Read Kahua 1 SAMUELE 21 Bible Online

1 SAMUELE 21 - Kahua bible

1 SAMUELE 21

¹O Tavite ki râ tanga i Nobo i pasina o Agimeleki na mane ni vogasiha. O Agimeleki ki tata ki ura me vurusia ma ki hagatea, ki vi: “Tanu hega kanigo râ me getego ikê?”

²O Tavite ki arami, ki vi: “Inê kê râ me ikê, suria na maneraha kani vi tangê. Ngaia ki hagapêpuê, vi siana kê hagarongoa rârâ ta na enoni renia na tarana i hagatorangeniê me ikê tanga. Ma tangara na kariaku, hoi, inê kê bani vi tangara, vi igamu kamu page hetarahu i tagua.

³I hega, na ngêra ki gâga i pasimu? Me na guani gi rima na bereti se na ani mavê na ngêra i pasimu.”

⁴Na mane ni vogasiha ki vi: “Inê kê pe nahunigi rârâ na bereti purua. Na bereti apuna ma ngegê. Inê kê girara gê vatego renigi, manga vi na me iamu ma ka pe meramêru rârâ na gete.”

⁵O Tavite ki arami, ki vi: “Ngaira ki mareha! Na me iaku ka oto surigi tare na ramata igê na rotu i na ara ni mateni igami kami arâ igê na hearihatana purua. Ma ngaira ka matarotaro ngavê i ngekê nga, matena mi arâ tanga na hearihatana iana na Araha.”

⁶Vikê na mane ni vogasia ki vatea o Tavite renigi na bereti apuna, suria ngaia ki nahunigi ma na bereti, i bani vogasia God renigi ma ki bani tavogi râ tenia na bea apuna ma ki bani urusigi renigi na ani haoru.

⁷O Toeke ni Etome na mane i bâsurira na mane ga bâbâsurira na togoha iana o Saulo, ngaia ki oga i ngekana igê na tangiana ngekana, suria i tuguhia vi vogasia na Araha.

⁸O Tavite ki vi tanga o Agimeleki, ki vi: “Igo ko nahunia vari na ora se na tatapa borahu tangê? Na maneraha ki bonasiê ki hagasuê. Tahema inê kê pe ape haritagi, hanana vi ve torea na tatapa borahu iaku se vi tani na tangaruha.”

⁹O Agimeleki ki arami, ki vi: “Inê kê nahunia ma na tatapa borahu iana o Goliate na Pilisitina, go bani nahuia ki me igê na maruguna i Ela. Ngaia kani i rarona na gahu i murina na anga ni girarasiha. Manga go obania ma ko torea. Ngaia ma kanigê nahunia ikê.” O Tavite ki vi: “Vateê. Ngaia ki koro teharigi na ani getigi.”

¹⁰Hoi, o Tavite ki râ ki gava pania o Saulo ma ki râ i pasina o Akesi na maneraha i Gate.

¹¹Na mane ni hagaotonga iana na maneraha ka hagatea o Akesi, ka vi: “I hega, i mareha vi o Tavite ngekê na maneraha. Ngaia nga ki na mane, na gete ka baro ki renia, matena ga mâ ka vi: ‘O Saulo ki mutera na rehagaro ma na rehagaro ma o Tavite na tangahuru ma na tangahuri rehagaro.’

¹²O Tavite ki takoha bâraha renigi na tamasinga iata ma ki haganega ki magutenia ngavê na maneraha o Akesi.

¹³I na ara ni mateni o Tavite ki gâga henira, ngaia ki hagaparu vi bekabeka ma ki katokato manga na mane i higa, matena ga uhungia, viga ranguia ma ka rangu berabera renia. Ngaia ki ata ni segesege mavê surigi na maani para ni hinua ma ki vavave ki soso i taboturina.

¹⁴Tahema o Akesi ki vi tangara na mane ni hagaotonga iana, ki vi: “Bâ, ngaia ki beka ngavê! Tanu hega mu torea me tangê?

¹⁵I hega, i mamênga vari vige arari na mane ga beka? Tanu hega mu torea me nikâ tani i hagamarâ apeku renigi na bekaniha iana ikê nga i ruma iaku?”