Read Kahua 1 SAMUELE 23 Bible Online

1 SAMUELE 23 - Kahua bible

1 SAMUELE 23

¹O Tavite ki rongo, vi na Pilisitina ka taharia na hinua i Keila ma ka hanagogi igê na koni, ga rurugi haoru.

²Tahema ngaia ki hagatea na Araha, ki vi: “I hega, i koro ma vigê taharira na Pilisitina, se mareha?” Na Araha ki arami, ki vi: “I koro ma. Go taharira ma ko hagatahia i Keila.”

³Ma na me iana o Tavite ka vi tanga, ki vi: “Ikê i Juta ka rako noga igê na tarani ga hagamamaguraga. Manga vi igia ma ka arâ i Keila, hanana viga taharira igê na mane ni me na Pilisitina, ki kahu aera ngavê!”

⁴Vikê o Tavite ki hagatea nikâ na Araha, ma na Araha ki aramia, ki vi: “Gu râ i Keila, ku taharira na Pilisitina. Inê kê page katogo ko teharira.”

⁵Hoita, o Tavite ma na mane ni me iana ka râ i Keila ma ka taharira igê na Pilisitina. Ngaira ka mutera rako ma ka henahuraura na togoha iata. Vikana nga hanana o Tavite i hagatahia na hinua i Keila.

⁶Matena o Abiatare karena o Agimeleki ki gava, hanana i hakunia o Tavite i Keila, ngaia ki megava na anga ni girarasiha.

⁷O Saulo ki rongo, vi o Tavite ki bani râ i Keila. Tahema ngaia ki vi: “God kani naka me tangê. O Tavite ki hagaratena marena, suria i banu igê na hinua ga pararihia i tonga renigi na maani para nganganihaga.”

⁸Vikê o Saulo ki unira haku na mane ni me iana tanga na hearihatana ma ki bonasira ka tavo uga tanga i Keila, ma ka ura rihira banu o Tavite ma na me iana.

⁹Matena o Tavite ki rongo, vi o Saulo ki kato vi taharia, ngaia ki vi tanga o Abiatare na mane ni vogasiha, ki vi: “Torea me na anga ni girarasiha!”

¹⁰Hemuri o Tavite ki vi: “Araha God iata na Isiraelita, inê kê rongo, vi o Saulo ki kato vi arâ me i Keila ma ki ruhuruhua suria gê oga igê inê na kariamu.

¹¹I hega, na ai ni Keila ka page tagareniê vari tanga o Saulo? I monari vi o Saulo ki page arâ me? Araha God iata na Isiraelita, inê kê nungigo nga, hanana vigo aramiê!” Na Araha ki aramia, ki vi: “I monari, o Saulo ki page arâ me.”

¹²O Tavite ki hagatea, ki vi: “I hega, na ai ni Keila ka page tagareniê vari tanga o Saulo, se mareha?” Na Araha ki aramia, ki vi: “Mako!”

¹³Vikê o Tavite ma na me iana, na ararina na tagarê ge ono, ka pania ototo râ nga i Keila ma ka ata ni râ mavê. Matena o Saulo ki rongo, vi o Tavite ki bani gava tenia i Keila, ngaia ki naka mavê na katoha iana.

¹⁴O Tavite ki ahi ki oga igê na hungani igê na bagamasusu raha i Sipi. O Saulo ki garia bâraha hanana vige tarahua, ma God ki pe tagarenia o Tavite tanga o Saulo.

¹⁵O Tavite ki tahetara, vi o Saulo ki obania vi nanahuia ki meme. O Tavite ki oga i Goresa igê na masusu i Sipi.

¹⁶O Jonatane ki râ ki vatugia i ngekana ma ki kanukanua, ki vi, vi God ki anumasia.

¹⁷Ngaia ki vi: “Siana ko magu. O Saulo o vaemaku ki bara, vige erasigo. Ngaia ki girara bâkoro ngavê, vi igo nga kanigo page maneraha i Isiraele, ma inê ka na ruata me tangago.”

¹⁸Ngairerua karu tohe, vigaru hekomaniheri. O Tavite ki oga vê i Goresa ma o Jonatane ki aporo i pasina.

¹⁹Tani na enoni i Sipi ka râ i Gibea i pasina o Saulo ma ka hagarongoa, ka vi: “O Tavite ki ahi ki gâga i na apanena iamami i Goresa igê na hungana i Gakila igê na masusu i Negeve i Juta.

²⁰Maneraha, igami kami bani girara, vi igo ko bani rapasia me vigo hagatotongoa. Go arâ me i na apanena iamami ma kami tamanigo, hanana go taua.”

²¹O Saulo ki arami, ki vi: “Na Araha ke korokoro tangagamu, suria igamu kamu tamaniê.

²²Mu arâ nikâ kamu bâbâ maninga aporo renia. Mu tarahua maninga, vi i he kani gâga igê ma o ti kani bâsia i ngekana. Inê kê bani girara, vi ngaia ka na mane i katokato bâraha.

²³Mu tarahugi nga na agua i ahiahi rârâ surigi ma kamu aporo me nga, kamu hagarongoê ototo râ nga. Hemuri inê kê page arâ henigamu, ma ki manga vi ngaia ma ki gâga mênga i ngekana, hoi, inê kê page tarigenia mataro me kê taua, henaka gê garia suria na apanena hagenani i Juta.”

²⁴Hoita, ngaira ka râ ma ka aporo i Sipi hagenago tarana o Saulo. O Tavite ma na me iana ka oga igê na masusu i Maone igê na maruguna i hihiruga igê na bagamasusu raha i Negeve i Juta.

²⁵O Saulo ma na mane ni me iana ka râ ka garia o Tavite. O Tavite ki rongo vikana ma ki râ tanga na hungana i hêga igê na masusu i Maone ma ki oga igê. Matena o Saulo ki rongo vikana, ngaia ki mumuria.

²⁶Na hungana ki voasira o Saulo ma na mane ni me iana tenira o Tavite ma na me iana: tani i tapanena ma tani i tapanena. O Tavite ma na me iana ka hatani gava tenira o Saulo ma na mane ni me iana, ga sugi urarihira hanana viga taura.

²⁷Na matena nga ngekana ta na mane tora tamasinga ki mataro me ma ki vi tanga o Saulo, ki vi: “Gu aporo me ototo. Na Pilisitina ka taharia na apanena iamu!”

²⁸Vikê o Saulo ki naka vê vige tarigenia o Tavite ma ki râ ki meraheariha na Pilisitina. Tahema ga hêtana na hungana ngekana vi Hungani ni Voasiha.

²⁹O Tavite ki pania i ngekana ma ki râ tanga na apanena i Engeti ma ki ahi ki oga igê.