Read Kahua 1 SAMUELE 16 Bible Online

1 SAMUELE 16 - Kahua bible

1 SAMUELE 16

¹Na Araha ki hagatea o Samuele, ki vi: “Go angisia taraha o Saulo? Inê kê usitenia, vige maneraha i Isiraele. Hoi, gu merâ na oile ni olive tanga i Beteleheme, i pasina ta na mane ga hêtana vi o Jese, suria inê kê bani atea na hitangita o karena, hanana vi maneraha.”

²O Samuele ki hagate, ki vi: “Manga i he kê girara vigê katokato vikana? Manga i rongorongo o Saulo, ngaia ki page nahuiê kê meme!” Na Araha ki arami, ki vi: “Go merâ na karena na puruka ma ko vivi, vi igo ko arâ i ngekana, hanana vigo vogasia igê na Araha renia.

³Go unia o Jese tanga na vogasiha, ma inê kê page hagagirarago renia, vi na ta kanigo page katoa. Igo ko page monea ke maneraha na mane gê page visia tangago.”

⁴O Samuele ki râ surigi na tamasinga iana na Araha ma ki râ i Beteleheme. Na enoni raha i hinua i Beteleheme ka râ vurusia. Ngaira ka anumanuma ma ka hagatea, ka vi: “Mane ni girarasiha, i hega, go râ me tanga na koroha?”

⁵O Samuele ki arami, ki vi: “Mako! Inê kê râ me, hanana vigê vogasia na Araha. Mu hagamatarotarogamu maremi ma kamu arâ me heniê.” Ngaia ki vi tangara nikâ o Jese ma o karena ka hagamatarotarora mareta ma ka râ me tanga na vogasiha.

⁶Matena ga ata me, o Samuele ki bâsia o Eliaba karena o Jese, ma ki tako ki vi: “Na mane i ura ikê i maana na Araha, ngaia nga ka na ani i atea.”

⁷Ma na Araha ki vi tanga, ki vi: “Siana ko bâbâ ma igê, vi ngaia ki borahu ma ki bâkoro na apena. Inê kê usitenia na mane ngekana, suria inê kê pe ateate purupuru mangara na enoni. Na enoni ka bâbâ igê na apena na enoni ma inê, inê kê bâbâ igê na aitangihana hete na enoni.”

⁸Hemuri o Jese ki unia me o Abinataba o karena ma ki merâ tanga o Samuele. O Samuele ki vi: “Mareha. Na ani nikâ ikê na Araha ki pe atea.”

⁹Hemuri o Jese ki merâ nogana o Sama. O Samuele ki vi: “Mareha, na ani nikâ ikê na Araha ki pe atea.”

¹⁰O Jese ki merarâ tatage vikana o karena gi pi tanga o Samuele. Ma tarema o Samuele ki vivi, ‘Mareha, na ani nikâ ikê na Araha ki pe atea.’

¹¹Ma hemuri ngaia ki hagatea o Jese, ki vi: “I hega, o karemu ka hato me?” O Jese ki arami, ki vi: “O kareku hagemuri ma kani gâga. Ma ngaia ki râ ki bâbâsurira na sipi.” O Samuele ki vi: “Vi tanga ke râ me ikê! Ge naasia noga ma ke kahu vogasi.”

¹²Vikê o Jese ki kasi tamasinga tanga, ki râ me. Ngaia ki na kere mane i bâkoro ma ki apekoro ma ki marava na maana. Na Araha ki vi tanga o Samuele, ki vi: “Ngaia ngekana. Monea!”

¹³O Samuele ki têa na oile ni olive ma ki monea o Tavite renia i maata o veogana. Ki parama na raramohana na Araha ma ki angaria o Tavite ma ki ngahisia haganega tenia na tangiana ngekana. Hemuri o Samuele ki aporo i Rama.

¹⁴Na raramohana na Araha ki hato pania o Saulo ma na Araha ki naka na ataro era ki erasia na aitangihana o Saulo.

¹⁵Na kariana ka vi tanga, ka vi: “Igami kami girara, vi God kani naka na ataro era ki erasia na aitangihamu.

¹⁶Manga go obania ma ko vi tangagami kami garia ta na mane i manisingenia ni tarugiha ni gita. Vikana, matena na ataro era ma ki angarigo, na mane ngekana ki girara i tarugia na gita ma igo ko page obâbakoro aporo.”

¹⁷O Saulo ki bonasira, ki vi: “Râ, kamu garia me na mane i manisingenia na tarugiha ni gita, ma kamu merâ me ikê.”

¹⁸Ta na hitangita na kariana o Saulo, ki vi: “O karena o Jese i hinua i Beteleheme ngaia ki manisingenia na tarugiha ni gita. Ngaia ki na mane haoru, i asa vige magu ma ki bâkoro na apena. Ngaia ki na mane ni me ramo ma na mane ni tamasinga. Na Araha ki ngahisia.”

¹⁹Vikê o Saulo ki hagatorangenira na mane tora tamasinga tanga o Jese, ka vi: “Jese, gu hagatorangenia me o karemu o Tavite, i bâbâsurira na sipi.”

²⁰O Jese ki hagatorangenia o Tavite tanga o Saulo henia na bêhâgana na goti ma henia na tonki, i rutangigi na bereti ma na anga na gavona na puruka ni vaini.

²¹O Tavite ki râ i pasina o Saulo ma ki haganega ki tagara tanga. O Saulo ki obakoro ngavê renia, ma ki kasia tanga i totora na tangaruha iana.

²²Hemuri o Saulo ki kasi tamasinga tanga o Jese, ki vi: “Inê kê obakoro renia o Tavite. Gu naka so, ke gâga ikê ke tagara tangê.”

²³Hoita, i na ara ni matena God ki naka na ataro era ki angaria o Saulo, o Tavite ki tavoa na gita iana ma ki tarugia. Na tarotaroha ngekê ki katoa na ataro era ki arâ pania o Saulo, ma o Saulo ki kahu apeapekoro aporo ma ki obâbakoro.