Read Kahua 1 SAMUELE 15 Bible Online

1 SAMUELE 15 - Kahua bible

1 SAMUELE 15

¹O Samuele ki vi tanga o Saulo, ki vi: “Inênga ka na ani na Araha ki hagatorangeniê, hanana gê monego, ko voravora re na maneraha iata na Isiraelita. Hoi, gu karinga na tamasinga iana na Araha raramohaga hunia.

²Ngaia ki page hagaitangira na Amalekita, suria na êvarita ka merongasira na Isiraelita, matena ga râ me tenia i Esipito.

³Gu râ ku taharira na Amalekita ma ku ruhuruhugi ngavê na ara ni marâ hato iata. Siana ki hitahita râ ta na marâ. Gu mutera ngavê na enoni hato: na mane, na gete, na kare gari ma nikâ na puruka, na sipi, na kamelo ma na tonki.”

⁴O Saulo ki unira haku i Teleme na mane ni me iana ma ki tomanira. Na 200,000 na mane ni me tenia i Isiraele ma na 10,000 tenia i Juta.

⁵Hemuri ngaia ma na me iana ka râ i hinua raha iata na Amalekita. Ngaia ki ahi hekarira igê na marave.

⁶Ngaia ki kasi tamasinga tangara na Kenita, ki vi: “Mu panira rêrê na Amalekita. Siana kamu torarira kamu gâga, i era ma kê mutegamu henira, suria na êvarimi ka tamanira na Isiraelita, matena ga râ me tenia i Esipito.” Ma ngaira ka râ.

⁷O Saulo ki teharira na Amalekita ma ki meraheariha haganega tenia i Gavila râra ma ki tariha i Suru kerekê i Esipito.

⁸Ngaia ki henahuraua hemêri o Agaga na maneraha iata na Amalekita ma ki mutera na enoni hato.

⁹O Saulo ma na mane ni me iana ka pe nahuia o Agaga ma ka pe nahuira nikâ na ani koro ngavê na sipi, na goti, na puruka, na kareta na puruka ma na kareta na sipi, ma ka pe ruhuruhugi na ani mavê na marâ ga obanigi. Ngaira ka ruhuruhugi ma hete na ani purua na marâ ma na ani ga pe obanigi.

¹⁰Na Araha ki vi tanga o Samuele, ki vi:

¹¹“Inê kê hetaki, suria gê kasia o Saulo ki maneraha. Ngaia ki murisigeê ma ki pe râ surigi na ramata iaku.” O Samuele ki mangariaga ma igê na bungiana hagenani ngaia ki uhungia vi hagamanava obana God.

¹²Igê na mahogotana i tangi me, ngaia ki râ ki garia o Saulo. Ngaia ki rongoa, vi o Saulo ki bani râ i hinua i Karamele, hanana i hagêrasia igê na hê na girarana marena, ma hemuri ki râ nga tanga i Gilegale.

¹³O Samuele ki tarahua o Saulo. O Saulo ki mêri renia, ki vi: “Na Araha ke korokoro tangago o Samuele. Na ara ni marâ ki koro ma. Inê kê katogi hato na marâ, i bonasiê na Araha renigi.”

¹⁴O Samuele ki hagatea, ki vi: “Tanu hega inê kê rongora na puruka ma na sipi ga angiangi?”

¹⁵O Saulo ki arami, ki vi: “Na me iaku ka torera tenira na Amalekita. Ngaira ka pe nahuira na ani koro ngavê na sipi ma na puruka, hanana vige vogasiha na Araha God iamu renira. Na ani getera hato igami kami mutera ngavê.”

¹⁶O Samuele ki vi: “Muni vê! Inê be hagarongogo renigi na marâ, na Araha i visigi tangê i na bungi. O Saulo ki vi: “Gu visia me.”

¹⁷O Samuele ki arami, ki vi: “Henaka go takusia, vi igo ka na enoni purua, ma igo ka na maneraha iata na varo ninuni iana o Isiraele. Na Araha ki monego ko maneraha i Isiraele.

