Read Kahua 1 SAMUELE 22 Bible Online

1 SAMUELE 22 - Kahua bible

1 SAMUELE 22

¹O Tavite ki gava tenia na hinua i Gate ma ki râ tanga na vaba hagarangia na hinua i Atulama. Matena o veogana ma na ruma iata ka rongo, vi ngaia ki gâga i ngekana, ngaira ka râ ka oga henia.

²Na enoni, ga mamasiaga renira na enoni getera, se ga aharêsira na hagaba, se i pe togo na aitangihata, ngaira ka hakunia nogata. Ngaira ka na ararina na tangarê ge he na mane, ma ngaia o Tavite ki bêngenira.

³O Tavite ki pania i ngekana ma ki râ i Misipa i Moaba. Ngaia ki vi tanga na maneraha i Moaba, ki vi: “Gu nakarerua o vaemaku ma kenaku karu râ me ma karu oga henigo, mataro me kê girara na katoha iana God tangê.”

⁴Hoi, o Tavite ki panirerua so na enana i Moaba i pasina na maneraha, ma ngairerua karu oga i ngekana surigi na mateni o Tavite ki ahi igê na vaba.

⁵Hoi, o Gata na poropete ki râ i pasina o Tavite ma ki vi: “Siana ko oga ikê!” Gu râ nga i Juta. Vikê o Tavite ki tavoraha ma ki râ tanga na vapuna i Gerete.

⁶I ta na tangiana o Saulo ki oga i Gibea. Ngaia ki têa na ora iana i rimana, ma na mane hato ga bêngenira na mane ni me iana, ka ura rihia. Matena i bani girara, vi i he ka oga igê o Tavite ma na me iana,

⁷ngaia ki vi tangara na mane ga bêngenira na mane ni me iana, ki vi: “Rongo! Igamu na me na raraha iana o Benamino! Mu takusia vari, vi o Tavite ki page haganahunigamu, igamu hato, renigi na mako ma na pariki ni vaini iê? Mu takusia vari vi ngaia ki page kasigamu akê, kamu voravora re na mane, mu bêngenira na mane ni me iana, iê?

⁸Tahema igamu kamu harikato reniê, iê? Mareha rârâ ta na hitangimi, vige hagarongoê, vi o kareku mareku ma o Tavite karu suruheri. I mareha rârâ na hitangimi, vige tako reniê, se vige hagarongoê, renia vi o Tavite, na hitangita na mane ni me iaku mareku, ki garia ta na tarana i ngekê nga, hanana vi nanahuiê kê meme. Ma ki mareha rârâ ta na hitangimi, vige hagarongoê, vi o kareku ki kanukanua o Tavite!”

⁹O Toege ki ura i ngekana henira na mane ga bêngenira na mane ni me iana o Saulo. Ngaia ki vi: “Inê kê basia o Tavite, matena i râ i Nobo i pasina o Agimeleki karena o Agitubo.

¹⁰O Agimeleki ki hagatea na Araha renia na katoha iana tanga o Tavite. Ngaia ki vatea o Tavite renigi na ngêra ma na tatapa borahu iana o Goliate na Pilisitina.”

¹¹Vikê na maneraha o Saulo ki kasi tamasinga tangara o Agimeleki na mane ni vogasiha ma na goana hato ga mane ni vogasiha nogata i Nobo ka râ me. Ma ngaira ka râ me.

¹²O Saulo ki vi tanga o Agimeleki, ki vi: “Agimeleki, gu rongo!” O Agimeleki ki arami, ki vi: “Maneraha, na ta?”

¹³O Saulo ki hagatea, ki vi: “Tanu hega, igamurua, igo mo Tavite, kanimuru harikato reniê? Tanu hega go vatea renigi na ngêra ma na tatapa borahu? Tanu hega go hagatea God renia na katoha iana tanga o Tavite? Bâ, ngaia ki merongasiê i ngekê nga ma ki garia na tarana, hanana vi nanahuiê kê meme.”

¹⁴O Agimeleki ki arami, ki vi: “O Tavite, i bêngenira na mane ni me iana, ngaia ki toto surigo ngavê. Ngaia ki no hungâmu maremu. Ngaia kani bêngenira na mane ga anumasigo. Na enoni hato i ruma iamu ka hagahigasia bâraha.

¹⁵I monari, inê kê hagatea God renia na katoha iana tanga, ma ki mareha i ngekê ma. Tanga na harikatoha renigo, maneraha, siana ko tuguriê inê se vi na hitangita na ahemata iaku, suria inê kê pe hagare rârâ!”

¹⁶Na maneraha ki vi: “Agimeleki, igo ma na goamu hato kamu meme nga!”

¹⁷Vikê ngaia ki bonasira na mane ni anumasiha ga ura hagarangia, ki vi: “Mu nahuira ke me na mane ni vogasiha iana na Araha. Ngaira ma o Tavite ka harikato reniê. Ngaira ka pe hagarongoê renia, vi o Tavite ki gava, henaka ga girara.” Ma na mane ni anumasiha ka usi ngavê, vige nahuira ke me na mane ni vogasiha iana na Araha.

¹⁸Vikê o Saulo ki bonasia o Toege, ki vi: “Gu nahuira ke me!” Hoita, o Toege ki nahuira ngaira hato ka me. Igê na tangiana ngekana ngaia ki nahuira igê ka me na mane ni vogasiha 85, na ani i ararira viga hagagi na anga ni girarasiha.

¹⁹Nikâ o Saulo ki haribona ka nahuira ka me na enoni hato getera i Nobo, na hinua iata na mane ni vogasiha. Ngaira ka mutera ngavê na mane, na gete, na kare, na kare gari, na puruka, na tonki ma na sipi.

²⁰Ma o Abiatare tani o karena o Agimeleki ki gava ki tahi ma ki râ ma ki hakunia o Tavite.

²¹Ngaia ki hagarongoa, vi o Saulo ki mutera na mane ni vogasiha iana na Araha.

²²O Tavite ki vi tanga, ki vi: “I ngekana matena gê bâsia o Toege igê na tangiana ngekana, inê kê bani girara, vi ngaia ki page hagarongoa o Saulo. Tahema inê kê tangahuriê renia ga me na goamu hato.

²³Gu oga so ma heniê. Siana ko magu. O Saulo ki obania vi nanahuigerua, igo ma inê, karu meme. Manga go gâga so ikê, igo ko page tahitahi.”