Read Kahua 1 SAMUELE 18 Bible Online

1 SAMUELE 18 - Kahua bible

1 SAMUELE 18

¹Matena o Saulo mo Tavite karu tamasi hato, o Jonatane karena o Saulo ki râ me bâraha o Tavite i parongana ma ki takuia bâraha manga ngaia marena.

²Haganega tenia na matena ngekana o Saulo ki têngania o Tavite ma ki pe naka vê ke aporo i pasina.

³O Jonatane ki tohe, vi o Tavite ma ngaia karu hetaresurige tare ki bê ki arâ, suria i râ me bâraha i parongana.

⁴Ngaia ki tasia râ na aruhana ma ki vatea renia o Tavite henigi na tuguni ni hearihatana iana, na tatapa borahu iana, na epage iana ma na hogosina.

⁵Na hearihatana, o Saulo ki hagatorangenia o Tavite tangagi, ka tavoraha bâkoro tare. Tahema o Saulo ki naka o Tavite, ki bêngenira ta na apaneni na mane ni me iana. Na tarana ngekana ki hagakoro obata na mane, ga bêngenira na mane ni me ma na mane ni me nogata.

⁶Matena na mane ni me ka aporo i pasita igê na matena i aporo o Tavite i murina i nahuia hato o Goliate, na gete surigi na ara ni hinua i Isiraele ka hura me ka mehetarahu o Saulo na maneraha. Ngaira ka vagevage, ka mâmâ ma ka tarugigi na gogo ma na gita.

⁷Ngaira ka obakoro ngavê ma ka ki vikê: “O Saulo ki mutera na rehagaro ma na rehagaro ma o Tavite na tangahuru ma na tangahuri rehagaro.”

⁸O Saulo ki pe obania na ki vikana ma ki mangariaga ngavê. Ngaia ki vi: “Ngaira ka vi, vi o Tavite ki mutera na tangahuru ma na tangahuri rehagaro ma ka vi, vi inê kê mutera ma na rehagaro ma na rehagaro. Ngaira ka page naka ke maneraha ngaia!”

⁹Tahema tenia na tangiana ngekana ngaia ki hengaria o Tavite ma ki ringia.

¹⁰Ki tangi me ma God ki naka na ataro era ki angaria o Saulo. Ngaia ki togo akuru i ruma iana manga na mane i beka. O Tavite ki tarugia na gita manga i na ara ni tangiani. O Saulo ki têa na ora. O Saulo ki tako i obana, ki vi:

¹¹“Be takea henia na apê.” Ngaia ki takea hagerua renia ma o Tavite ki hagatarahia tare.

¹²O Saulo ki magutenia o Tavite, suria na Araha ki ngahisia o Tavite ma ki bani kasi renia o Saulo.

¹³Tahema o Saulo ki hagatorangenia vê ma ki kasia ki bêngenira na mane ni me iana tanga na hearihatana.

¹⁴Na ara ni tarani i katogi o Tavite, ka tavoraha bâkoro, suria na Araha ki ngahisia.

¹⁵O Saulo ki girara, vi na tarani i katogi o Tavite, ka tavoraha bâkoro. Tahema ngaia ki ama ni magutenia ngavê nga.

¹⁶Na enoni hato i Isiraele me Juta ngaira ka obania bâraha o Tavite, suria ngaia ki bêngenira igê na hearihatana ma ki tehateha tare.

¹⁷Hoita, o Saulo ki vi tanga o Tavite, ki vi: “Ikê ka Meraba ka kareku hagenago. Inê kê page hagauragingenia ka kareku henigo, manga go tagara tangê manga na mane ni me ramo i tototo suriê ma ko meraheariha na merongana na Araha.” O Saulo ki takusia, vi igê na tarana ngekana na Pilisitina ka page nahuia o Tavite ki meme, ma ki mareha vi ngaia marena o Saulo.

¹⁸O Tavite ki arami, ki vi: “I pe ararigami inê ma na ahemata iana o vaemaku, vigê voravora re o hungâna na maneraha.”

¹⁹Matena i râ me na matena viga hagauragingenia igê ka Meraba henia o Tavite, ngaira ka hagauragingenia ma henia o Atiriele na mane ni Megola.

²⁰Hoi, ka Mikale ka karena o Saulo ki obania o Tavite. Matena o Saulo ki rongo vikana, ngaia ki vagevage.

²¹Ngaia ki tohe, ki vi: “Be hagauragingenia ka Mikale henia o Tavite. Inê be katoa ka kareku ke manga na tu tanga o Tavite, hanana na Pilisitina ka nanahuia ki meme.” Hoita, o Saulo ki vi tanga nikâ o Tavite, ki vi: “Igo ko page voravora re o hungâku.”

²²Ngaia ki bonasira na mane ni hagaotonga iana, ka metamasi getea o Tavite, ka vi: “Na maneraha ki vagevagesigo ma na mane ni hagaotonga iana hato ka obanigo nogata. I ngekê ki na matena koro tangago, go auragia igê ka karena.”

²³Vikê ngaira ka hagarongoa vikana o Tavite. O Tavite ki aramira ki vi: “Ga hehungâta tanga na maneraha ki na tarana i higa ngavê. Ngaia ki pe arariê, inê na enoni matareha ma purua ma.”

²⁴Na mane ni hagaotonga ka hagarongoa o Saulo renia na tamasinga iana o Tavite.

²⁵O Saulo ki bonasira ka vi tanga o Tavite, ka vi: “Na maneraha ki pe obania na vurina na gete, nga noga ma na gavoni na varata na Pilisitina tangarê gi tage, go nahuira ka meme manga na siva tangara na merongana.” Ikê nga na katoha iana o Saulo, hanana vi na Pilisitina ka nahuia ki meme o Tavite.

²⁶Na mane ni hagaotonga iana o Saulo ka hagarongoa o Tavite renia na tamasinga iana. O Tavite ki vagevage, hanana vi hehungâta tanga na maneraha. I nago na tarana na tangiana ni hagataku,

²⁷O Tavite ma na mane ni me iana ka nahuira ka me na Pilisitina tangarê gi rua. Ngaia ki toregi me na gavoni na varata tanga na maneraha ma ki tomanigi tanga, hanana vi ngaia ki voravora re o hungâna. Vikê o Saulo ki tuguhia, vi hagauragingenia ka Mikale ka karena henia o Tavite.

²⁸O Saulo ki kahu tahetara maninga, vi na Araha ki ngahisia o Tavite ma ki girara nikâ vi ka Mikale ka karena ki takuia o Tavite.

²⁹Vikê ngaia ki kahu ama ni magutenia ngavê nga o Tavite ma ki merongasia rârâ o Tavite, mataro me ki me ngaia o Saulo.

³⁰I na ara ni matena na mane ni me na Pilisitina ka arâ me tanga na hearihatana, o Tavite ki mutera rako nga na Pilisitina, teharira na ani getera na mane ga bêngenira na mane ni me iana o Saulo. Tahema o Tavite ki rongo raha ngavê na atana.