borahu ka tariha i gaparana o Saulo.

²⁴O Samuele ki vi tangara na enoni, ki vi: “Ngaia nga ka na ani na Araha ki atea! I mareha rârâ na hitangika vige maratorana.” Na enoni hato ka ngere, ka vi: “Na maneraha ke mêri arihu!”

²⁵O Samuele ki ramatenigi tangara na enoni na ramoha ma na tagaraha iana na maneraha. Ngaia ki segegi so igê na buka ma hemuri ki naka na buka igê na agua apuna i maana na Araha. Hemuri ngaia ki kasira aporo na enoni tanga i pasita.

²⁶O Saulo ki aporo nogana i pasina i Gibea. God ki hagatakusira tani na mane ramo ka takua.

²⁷Ma tani na eraga ninuni ka vi: “Manga i he na mane ngekana ki girara vi tamanigia?” Ngaira ka ruhia o Saulo ma ka pe mahatangenigi rârâ tani na marâ tanga.