Read Kahua 1 SAMUELE 20 Bible Online

1 SAMUELE 20 - Kahua bible

1 SAMUELE 20

¹Hoita, o Tavite ki gava tenia na ruma iata na poropete i Rama ma ki râ i pasina o Jonatane. Ngaia ki hagatea o Jonatane, ki vi: “Na ta kê katoa? Na ta kê erasia? Na ta kê erasia renia o vaemamu, hanana i obania vi nahuiê ke meme renia?”

²O Jonatane ki arami, ki vi: “God ke urapusigo, siana ko meme. O vaemaku ki hagarongoê tare renigi na ara ni tarani i katogi, na ani raha ma na ani sisite. Tanu hega kani vi pinihia na tarana ngekana teniê? Siana ko magu. Ngaia ki mareha vige monari.”

³Ma o Tavite ki arami, ki vi: “O vaemamu ki bani girara bâkoro, vi igo ko takuiê bâraha. Tahema ngaia ki pinihia tenigo na katoha iana, i era ma igo ko hataera renia. Inê ke tohe tangago renia na Araha mamauri, vi inê kê aporo i na kiru.”

⁴O Jonatane ki vi: “Na obaniha iamu ki manga i he? Inê kê girara, gê tamanigo igê.”

⁵O Tavite ki arami, ki vi: “I gomaha ki na tangiana raha tanga na Hageha Haoru. Inê kê vi, vigê ngêngê henia na maneraha. Manga go takusia, vi i koro ma, inê kê page arâ kê ahiahi i bemu rârâ ma ki mataro me igê na manurahitana i oga gomaha.

⁶Manga o vaemamu ma ki bâbâ tihiê igê na vagatari, hoi, go vi tanga, vi inê kê nungigo, kê hatani aporo i pasiku i Beteleheme, suria ngaia ki na matena tanga na ruma hagenani iaku, vigami vogasi igê manga bani hanana i na ara ni harisi.

⁷Manga i vi, vi ‘I koro ma,’ inê kê page apeape tatara. Ma ki manga vi mangariaga, igo ko kahu girara, vi ngaia ki tâ gatagata igê vi nahuiê kê meme.

⁸Gê nungigo nga, ko katoa vikana tangê, hanana go hagamonaria na tohenga renia na Araha, go katoa tangê. Manga vi inê, ma kê erasia ta na marâ, hoi, go nanahuiê maremu kê me. Siana ko toreê tanga o vaemamu, ki nanahuiê ngaia kê meme!”

⁹O Jonatane ki arami, ki vi: “Vego, siana ko tako vikana! Manga vi inê ma be girara bâkoro, vi o vaemaku ki togeaga vi nanahuigo ko meme, i asa ma be pinihia tenigo.”

¹⁰O Tavite ki hagatea, ki vi: “Ti ki page hagarongoê, manga vi na aramiha iana o vaemamu ki rongorongo mamagutaga?”

¹¹O Jonatane ki arami, ki vi: “Garu râ i bemu.” Vikê ngairerua karu râ.

¹²O Jonatane ki vi tanga o Tavite, ki vi: “Inê kê tohe renia na Araha God iata na Isiraelita, vi i na matena manga i ngekê i gomaha ma i oge gomaha inê kê page surarea o vaemaku. Manga vi ngaia ma ki tako renigo, inê kê page kasia na rongoha tangago.

¹³Ma ki manga vi ngaia ma ki tako vi nanahuigo, hoi, inê kê tohe vi na Araha ke nahuiê nga be me, manga vigê pe kasia vê na rongoha tangago ma kê pe hagatahigo. Na Araha ke ngahisigo manga i nago i ngahisia noga o vaemaku.

¹⁴Manga vi inê ma kê tahitahi, hoi, go hagamonaria na tohenga iamu renia na Araha tangê, vigo korokoro tangê ma ko tototo suriê. Ma ki manga vigê meme,

¹⁵hoi, go korokoro tanga na ahemata iaku ma ko tototo suria tare.

¹⁶I hemuri me, matena na Araha ki mutera hato igê na merongamu, na tohenga ni hetakuihaheri iakerua ki nganganihaga mênga. Manga i mareha, na Araha ke hagaitangigo.”

¹⁷O Jonatane ki katoa o Tavite ki tohe, vi takuia akê nikâ, suria o Jonatane ki takuia o Tavite manga ngaia marena.

¹⁸Hemuri o Jonatane ki vi tanga, ki vi: “Suria i gomaha ki na tangiana raha tanga na hageha haoru, ngaira ka page bâbâ tihigo, matena ga ngêngê haku.

¹⁹Ma i oge gomaha ngaira ka page bâbâ tihigo ngavê. Tahema gu ahiahi nikâ igê na agua, go bani ahi noga igê i nago. Go ahiahi i murini râ na hê ga haripage i ngekana.

²⁰Inê kê page hanasigi na hê ga haripage ngegana renigi na mage gi oru gê katokato manga vi inê kê hagesuri.