¹⁸Ngaia kani bonasigo ko râ ko mutera na eragani nuni na Amalekita ngegana. Ngaia ki bonasigo, hanana vigo meraheariha mataro me ko mutera ngaira hato.

¹⁹Tanu hega kanigo pe tê viteana? Tanu hega kanigo pe ruhuruhugi na marâ go henahuraugi? Tanu hega go katoa na tarana i hagaera obana na Araha?”

²⁰O Saulo ki arami, ki vi: “Ma inê kê tê viteana na Araha. Inê kê katoa na marâ i bonasiê renia. Inê kê meaporo o Agaga na maneraha ma kê mutera na Amalekita hato.

²¹Ma ngaira hete na me iaku kaniga pe nahuira na ani koro ngavê na sipi ma na puruka, ga henahuraura. Ngaira ka merarâ me ma i Gilegale, ka vogasia igê na Araha God iamu renira.”

²²O Samuele ki vi: “Na ta kani obania ngavê na Araha: na tê viteana se na votovoto ma na vogasiha? Na tê viteana ki raha teharia na vogasiana tanga renira na ani koro ngavê na sipi.

²³Na guguruganiha tanga ki erataga ngavê manga na matuha, ma na paroparoha ki erataga ngavê manga na vogasiha ni ataro. Suria igo ko usitenia na ramata iana na Araha, tahema ngaia ki usitenigo vigu maneraha.”

²⁴O Saulo ki arami, ki vi: “I monari. Inê kê pe râ surigi na ramata iana na Araha ma na hagesuringa iamu tangê. Inê kê magutenira na me iaku. Tahema inê kê aganaria na obaniha iata.

²⁵Hoi, inê kê nungigo nga, hanana gu bonotenia na tasi iaku ma ko aporo heniê tanga i Gilegale, hanana ve rahesia igê na Araha.”

²⁶O Samuele ki arami, ki vi: “I asa be râ henigo. Igo ko usitenia na ramata iana na Araha, ma ngaia ki usitenigo vigu maneraha i Isiraele.”

²⁷O Samuele ki kari arigu vi arâ, ma o Saulo ki ranguia na aruhana o Samuele ma ki tarisia.

²⁸O Samuele ki vi tanga, ki vi: “Bâ, na Araha ki tarisia râ na arahanga i Isiraele tenigo i ngekê ma ki vatea renia ta na mane, i koro teharigo igo.

²⁹God raramohaga hunia iata na Isiraelita ki asa vige hagaparu, se vige takotako rugu. Ngaia ki pe maratorana na enoni. Ngaia ki asa vige urisi parongana.”

³⁰O Saulo ki arami, ki vi: “Inê kê tasi. Henaka, gu hagahigasiê i maata na enoni raha iata na kariaku ma i maata na Isiraelita hato. Gu râ me heniê, hanana gê rahesia na Araha God iamu.”

³¹Hoita, o Samuele ki râ henia tanga i Gilegale ma o Saulo ki rahesia igê na Araha.

³²O Samuele ki haribona, ki vi: “Merâ me ikê o Agaga na maneraha!” O Agaga ki râ me. Ngaia ki tata ma ki magu. Ngaia ki tako i obana, ki vi: “E, ti ki meme?”

³³O Samuele ki vi tanga, ki vi: “Suria na tatapa borahu iamu ki hagamagarira rako kenani kare, tahema kenamu nogamu ki page magari.” Hoi, o Samuele ki reteretea o Agaga i maana na bea ni vogasiha i Gilegale.

³⁴Hemuri o Samuele ki râ i Rama ma o Saulo na maneraha ki aporo i pasina i Gibea.

³⁵O Samuele ki kahu pe bâsia rârâ na maneraha, mataro me ki me. Ma ngaia ki angisia. Na Araha ki tako rugu, suria i kasia o Saulo ki maneraha i Isiraele.