Read Kahua 1 SAMUELE 14 Bible Online

1 SAMUELE 14 - Kahua bible

1 SAMUELE 14

¹Ta na tangiana o Jonatane karena o Saulo ki vi tanga na kariana, i tora na tangaruha iana, ki vi: “Garu aharêvoro tanga na tênga iata na Pilisitina.” O Jonatane ki pe bani hagarongoa o Saulo vaemana renia.

²O Saulo ki tênga i ruguhana na apinige ni ngauha i Migirone, hagarangia i Gibea. Na ararina na tangarê ge ono na mane ni me ka oga henia.

³Na mane ni vogasiha i haga na anga ni girarasiha, ngaia ki no Agia karena o Agitube o goana o Ikabote. O Agitube ki no karena o Pinegasi ma o vesina o Eli na mane ni vogasiha iana na Araha i Silo. Na mane ni me ka pe girara vi o Jonatane ki bani râ.

⁴Na raoha iana o Jonatane tanga na tênga iata na Pilisitina, ngaia ki aharêvoro nga igê na teha i Mikimasi. Na teha ki tonga igê na boteni na roani i na apanenaheri. Tani ka hêtana renia vi Bosesi ma tani Sene.

⁵Ta na hitangiterua ki maatia i Mikimasi ma tani ki maatia i Geba.

⁶O Jonatane ki vi tanga na kariana, ki vi: “Garu aharêvoro tanga na tênga iata na ahuroto na Pilisitina. Vari na Araha ki page tamanigerua. Manga vi tamanigerua, ngaia ki girara i katogerua karu tehateha, naka ma igerua getegerua ma.”

⁷Na kariana ki arami, ki vi: “Na ta ko katoa, igo ma. Inê kê arâ surigo.”

⁸O Jonatane ki vi: “Hoita! Matena garu aharêvoro, garu katora na Pilisitina ka bâsigerua.

⁹Manga vi ngaira ma ka vi tangagerua vigaru gâga karira ka arâ me, hoi, garu soso nga.

¹⁰Ma ki manga viga vi tangagerua, vigaru arâ tangara, hoi, garu arâ, suria ngaia ki na girarana, vi na Araha ki page katogerua, karu teharira.”

¹¹Vikê ngairerua karu hagabângenirerua mareterua tangara na Pilisitina. Na Pilisitina ka vi: “Bâ ikana! Tani na Isiraelita ka hura kê me igê na kiru ga ahi igê.”

¹²Ngaira ka ngere ka unirerua o Jonatane ma na kariana, ka vi: “Muru akê me ikê! Ta na rongoha tangagamurua!” O Jonatane ki vi tanga na kariana, ki vi: “Gu râ me suriê. Na Araha ki katora na Isiraelita ka teharira.”

¹³O Jonatane ki agari tagere igê na teha. Na kariana ki agari tagere suria. O Jonatane ki taharira na Pilisitina ma ki nahu sikirenira ma na kariana ki nahu hunira.

¹⁴Igê na hearihatana hagenago ngekê o Jonatane ma na kariana karu nahuira ka me na ararina na tangahuru gi rua na mane ni me igê so ma na kere agua gi tage na ararina na 30 mita hagarabo ma hagarabo.

¹⁵Na Pilisitina hato ga oga i bemu ka magu. Na mane ni me igê na tênga iata ma na ani ga taharigi rârâ na hinua, ka bubununuga. Na ano ki angingi. Ngaira ka anumanuma ga haga ni me renia.

¹⁶Na mane ni me iana o Saulo ga anumasia i Gibea igê na apanena iana o Benamino, ngaira ka bâsira na Pilisitina ga tugupu ma ka heasiasi.

¹⁷Vikê o Saulo ki vi tangara na me iana, ki vi: “Mu tomanira na mane ni me, hanana mu tarahua, vi o ti ki mareha.” Ngaira ka toma ma ka tarahua vi o Jonatane ma na kariana i tora na tangaruha iana, karu mareha.

¹⁸O Saulo ki vi tanga o Agia na mane ni vogasiha, ki vi: “Torea me na anga ni girarasiha. Igê nga na matena ngekana o Agia ki torea na anga ni girarasiha i maata na Isiraelita.

