Read Kahua 1 SAMUELE 17 Bible Online

1 SAMUELE 17 - Kahua bible

1 SAMUELE 17

¹Na Pilisitina ka hagahakura na mane ni me iata i Soko ta na hinua i Juta. Ngaira ka hagarêra mareta tanga na hearihatana. Ngaira ka tênga i Epese Tamimi, i berarogaterua i Soko me Aseka.

²O Saulo ma na Isiraelita na mane ni me iana ka haku ma ka tênga igê na maruguna i Ela. I ngekana ngaira ka ura harahara igê hanana ga meraheariha na Pilisitina.

³Na Pilisitina ka ura harahara igê na hungana ma na Isiraelita i ta na hungana, ma na maruguna ki voasiraheri.

⁴Tenia na berarogata na Pilisitina ki ura me igê ta na mane ni me o Goliate ni hinua i Gata. Ngaia ki hagaramo tangara na Isiraelita. Na borahusigana ki na ararina na mita gi oru.

⁵Ngaia ki tuguni pusia na apena renia na kapa. Na higahigana na kapa ngekê ki na ararina na 50 kilo. Ngaia ki buhirenia i bêna na kapa higa nikâ.

⁶Ngaia ki nakagi nikâ na kapa pusirerua na êgana. Ngaia ki tareha na tatapa borahu iana.

⁷Na ora iana ki upupuga manga na rimana na mane. Na higahigana na aiani na arara igê na ora ki na ararina na kilo ge ono. Ta na mane ni me ki torea na bêata ma ki nanago tarana.

⁸O Goliate ki ura râ ma ki ngere ki hagaramo tangara na Isiraelita, ki vi: “Na ta mu râ me tanga ikê? Na hearihatana? Na Pilisitina kani inê. Ma igamu ka na kare rakuraku iana o Saulo. Mu kasia me na hitangimi ke meêheariha.

⁹Manga vi i ramoramo ma ki nahuiê kê meme, hoi, igami kami page voravora re na kare rakuraku iami. Ma ki manga inê ma kê ramo kê nahuia ngaia ki meme, hoi, igamu kamu page voravora re na kare rakuraku iamami.

¹⁰Mane ni me na Isiraelita, inê kê hagaramo tangagamu i ngekê nga. Mu kasia me ta na hitangimi ke meêheariha.”

¹¹Matena o Saulo ma na mane ni me iana ka rongo vikana, ngaira ka magu ngavê.

¹²O Tavite ki no karena o Jese ni Beteleheme i Eparata i Juta. O Jese ki aparara o karena ge varu. I na matena o Saulo ki maneraha, o Jese ki merahaga noga.

¹³O karena hagenago gi oru ka bani râ henia o Saulo tanga na hearihatana. O Eliaba ki vora hagenago, o Abinataba i hemuri, ma o Sama ki na oruta me.

¹⁴O Tavite ki no karena hagemuri. Matena o veogana gi oru ngegana ka oga henia o Saulo,

¹⁵o Tavite ki hinêrâ i Beteleheme, hanana i bâbâsurira igê na sipi iana o vaemana.

¹⁶I na ara ni mavoraro me manurahi o Goliate ki hagaramo tare tangara na Isiraelita surigi na tangiani tangahuru ge he.

¹⁷Ta na tangiana o Jese ki vi tanga o Tavite, ki vi: “Ikê na 30 kilo na koni ga hanunu ma na guani tangahuru gi tage na bereti. Gu migigaha rêrê tangara o veogamu igê na tênga.

¹⁸Ikê na tangahuru gi tage na bara na poponi na miliki. Gu vatea na mane i bêngenira na mane ni me renigi. Gu bâsira o veogamu manga vi ngaira ma ka gâga koro ma, se mareha. Go meaporo me ta na marâ i hagatanga monari renigo, vi igo ko bâsira ma ka oga bâkoro ma.

¹⁹O Saulo na maneraha ma o veogamu ma na mane ni me getera hato na Isiraelita, ga oga igê na maruguna i Ela, ka meraheariha na Pilisitina.

²⁰Hoi, ki tangi me mo Tavite ki bani rite hagahogo. Ngaia ki naka na bâsuriana ni sipi tanga na urusina. Ngaia ki tora na ngêra ma ki migirâ manga i vi o Jese. Ngaia ki ata râ igê na tênga igê na matena na Isiraelita ka hura ka ura harahara tanga na hearihatana. Ngaira ka ngere ni hearihatana.