²¹Inê kê page vi tanga na kariaku, ki arâ ki garigi na mage. Manga vigê ngerengere tanga, kê vivi, ‘Vego, na mage i na apanena me tangago. Toregi me!,’ hoi, i vi, vi igo ko apeape tatara ma ko girara go kahu rêra mave me. Inê kê tohe renia na Araha mamauri vi igo ko apeape tatara.

²²Ma ki manga gê ngiria, kê vivi, ‘Na mage i na apanena râ,’ hoi, go gavagava suria na Araha kani hagatorangenigo vê.

²³Tanga na tohenga ni hetakuihaheri iakerua: na Araha ki page katogerua karu hagamonaria tare.”

²⁴Hoi, o Tavite ki ahi i bemu. Igê na tangiana raha na hageha haoru, na maneraha o Saulo ki râ me tanga na ngêra.

²⁵Ngaia ki oga so igê na bani atohana igê na apê. O Abenere ki oga râ tanga ma o Jonatane ki oga ki maatia bême i tapanena na vagatari. Na atohana o Tavite ki baguru.

²⁶O Saulo ki hagate rârâ renia o Tavite igê na tangiana ngekana, suria ngaia ki tako i obana, ki vi: “Ta na marâ vari ki tarahua o Tavite, tahema i katoa ki pe matarotaro, hanana vige râ me tanga na ngêra.”

²⁷Na tangiana i murina na tangiana raha na hageha haoru na atohana o Tavite ki baguru mênga. Vikê o Saulo ki hagatea o Jonatane, ki vi: “Tanu hega o Tavite ki pe râ me tanga na ngêra i na nora ma i ngekê?”

²⁸O Jonatane ki arami, ki vi: “Ngaia ki nungiê ki râ i Beteleheme.

²⁹Ngaia ki vi, ‘Gu nakê be râ, suria na ruma iamami ki hagahigasia na tangiana ni vogasiha i hinua. O veogaku ki uniê vigê arâ. Manga vi igo ka na tamaku koro, hoi, gu nakê be râ be bâsira na kariaku.’ Tahema ki baguru na atohana igê na vagatari.”

³⁰O Saulo ki mangariaga ngavê tanga o Jonatane, ki vi: “Kare ni tara go! Gu guguruga ngavê manga kenamu! Inê kê bani girarago go tê henia o Tavite. Igo ko hagamakigamurua igo ma kenamu ngekana!

³¹I hega, go pe girara vari, vi igo ki asa, vigu page vora re na maneraha, manga vi o Tavite ma ki tahitahi mênga? Râ, ku torea me ikê! Ngaia ki meme nga!”

³²O Jonatane ki hagatea, ki vi: “Tanu hega kani tuguhia nga vi meme? Na ta kani erasia?”

³³Vikana o Saulo ki arihatenia na ora iana, hanana vi nahuia ki meme o Jonatane. Vikana o Jonatane ki kahu tahetara manga, vi o vaemana ki togeaga hanana vi nahuia nga ki meme o Tavite.

³⁴O Jonatane ki mangariaga ngavê ma ki aharaga vê ki râ tenia na vagatari. Ngaia ki usi vige ngê igê nga na tangiana raha na Hageha Haoru ma igê na ruata na tangiana nikâ. Ngaia ki hataera ngavê, suria o Saulo ki guharia o Tavite.

³⁵Ki tangi me, ma o Jonatane henia na kariana ki râ i bemu, hanana i mehetarahu o Tavite manga garu bani kato.

³⁶O Jonatane ki vi tanga na kariana i merâ, ki vi: “Tango râ, ku garigi me na mage, gê page hanatenigi.” Na kariana ki tango ma o Jonatane ki hanatenia na mage ki vato i nago tarana.

³⁷Matena na kariana ki tariha râ igê na agua i rapu igê na mage, o Jonatane ki ngiria râ, ki vi: “Na mage kani kerevê râ.

³⁸Siana ko ura so ma i ngekana. Gaha vê!” Na kariana ki tavoa akê na mage ma ki meaporo tanga o Jonatane na avanuna.

³⁹Na kariana ki tako purupuru ma. O Jonatane ma o Tavite ngairerua ma karu girara.

⁴⁰O Jonatane ki tagarenigi na tangaruha iana tanga na kariana, ma ki vi tanga, ki vi: “Gu migiaporo i hinua.”

⁴¹I murina i râ na kere mane, o Tavite ki aharaga akê i murini râ na hê ga haripage, ma ki ura mave me. Ngaia ki susure ma ki tube so i ano hageoru. O Jonatane ma ngaia karu angiheri, matena garu hesigini. O Tavite ki rugu ngavê na obana teharia o Jonatane.

⁴²Hemuri o Jonatane ki vi tanga o Tavite, ki vi: “God ke ngahisigo. Na Araha ke katogerua nga, igo menê, na raraha iamu ma na aniku, hanana ge hagamonaria tare na tohenga ni hetakuihaheri iakerua.” Hoi, o Tavite ki râ ma o Jonatane ki aporo i hinua.