Read Kahua 1 SAMUELE 13 Bible Online

1 SAMUELE 13 - Kahua bible

1 SAMUELE 13

¹O Saulo ki hagakoro obana God surirerua ma na harisi hagenago gi rua iana matena i maneraha.

²O Saulo ki atera na rehagaro gi oru na mane ni me i berarogata na Isiraelita. Na rehagaro gi rua ka oga henia i Mikimasi ma igê na hungani i Betele. Na rehagaro gi tage ka oga henia o Jonatane o karena i Gibea igê na apanena iana na varo ninuni iana o Benamino. Ma na ani getera na mane ni me o Saulo ki nakara vê ka aporo i pasita.

³O Jonatane ki nahuia ki me na mane ni me na Pilisitina i marungia i Gibea. Na Pilisitina hato getera ka rongo tarohana. Hemuri o Saulo ki hagatorangenira na mane tora tamasinga ka uhigi na ahuri suria na agua hagenani, hanana ga unira haku me na Isiraelita tanga na hearihatana.

⁴Na Isiraelita hato ka rongoa nogata, vi o Saulo ki nahuia ki me na mane ni me na Pilisitina, i marungia i Gibea. Ngaira ka rongo nikâ, vi na Pilisitina ka merongasira ngavê. Tahema na me ka hakunia o Saulo i Gilegale.

⁵Na Pilisitina ka haku, hanana viga meraheariha na Isiraelita. Ngaira ka nahunigi na 30,000 na kati ni me, na 6,000 na mane ni me igê na hosi, ma na mane ni me ga tavo uga ka rako mangagi na one i one. Ngaira ka râ i Mikimasi kerekê i Betavene, ma ka tênga igê.

⁶Hoi, ngaira ka taharira ramo na Isiraelita. Na Isiraelita ka vato renira. Tani na hitangita ka ahi surigi na vaba, na tahataha se surigi na bagahê raha, surigi na kokoro ma na vekaru mamata.

⁷Tani na hitangita ka tarêhia na ve i Jotano tanga na apanena iana o Gata ma i Gileata. O Saulo ki gâga mênga i Gilegale ma na me ga oga henia ka bubununuga ngavê.

⁸Ngaia ki oga naasia o Samuele surigi na tangiani gi pi, manga hanana o Samuele i bani bonasia renia. Suria o Samuele ki hagarihu vige râ me i Gilegale, tahema na me ka râ pania o Saulo.

⁹Vikê o Saulo ki vi tangara, ki vi: “Mu migirâ me na ganiani be susu renigi, ma nikâ na ngêra na vogasiha tanga ga ngê haku.” Ngaia ki susu.

¹⁰Na matena i susu hato, o Samuele ki kahu ata me. O Saulo ki ura râ vurusia ma ki vi: “I koro ko râ me.”

¹¹O Samuele ki hagatea, ki vi: “Na ta ko katoa?” O Saulo ki arami, ki vi: “Na me iaku ka râ paniê. Ma igo ko pe bani ata me igê na matena go surua. Nikâ na Pilisitina ka haku i Mikimasi.

¹²Inê kê takusia vi ngaira ka sugi tahariê ikê i Gilegale, matena inê ki mamênga vi ve vogasia na Araha, hanana ge tamaniê. Tahema inê kê takusia, vi i tuguhiê, vigê vogasia na Araha.”

¹³O Samuele ki arami, ki vi: “Go beka kanigo kato vikana? Igo ko aharêngia na ramata, na Araha God iamu ki bani naka tangago. Manga go têtê viteana, ngaia ki page katogamu, igo ma na raraha iamu, kamu heheuri kamu maneraha tare ki bê ki arâ.

¹⁴Ma i ngekê na arahanga iamu ki page hato, suria go haritohea na Araha, tahema ngaia ki atea noga na mane i obania, hanana i kasia ki marungira na kariana ngaia na Araha.”

¹⁵O Samuele ki pania i Gilegale ma ki râ. Na enoni hato getera ka râ suria o Saulo, matena i râ ki haku henira na mane ni me iana. Ngaira ka pania i Gilegale tanga i Gibea igê na apanena iana o Benamino. O Saulo ki tomanira na mane ni me iana. Ngaira ka vora na ararina na tangarê ge ono.

¹⁶O Saulo mo Jonatane o karena ma na mane ni me iaterua ka tênga i Geba igê na apanena iana o Benamino. Na Pilisitina ka tênga i Mikimasi.

¹⁷Na mane ni me na Pilisitina ka katogi na apanini me gi oru. Ma tenia na tênga na ara ni hitangini na apanini me ki ara ki taharigi na hinua. Tani ka râ tanga i Opera igê na apanena i Suale.

¹⁸Tani ka râ tanga i Bete Gorone. Tani ka râ tanga na hungana i vato tanga na maruguna i Seboimi ma tanga na bagamasusu raha.

¹⁹I Isiraele ka pe oga igê na mane ga girara ga tagara renigi na aiani, suria na Pilisitina ka ura pusira na Isiraelita, hanana vige tagarahigi na tatapa borahu ma na ora.

²⁰Na Isiraelita ka ama ni arâ nga i pasita na Pilisitina ka toregi na marâ na aiani ga migitagara i mu: na akesi, na gira, na aiani ni hikirunga ma na marâ vigana.

²¹Na Pilisitina ka obania na maana gi tage na kere haga tanga ga ratarata na akesi ma tanga ga hagâgasigi na maani na aiani na ora, ma na maana gi rua na haga tanga ga ratagi re na aiani ni hikirunga ma na gira.

²²Matena i haganega na hearihatana na mane ni me na Isiraelita ka pe nahunigi na aiani na tatapa borahu ma na ora, nga noga ma o Saulo mo Jonatane o karena.

²³Na Pilisitina ka hagatorangenia ta na apanini me, hanana ga anumasia na teha i Mikimasi.