²¹Na mane ni me iata na Pilisitina ma na me na Isiraelita ka ura harahara igê na atohata tanga na hearihatana ma ka ura hetanga.

²²O Tavite ki naka râ na ngêra henia na mane i bâsurigi na ngêra ma na toraha, ma ki tango râ igê na harahara ni hearihatana i pasita o veogana, ma ki hagatera, manga vi ngaira ka oga koro ma se mareha.

²³Matena i meratamasi, o Goliate ki ura me ma ki hagaramo tangara na Isiraelita manga i nago. O Tavite ki rongoa.

²⁴Matena na Isiraelita ka bâsia o Goliate, ngaira ka magu ma ka gava.

²⁵Ngaira ka hetamatamasi, ka vi: “Bâ, i râ me nikâ. Rongo, ngaia ki hagaramo nikâ. O Saulo na maneraha ki bani suru, vi vuria raha na mane i nahuia o Goliate ki meme. Na maneraha ki page hagauragingenia ka karena nikâ tanga, ma ki naka nikâ, vi na ahemata iana o vaemana ki hato vige vuri takesi.”

²⁶O Tavite ki hagatera na mane ga ura henia, ki vi: “I hega, ga page vuria vari na mane i nahunahu hunia na Pilisitina ngekana ma ki hatungia na makiha tenira na Isiraelita? Ti ka na ahuroto na Pilisitina, i girara i hagamakira na mane ni me iana God mamauri?”

²⁷Ngaira ka hagarongoa renia na vurina na mane i page nahuia ke meme o Goliate.

²⁸O Eliaba o veogana tatare o Tavite, ki rongoa o Tavite i meratamasi na mane ngegana. Ngaia ki mangariaga tanga o Tavite, ma ki vi: “Na ta go râ me tanga ikê? O ti kani bâsurira na sipi iamu, go panira vê igê na masusu? Igo ko hagaparu vego! Igo ko obania ma vigu râ me ku bâsia na hearihatana!”

²⁹O Tavite ki arami, ki vi: “Na ta kanigê erasia? I apu tangê vari vi ve hagate?”

³⁰Ngaia ki ahoro râ tanga ta na mane nikâ ma ki hagatea renia o Goliate. Ma na ara ni mane i hagatera vikana, ki hetagenani ma na aramiha iata.

³¹Tani na mane ga rongoa o Tavite i tamasi vikana, ngaira ka hagarongoa o Saulo. O Saulo ki unia me.

³²O Tavite ki vi tanga o Saulo, ki vi: “Maneraha, siana ke magutenia na Pilisitina ngekana. Be râ be meheariha.”

³³O Saulo ki aramia, ki vi: “Mareha! Igo ki pe ararigo, vigu meheariha. Na kere mane ma kanigo. Ma ngaia ngekana ki manisingenia na hearihatana!”

³⁴O Tavite ki arami, ki vi: “Maneraha, inê kê bâsurira na sipi iana o vaemaku. I na ara ni mateni na laione se na marâ vasiga ki garea ki torea na karena sipi,

³⁵inê kê tarigenia, kê taharia, hanana ki pania na karena sipi. Ma ki manga na laione se na marâ vigana ma ki tuguhiê me, inê kê rangurangu i manavana ma kê nahuia ki meme.

³⁶Inê kê bani nahuira me ka me na laione ma na marâ vigana. Ma inê kê page katoa nogana vikana na Pilisitina ahuroto ngekana, i hagamakira na mane ni me iana God mamauri.

³⁷Na Araha ki bani hagatahiê me tenira na laione ma na marâ vigana. Ngaia ki page hagatahiê nikâ tenia na Pilisitina ngekana.” O Saulo ki arami, ki vi: “Hoita, gu râ tanga. Na Araha ke ngahisigo.”

³⁸Ngaia ki vatea o Tavite renigi na marâ ni hearihatana iana marena. Ngaia ki naka na esara na kapa i bêna o Tavite ma ki hagatugunia renia na tuguni na kapa ni hearihatana.

³⁹O Tavite ki susube ki haga na tatapa borahu iana o Saulo. Hemuri ngaia ki uhungia vê vi râ ma ki bara tanga, suria ga pe bani aresuria me. Ngaia ki vi tanga o Saulo, ki vi: “I bara tangê, vi ve migiheariha na marâ vigê. Na marâ ngegê ka pe bani aresuriê me.” Vikê ngaia ki tavogi râ na marâ hato ngegana.

