Read Kahua 1 SAMUELE 24 Bible Online

1 SAMUELE 24 - Kahua bible

1 SAMUELE 24

¹Matena o Saulo ki meraheariha hato na Pilisitina, ngaia ki rongo, vi o Tavite ki oga igê na masusu i Engeti.

²O Saulo ki merarâ na 3,000 na Isiraelita na mane ni me ramo iana ma ka râ ka garira o Tavite ma na me iana kerekê i Hê ni Goti Vasiga.

³Ngaia ki ata râ igê na vaba hagarangigi tani na ruma ni sipi i na akerena na tara. Ngaia ki banu igê, hanana i hega. O Tavite ma na me iana ka bani ahi ka gâga i na murina banu ngavê na vaba ngekana.

⁴Na me ka vi tanga o Tavite, ka vi: “Hoi, nga na matena tangago ngekê! Na Araha ki bani hagagirarago, vi ngaia ki page tagarenia tangago na merongamu, hanana go katoa na anima na tarana go obania tanga.” O Tavite ki ango râ ma ki retea râ na kere taretarena râ na tuguni na aruhana o Saulo. O Saulo ki pe hagarea rârâ.

⁵Hemuri o Tavite ki hagahunia so marena.

⁶Ngaia ki vi tangara na me iana, ki vi: “Na Araha ke urapusiê, hanana siana be erasia na maneraha iaku, suria na Araha kani atea ki maneraha. I tuguhiê nga, vi siana be erasia rârâ, suria ngaia nga ka na maneraha na Araha ki atea!”

⁷Tahema o Tavite ki kato ki bara tangara na me iana, vige taharia o Saulo. O Saulo ki aharaga, ki hura tenia na vaba ma ki râ.

⁸Hoi, o Tavite ki mumuria hura ma ki ngiria, ki vi: “Maneraha!” O Saulo ki ahoro aporo me. O Tavite ki susure ki tube so i ano ki hagahigasia.

⁹Ngaia ki vi: “Tanu hega kanigo tongesurira na enoni ga visiê, vigê obania vigê erasigo?

¹⁰Ma ku bâ. I ngekê nga igê na vaba na Araha ki mahatangenigo tangê. Tani na mane ni me iaku ka vi tangê, vigê nanahuigo ko meme. Ma inê kê takigo ma kê vi, i bara ngavê tangê vi ve erasigo, suria igo nga ka na ani na Araha ki bani atego ko maneraha.

¹¹Bâ vaemaku, bâsia na tarisigana na tuguni na aruhamu. Ngaia gê têa akê ikê. I mataku ma, vi inê be nanahuigo ku meme. Ma ki mareha. Inê kê retea râ ma na kere taretarena râ na tuguni na aruhamu. Na tarana ngekê ki hagatanga monari tangago, vi inê kê pe kato rârâ, vi ve merongasigo, se vi ve erasigo. Igo ma kanigo tarigeniê, hanana vi go nanahuiê kê meme, henaka gê pe erasigo rârâ renia ta na marâ.

¹²Na Araha ke surigerua, vi o ti na hitangikerua kani katoa na tarana i pe oto. Ngaia ke hagaitangigo renigi na bagatauhamu tangê, suria inê ki bara ngavê tangê, vi ve erasigo.

¹³Igo ko bani girara na tamasinga na enoni ka bani visia tare, ka vivi ‘Na enoni era ma kaniga katogi na eraha.’ Tahema inê ki asa vi ve erasigo.

¹⁴Na maneraha i Isiraele na ta kani obania vi nahuia ki meme? Na ta kani tarigenia? Na o i bani me nge! Na gu nge!

¹⁵Na Araha nga kani page surigerua, vi o ti na hitangikerua kani katoa na tarana i pe oto. Ngaia ke bâbâ maninga renia, ke roherohe pusiê ma ke hagatahiê tenigo.”

¹⁶Matena i tamasi hato o Tavite, o Saulo ki vi: “Igo monari ngekê, o kareku o Tavite?” Ma ngaia ki haganega ki angi.

¹⁷Hemuri ngaia ki vi tanga o Tavite, ki vi: “Igo ko oto, ma inê ki mareha. Igo ko bani koro me ngavê tangê, ma inê ma ikê kanigê erasigo.

¹⁸I ngekê igo ko hagamonaria, vi igo ko koro ngavê tangê, suria go pe nahuiê be me, henaka na Araha ki tagareniê tangago.

¹⁹O ti ki girara i taua na merongana ma hemuri ki kasia vê ki arâ ape tatara? Na Araha ke korokoro tangago renia na korohamu tangê i ngekê.

²⁰Hoi, inê kê kahu tahetara renigo, vi igo ko page maneraha i Isiraele, ma na arahanga iamu ki asa vige page hato.

²¹Gu tohe tangê renia na Araha, hanana vi igo ki mareha vigu mutera na raraha iaku, hanana siana ki magahuru na ataku ma na atana na ahemata iaku.”

²²Ma o Tavite ki tohe vikana. Hemuri o Saulo ki aporo i pasina ma o Tavite ma na mane ni me iana ka aporo râ nogata tanga na agua iata ga ahi igê.