¹⁹Matena o Saulo ki tamasi tanga na mane ni vogasiha, na Pilisitina igê na tênga ka ama ni tugupu nga ka heasiasi ngavê. Vikê o Saulo ki vi tanga o Agia, ki vi: “I mareha na matora, hanana vigu gari takoha tenia na Araha.”

²⁰Hoi, o Saulo ma na mane ni me iana ka tavo uga hura tanga ga meraheariha na Pilisitina, ga heariha so mareta, suria ga tugupu ngavê.

²¹Tani na Isiraelita ga bani pane henira na Pilisitina ma ka râ henira tanga na tênga iata, ngaira ka urisi parongata ma ka pane aporo henirerua o Saulo ma o Jonatane.

²²Na ani ga bani ahi igê na hungani i Eparaimi, ka rongo, vi na Pilisitina ka gava. Vikê ngaira nikâ ka banu igê na hearihatana ma ka taharira na Pilisitina.

²³Ngaira ka tarigenira rârâ ma ka tariha i Betavene. Na Araha ki hagatahira na Isiraelita igê nga na tangiana ngekana.

²⁴Igê na tangiana ngekana na Isiraelita ka marumarusiga, suria ga magê, suria o Saulo ki tohe pusira, ki vi: “I page era ngavê tanga na anima na enoni i ngêngê i ngekê i nago tarana gê marabarura na merongaku.” Tahema ki mareha rârâ ta na enoni vige ngê suria na tangiana ngekana.

²⁵Na me hato ka ata igê na agua i bemuga ma ka tarahugi na pirui i na ara ni agua igê.

²⁶Na apinige ka vunu renigi na pirui, ma ki mareha rârâ tani vige ngêgi, suria ngaira ka magutenia ngavê na tohenga iana o Saulo pusira.

²⁷Ma o Jonatane ki pe bani rongo vi o vaemana ki bani hagamakukura na enoni renia na tohenga. Tahema ngaia ki rupugenia râ na vato iana igê na robona na pirui ma ki ngêa. Ki parama ma ki mêri aporo na apena.

²⁸Ta na hitangita na mane ni me iana ki vi tanga, ki vi: “Igami hato kami marumarusiga renia na magêha, ma o vaemamu ki hagamakukugami, ki tohe, ki vi, ‘I era ngavê tanga na anima na enoni, i ngêngê i ngekê.’

²⁹O Jonatane ki arami, ki vi: “Na tarana o vaemaku ki katoa, ki era ngavê tangagia na Isiraelita hato. Bâ, inê ki mêri aporo na apeku, suria gê ngêa na pirui.

³⁰Manga vi na mane ni me ma ke ngê na ngêra ga henahuraugi tenira na merongaka, matena ga teharira, vikê ke koro teha. Vikê ngaira ke nahuira ke me rako nga na Pilisitina i ngekê!”

³¹Igê nga na tangiana ngekana na Isiraelita ka teharira na Pilisitina ma ka tarigenira tenia i Mikimasi rârâ ma ka tariha i Aialone. I na matena ngekana na Isiraelita ka marumarusiga ngavê renia na magêha.

³²Tahema ngaira ka gahasigi na marâ ga henahuraugi tenira na merongata. Ngaira ka têra na sipi, na goti ma na puruka ma ka nahuira vê i ngegana ma ka ngaugi na ganiani gagapugaga.

³³O Saulo ki rongo, vi na me iana ka haritohea na Araha, suria ga ngêgi na ganiani gagapugaga. O Saulo ki tamasi ramo, ki vi: “Igamu ka na ani mu murisigea na Araha. Mu purisia me ikê na bagahê raha!”

³⁴Hemuri ngaia ki haribona nikâ, ki vi: “Mu râhira na me ma kamu vi tangara, ke merarâ me ikê na puruka ma na sipi iata. Ngaira ka nanahuira ma ka ngaura nga ikê akê, i era ma ka haritohea na Araha, suria i apu vige ngêgi na ganiani gagapugaga.” Vikê igê na manurahitana ngekana ngaira hato ka torera me na puruka na goti ma na sipi ma ka nahuira i ngekana nga.

³⁵O Saulo ki tagarahia na bea ni vogasiha tanga na Araha, na ani i hagâkani renia.