⁴⁰Ngaia ki tavoa na vato ni bâsuri sipi ma ki tavogi na guani gi rima na hê mamao i ve ma ki tugunigi igê na anga iana. Ngaia ki nanêa na hêsigogo ma ki râ tanga o Goliate.

⁴¹Na Pilisitina ki tavo uga me tanga o Tavite. Na mane i torea na bêata iana o Goliate ki nanago tarana o Goliate. O Goliate ki guru ki râ me hagarangi.

⁴²Matena i bâsia me maninga o Tavite, ngaia ki bâ ruhia ngavê, suria o Tavite ki na kere mane haoru ma ki bâkoro na apena.

⁴³Ngaia ki hagatea o Tavite, ki vi: “Na vato tanga na tao? Igo ko takusia vari, vi na o kani inê?” Ngaia ki arangenia o Tavite tanga na ataro iana.

⁴⁴Ngaia ki hagaramo tanga o Tavite ki vi: “Râ me, be hagangêra na manu ma na marâ vasiga renia na apemu!”

⁴⁵O Tavite ki arami, ki vi: “Igo ko meêheariha, suria igo ko hagêgurigi na tatapa borahu ma na ora ma na gê. Ma inê kê megoheariha, suria gê hagêguria na ramoha iana na Araha God raramohaga hunia iata na me na Isiraelita, go hagamakira.

⁴⁶I ngekê nga na Araha ki page katogo ko soso reniê. Inê kê page teharigo ma kê page reterete ngurigo. Inê kê page hagangêra na manu ma na marâ vasiga renigi na apeta na mane ni me na Pilisitina. Vikana na maveta hagenani ki kahu girara, vi na Isiraelita ki tonga na God iata.

⁴⁷Ma na enoni hato igê ka kahu tahetara, vi na Araha ki pe obanigi na tatapa borahu ma na ora hanana vige hagatahira na kariana renigi. Ngaia ki tehateha tare igê na hearihatana ma ngaia ki page katogamu hato kamu soso renigami.”

⁴⁸O Goliate ki ura nga me hagarangia o Tavite. O Tavite ki gaha râ tanga na Pilisitina ki meheariha.

⁴⁹Ngaia ki tagara so igê na anga iana ma ki tavoa na hê. Ngaia ki hêsigogoa o Goliate renia. Na hê ki takea na raevasivasi iana o Goliate ma ki botagia na ratana bêna. O Goliate ki ehu ki abahia na maana i ano.

⁵⁰‘O Tavite ki teharia na Pilisitina renigi na hêsigogo ma na hê. Ngaia ki takea ki me o Goliate Mareha vi renia na tatapa borahu.’

⁵¹O Tavite ki gaha râ tanga o Goliate, ki ura so i pasina, ki amuria akê na tatapa borahu tenia, ma ki retenguria renia ki me. Matena na Pilisitina ka bâsia i me na mane ramo iata, ngaira ka gava.

⁵²Na mane ni me ni Isiraele ma ni Juta ka ngere, ka tanguhira ma ka tarigenira rârâ ma ka tariha i Gata ma igê na maani para i Ekeroni. Na Pilisitina ka mamari ka tâ suria na tara tanga i Saraimi, ki râ ki tariha i Gate me Ekeroni.

⁵³Matena na Isiraelita ka tarigenira hato na Pilisitina, ngaira ka aporo ma ka rurugua na tênga.

⁵⁴O Tavite ki torea râ na bêna o Goliate tanga i Jerusaleme ma ki nakagi igê na ruma na gahu iana na ara ni tangaruha iana o Goliate.

⁵⁵Matena o Saulo ki bâsia o Tavite i râ ki meheariha o Goliate, ngaia ki hagatea o Abenere i bêngenira na mane ni me iana, ki vi: “Abenere, o karena o ti ngekana?” O Abenere ki arami, ki vi: “Maneraha, inê kê pe hagare.”

⁵⁶O Saulo ki bonasia, ki vi: “Râ, ku girara maninga!”

⁵⁷Vikê matena o Tavite ki aporo igê na tênga i murina i nahuia hato ki me o Goliate, o Abenere ki merâ tanga o Saulo. O Tavite ki torea mênga na bêna o Goliate.

⁵⁸O Saulo ki hagatea, ki vi: “Bamane, ti o vaemamu?” O Tavite ki arami, ki vi: “Inê ka no karena o Jese ni Beteleheme na kariamu.