Read Kahua 1 SAMUELE 12 Bible Online

1 SAMUELE 12 - Kahua bible

1 SAMUELE 12

¹Hoita, O Samuele ki tamasi tangara na Isiraelita, ki vi: “Inê kê bani katoa na tarana mu nungiê renia. Inê kê bani vategamu na maneraha, hanana i marungigamu.

²I ngekê igamu kamu nahunia na maneraha i bêngenigamu. Tangê inê, inê kê merahaga ma kê gohogohoraga. O kareku ka oga henigamu. Inê kê bani bêngenigamu me matena gê karekare mataro me i ngekê.

³Inê ikê. Manga gê katoa ta na tarana i pe koro, hoi, mu tuguriê i ngekê i maana na Araha ma i maana na maneraha i atea. I hega, inê kê hanagoa vari na puruka iana ta na enoni? Se na tonki vari? I hega, inê kê hagabekasia vari ta na enoni se gê hagamamasiaga? I hega, inê kê aganaria vari na vatevate tenia ta na enoni? Manga inê ma kê katoa na hitangini na tarani ngegana, hoi, inê kê barubaru aporo.”

⁴Na enoni ka arami, ka vi: “Mareha. Igo ko pe hagabekasigami se vigu hagamamasiagagami, se vigu torea ta na marâ tenia na anima na enoni.

⁵Vikê o Samuele ki vi: “Vikana, na Araha ma na maneraha, i bani atea, ngairerua karu hagatanga monari i ngekê, vi igamu kamu girara, vi inê kê pe erasia rârâ ta na marâ.” Na enoni ka vi: “I monari, na Araha ki giraragami, vigami tamasi vikana.”

⁶O Samuele ki tamasi nikâ, ki vi: “Na Araha nga kani atererua o Moise mo Aroni ma ki bêngenira hura na êvarimi tenia i Esipito.

⁷Hoi, mu ura ma! Inê be tugurigamu i maana na Araha. Inê be hagatakusigamu renigi na mena hato na Araha ki bani katogi, ki hagatahigamu, igamu ma na êvarimi, renigi.

⁸Matena o Jakobo ma na ruma iana ka râ tanga i Esipito ma na ai ni Esipito ka hagamamasiagara, na êvarimi ka avarasia na Araha. Na Araha ki hagatorangenirerua o Moise mo Aroni, karu bêngenira hura tenia i Esipito, hanana ga ogasia na agua ikê.

⁹Ma na enoni ka pe botage renia na Araha God iata. Tahema na Araha ki nakara na Pilisitina ma na maneraha i Moaba ma o Sisera, i bêngenira na mane ni me i hinua i Hasore, ka meraheariha na êvarimi ma ka teharira.

¹⁰Hemuri ngaira ka avarasia na Araha, ka vi: ‘Igami kami tasi, suria mi murisegego, Araha ma kami vogasigi na nunuterua o Bala ma ka Asitareta. Gu hagatahigami tenira na merongamami ma kami page rahesigo igo.’

¹¹Hoi, na Araha ki hagatorangenia o Giteone, hemuri o Baraka, hemuri o Jepeta ma hemuri tatarê inê. Na ara ni hitangimami ki bani hagatahigamu tenira na merongami, ma igamu kamu oga purunguni.

¹²Ma na matena mu bâsia o Nagasi na maneraha iata na Amonita i sugi taharigamu, igamu kamu usitenia na Araha, vige marungigamu. Igamu kamu nungiê, kamu vi, ‘Igami kami obania na maneraha, hanana vige marungigami.’

¹³Hoita, na maneraha mu atea kani ikê. Igamu nga kanimu nungia. I ngekê na Araha ki vategamu renia.

¹⁴Na ara ni marâ hato ka page tavoraha bâkoro tangagamu, manga vi igamu ma kamu hagahigasia na Araha God iami, kamu tagara tanga, kamu têtê viteana ma kamu marupegi na ramata iana, manga vi igamu, igamu ma na maneraha iami, ma kamu tototo suria.

¹⁵Ma ki manga mu pe tê viteana na Araha ma kamu pe marupegi na ramata iana, ngaia ki page merongasigamu, igamu ma na maneraha iami.

¹⁶Hoita, mu rêra nga vikana. Igamu kamu page bâsia na mena raha, na Araha ki sugi katoa.

¹⁷Na arito ru, iê? Inê be nungia na Araha ke kasigi me na gugusuhia ma na rangi. Matena i voravora me na tarana ngekana, igamu kamu kahu tahetara, vi igamu kamu katoa na tarana i erataga ngavê i maana na Araha, suria mu nungia na maneraha tenia.”

¹⁸Vikê o Samuele ki nunginungi, ma igê nga na tangiana ngekana na Araha ki kasigi me na gugusuhia ma na rangi. Na enoni hato ka magutenirerua na Araha ma o Samuele.

¹⁹Ngaira ka nungia o Samuele, ka vi: “Gu nungia na Araha God iamu tangagami, hanana siana kami meme. I ngekê igami kami kahu tahetara, vi igami kami hagatonganigi kê nikâ na tasi hato iamami, suria mi nungia na maneraha tenia na Araha.”

²⁰O Samuele ki arami, ki vi: “Siana kamu magu. Naka ma igamu kamu tasi raha vikana, siana kamu murisigea na Araha. Mu tototo suria nga hete igê na mêrihami hagenani.

²¹Siana kamu tari surira na ataro. Ngaira ki asa vige tamanigamu se vige hagatahigamu, suria ngaira ka pe gâga.

²²Na Araha ki bani tohe, vi ngaia ki asa vige page panigamu, suria ngaia ki bani kato, vi katogamu kamu voravora re na kariana marena.

²³Tangê inê, inê be ama ni nunginungi nga tangagamu. Manga i mareha, inê kê haritohea na Araha. Inê be ama ni hagesurigamu nga renigi na tarani ga koro ma ka oto, i tuguhigamu vigamu katogi.

²⁴Mu têtê viteana nga na Araha, ma kamu tototo suria igê na mêrihami hagenani. Mu takusia tare, vi hagehita ngaia ki bani tamanigamu me.

²⁵Ma ki manga igamu ma kamu ama ni haritohea nga, igamu ma na maneraha iami kamu page mutemute hato”