Read Kahua 1 SAMUELE 19 Bible Online

1 SAMUELE 19 - Kahua bible

1 SAMUELE 19

¹O Saulo ki vi tangara o Jonatane o karena ma na mane ni hagaotonga hato iana, hana vi ngaia ki kato vi nanahuia ki meme o Tavite. Ma o Jonatane ki takuia ngavê o Tavite.

²Tahema ngaia ki vi tanga o Tavite, ki vi: “O vaemaku ki obania vi nahuigo ko meme. Go bâbâsurigo maninga i gomaha mavoraro. Go ahiahi igê ta na agua i pinihi ma ko gâga igê.

³Igamirua, o vaemaku menê, kamuru page huhura vê i bemu ma kamuru rêra i bemu go ahiahi igê. Inê kê page tamasigo tanga. Manga vigê tarahua ta na marâ, hoi, inê kê page hagarongogo renia.”

⁴O Jonatane ki kasikasia akê o Tavite tanga o Saulo, ki vi: “Vaemaku, siana ko erasia o Tavite na kariamu. Ngaia ki pe erasigo rârâ renia ta na marâ ma ki tamanigo bâraha tare hete.

⁵Ngaia ki kasi manavana, matena i nahuia ki me o Goliate, ma na Araha ki katora na Isiraelita ka teha. Matena go bâsia vikana, igo ko vagevage. Tanu hega go kato, vigo erasia o Tavite, i pe erasia rârâ ta na marâ? Tanu hega ko obania vigo nahuia ki meme purua?”

⁶O Saulo ki urusi parongana renia na tamasinga iana o Jonatane ma ki tohe renia na Araha, vi ngaia ki hato vige pasi nahuia o Tavite ke meme.

⁷Vikê o Jonatane ki unia o Tavite ma ki hagarongoa renigi na ara ni marâ. Ma hemuri ngaia ki merâ tanga o Saulo ma o Tavite ki tagara aporo tanga na maneraha manga i nago.

⁸Na hearihatana henira na Pilisitina ka akê me nikâ. O Tavite ki taharira ma ki teharira ngavê. Na Pilisitina ka gava.

⁹I ta na tangiana na Araha ki naka na ataro era ki angaria aporo nikâ o Saulo. O Saulo ki oga i ruma iana. Na ora i rimana. O Tavite ki oga i ngekana ma ki tarugia na gita.

¹⁰O Saulo ki uhungia vi takea o Tavite renia na ora iana henia na apê. Ma o Tavite ki hagatarahia ma na ora ki hita ki rapu igê na apê. O Tavite ki gava ma ki tahi.

¹¹Igê nga na bungiana ngekana o Saulo ki kasira tani na me, ka ura rihia na ruma iana o Tavite ma ka nahuia ki meme igê na mavorarotagana. Ka Mikale ki haganunua o vaniana, ki vi: “Manga go pe gavagava i rikini bungi akê, i gomaha igo ko page meme.”

¹²Ngaia ki kato tanga ki rere hura igê na mabaha. O Tavite ki gava ma ki tahi.

¹³Hemuri ka Mikale ki tavoa na nununa na ataro ni anumasiha ni ruma, ki hagatâhia i bea, ma ki ratoa na bêna renia na bêbê ga tagarahia renigi na varehuta na goti, ma ki aruha hagenani renia.

¹⁴Matena na me iana o Saulo ka râ me hanana viga hagatotongoa o Tavite, ka Mikale ki vi tangara, ki vi, vi o Tavite ki maeha.

¹⁵O Saulo ki bonasira, ki vi: “Mu aporo, kamu bâ apena. Mu torea me ikê igê na bea iana, hanana gê nahuia ki meme.”

¹⁶Ngaira ka banu i ruma ma ka bâsia ma na nununa na ataro ni anumasiha i bea henia na bêbê ga tagarahia renigi na varehuta na goti, ga ratoa renia na bêna.

¹⁷O Saulo ki hagatea ka Mikale, ki vi: “Tanu hega go hagaparuê vikana? Tanu hega kanigo naka vê ki gava na merongaku?” Ka Mikale ki arami, ki vi: “Suria manga vigê pe tamania ke gavagava, ngaia ki page nahuiê kê meme.”

¹⁸O Tavite ki tahi ma ki gava tanga i Rama i pasina o Samuele ma ki hagarongoa renigi na bagatauhana o Saulo tanga. Hemuri ngaia mo Samuele karu râ tanga na ruma iata na poropete ma ka oga igê.

¹⁹O Saulo ki rongo, vi o Tavite ki oga i ruma iata na poropete i Rama.

²⁰Vikê ngaia ki hagatorangenira tani na mane ni me iana, hanana viga hagatotongoa. Ngaira ka bâsia na haku na poropete ga mâmâ ma ka ngerengere. O Samuele ki bêngenira. Hoi, na raramohana God ki angarira na me iana o Saulo ma ngaira ka haganega nogata ka mâmâ ma ka ngerengere.

²¹Matena o Saulo ki rongo vikana, ngaia ki hagatorangenira nikâ tani na mane tora tamasinga, ma ngaira nogata ka haganega ka mâmâ ma ka ngerengere. Ngaia ki hagatorangenira tani nikâ na mane tora tamasinga, ma ki tagenana ma.

²²Hoi, hemuri ngaia marena ki tavoraha tanga i Rama. Matena i tariha me igê na bagavekaru raha i Seku, ngaia ki hagate renirerua o Samuele mo Tavite, ma ki girara, vi ngairerua karu gâga i ruma iata na poropete.

²³Matena i arâ vê mênga i ngekana, ma na raramohana God ki angaria nogana, ma ngaia ki mâ ma ki ngerengere gogogo rârâ mataro me ki ata râ i ruma iata na poropete.

²⁴Ngaia ki tasigi râ na gahu iana ma ki mâ ma ki ngerengere i maana o Samuele rârâ ma ki vota ki tâ rupaturi suria na tangiana hagenani ma na bungiana hagenani. Tahema ki haganega na tamasinga i vi, ‘I hega, o Saulo ki poropete vari nogana?”