³⁶O Saulo ki vi tangara na me iana, ki vi: “Nika, ge vato igê na bungiana ngekê, hanana ge taharira na Pilisitina ma ke rurugu tenira ki arârâ ki tangitangi ma ka mutera hato.” Na me iana ka arami, ka vi: “Hoi, na ta go katoa, igo ma.” Ma na mane ni vogasiha ki vi: “Ge hagatea i nago God.”

³⁷Vikê o Saulo ki hagatea God, ki vi: “I koro ma vigê taharira na Pilisitina se mareha? Igo ko page katogami vari kami tehateha se mareha?” Ma God ki pe arami rârâ igê na tangiana ngekana.

³⁸Hemuri o Saulo ki vi tangara na enoni raha, ki vi: “Râ me, hanana ge girara, vi o ti kani katoa ta na marâ i era.

³⁹Inê kê tohe renia na Araha mamauri, i katora na Isiraelita ka teha, vi na ani i tasitasi vikana, ki page meme nga, naka ma vi ngaia ki no Jonatane o kareku vari.” Ngaira hato ka pe arami rârâ.

⁴⁰Hemuri o Saulo ki vi tangara, ki vi: “Igamu hato mu ura râ ikana. O Jonatane menê kamuru rêra so ikê.” Ngaira ka arami, ka vi: “Hoi, na ta go katoa, igo ma!”

⁴¹O Saulo ki vi tanga na Araha God iata na Isiraelita, ki vi: “Araha, tanu hega ko pe aramiê rârâ i na rikini? Araha God iata na Isiraelita gu aramiê igê na hê apuna ni girarasiha. Manga vi na hitangimirua o Jonatane se inê ma ki tasi, hoi, go arami igê na hê ni girarasiha na Urimi. Ma ki manga na enoni getera, hoi gu arami igê na hê ni girarasiha na Tumimi.” Na aramiha ki takererua o Jonatane mo Saulo, ma na enoni ki mareha.

⁴²Hemuri o Saulo ki vi: “Mu bâbâ i beramogamirua o Jonatane o kareku menê.” Na aramiha ki takea o Jonatane.

⁴³Vikê o Saulo ki hagatea o Jonatane, ki vi: “Na ta ko erasia? O Jonatane ki arami, ki vi: “Inê kê ngê râ sisite na pirui. Inê kani ikê! Gê nanê ni mera.”

⁴⁴O Saulo ki vi tanga, ki vi: “God ke nahuiê be meme, manga vigo pe meme!”

⁴⁵Ma na mane ni me ka hagatea o Saulo, ka vi: “I hega, i page meme vari o Jonatane, i bani katora na Isiraelita ka teha? Mareha vê! Igami kami tohe renia na Araha mamauri, vi ngaia ki asa hagetage vige page me, naka ma na kere ani gi tage na varehuna i bêna! Na tarana i katoa i ngekê, ki katoa suria God ki tamania.” Vikê na mane ni me ka hagatahia o Jonatane tenia na mera.

⁴⁶Hemuri o Saulo ki vi tangara na mane ni me iana ga tarigenira na Pilisitina, ka nakara vê, ma na Pilisitina ka aporo tanga na apanena iata mareta.

⁴⁷I murina o Saulo i vora re na maneraha i Isiraele, ngaia ki meraheariha na merongana hato tenigi na agua hato getigi: na Moabita, na Amonita, na Etomita, na maneraha ni Soba, ma na Pilisitina. I na ara ni matena i meraheariha igê ngaia ki teharira tare.

⁴⁸Ngaia ki ramo ngavê igê na hearihatana, ma ki teharira nikâ na Amalekita. Ngaia ki hagatahira na Isiraelita tenira na merongata hato, ga taharira.

⁴⁹O karena o Saulo ka no Jonatane, o Isivi mo Malakisua. Ngaia ki aparerua ka karena gi rua. Ka karena hagenago kani ka Meraba ma ka karena hemuri kani ka Mikala.

⁵⁰Kaniana ka Aginoama, ka karena o Agimasi. Na mane i bêngenira na mane ni me iana ka no Abenere o goana mêri, o karena o Nere o mona.

⁵¹O Kise vaemana o Saulo ma o Nere o vaemana o Abenere ngairerua ka no karena o Abiele.

⁵²Igê na ogaha hagenani iana o Saulo ki meraheariha ramo tare nga na Pilisitina. Ngaia ki atera na mane hato ga ramo ma ka pe magu, ka voravora re na mane ni me iana.