Read Kahua 1 SAMUELE 25 Bible Online

1 SAMUELE 25 - Kahua bible

1 SAMUELE 25

¹O Samuele ki me ma na Isiraelita hato ka hakuria ma ka angisia. Ma hemuri ngaira ka bagia i pasina i Rama. I murina ngekana o Tavite ki râ tanga na bagamasusu raha i Parane.

²Ta na mane tenia vagosi ninuni iana o Kalebe, ngaia ki no Nabala. Na hinua iana kani Maone. Na mako iana ki hagarangia i hinua i Karamele. Ngaia ki ruruguha ngavê. Ngaia ki nahunira na 3000 na sipi, ma na 1000 na goti. Ngaia ki maongo ngavê ma ki bagamangamangariaga. Ka Abigaile kaniana ki bâkoro ngavê ma ki takotako mataha ngavê. O Nabala ki tapurura na sipi iana i Karamele.

⁴O Tavite, i oga igê na bagamasusu raha, ki rongoa.

⁵Tahema ngaia ki hagatorangenira na mane haoru tangahuru gi tage tanga i Karamele ma ki bonasira, hanana viga bâbâ renia o Nabala ma ka hagarongoa renia na hagamauru koro iana tanga.

⁶Ngaia ki bonasira, ka vi vikê tanga o Nabala: “Bamane, inê o Tavite kê hagatorangenia na hagamauru koro iaku tangago. Na ara ni marâ ke tavoraha bâkoro tangagamu, igo ma na ruma iamu ma na nahuninga iamu.

⁷Inê kê rongo, vi igo ko tapurura na sipi iamu. Inê kê obania be hagarongogo renira na mane bâsuri sipi iamu, ga râ me i pasimami ma igami kami pe erasira rârâ. Matena ga oga i Karamele, ki mareha vige bâ purusia rârâ ta na marâ.

⁸Go hagatera. Ngaira ka girara ma ga visia vikana nogata tangago. Inê kê nungigo, ko korokoro tangara, suria ngaira ka râ me igê na tangiana raha. Inê kê nungigo, ko vatera na anima na marâ, go girara go votogi tangara ma tangê nogaku, inê o Tavite.”

⁹Hoi, na me iana o Tavite ka torea na tamasinga ngekana tanga o Nabala urusia o Tavite. Ngaira ka ura nanê i ngekana.

¹⁰Ki rârâ ma o Nabala ki hagate, ki vi: “O va ti? Ti ka no Tavite? Inê kê pe girara rârâ. I na matena ngekê na agua ki vunu ma renira na mane rakuraku ga gava!

¹¹Inê ki asa ve votogi na bereti iaku, na ve ma na togoha gê nahuira tangara na mane ga tarupura na sipi, tangara na enoni gê pe hagarera!”

¹²Na me iana o Tavite ka aporo ma ka hagarongoa renia na tamasinga iana o Nabala.

¹³O Tavite ki bonasira, ki vi: “Mu hogotenigi na hogosimi henigi na tatapa borahu iami.” Ma ngaira ka kato vikana ma o Tavite nogana. O Tavite ki merarâ na ararina na tangarê ge he na me iana ma ki panira so na tangarê gi rua na me henigi na toraha.

¹⁴Ta na kariana o Nabala ki vi tanga ka Abigaile kaniana o Nabala, ki vi: “I hega, go bani rongo? O Tavite ki bani hagatorangenira tani na mane tora tamasinga tenia na bagamasusu raha, ka hagamauru koro tanga na avanumami ma ngaia ki guharira

¹⁵Ma ngaira ka koro ngavê tangagami. Ngaira ki asa vige hagamarâ apemami. Ma igê na matena hagenani mi oga henira igê na bagamasusu raha, ngaira ka pe hanagoa rârâ ta na marâ tenigami.

¹⁶Ngaira ka anumasigami igê na tangiani ma na bungiani igê na matena hagenani mi oga henira, kami bâsurira na togoha iamami.

¹⁷Gu tako renia na tarana ngekê ma ku takusia na tarana ta ko page katoa, suria vi na avanumami ma na ruma hato iana ki pe asa vige me. Ngaia ki maongo ngavê ma ki asa vige tê ringena o va ti!”

¹⁸Ka Abigaile ki hatani hagarurugu na tangarê gi rua na guani na bereti, na anga gi rua, ga tagarahirerua renia na gavona na puruka, garu vunu renia na vaini, na sipi gi rima, ga hanura, na 50 kilo na koni ga hanunu, na parani tangarê gi tage na guani na vaini, ma na barani tangarê gi rua na fiki mata. Ngaia ki rutangira na tonki renigi.

¹⁹Hemuri ngaia ki vi tangara na kariana, ki vi: “Mu nanago. Inê kê page mumurigamu vê.” Ngaia ki pe hagarongoa vikana rârâ o vaniana.

²⁰Matena i tagiria na tonki iana ki râ vê igê na agua i arigu igê na tara igê na hungana, ki parama ma ki meratora hetanga o Tavite ma na me iana, viga arâ me tanga.

²¹O Tavite ki bani tako ki vi: “Tanu hega, kanigê anumasigi na nahuninga iana o vani ngekana igê na bagamasusu raha ikê? I mareha rârâ ta na marâ iana vige hanagoa. Na ta kani tamaniê renia? I mareha!

²²God ke nahuiê be me râ nga, manga vi inê ma kê pe mutera na mane ngegana i rikini akê nga. I asa ta na hitangita vige tahi!”

²³Matena ka Abigaile ki bâsia râ o Tavite, ngaia ki hatani vato tenia na tonki ma ki susure ki tubê so i ano,

²⁴i maana o Tavite ma ki vi tanga, ki vi: “Maneraha, gu karingê. Na tarana ngekana ki tâtâ i apeku inê.

²⁵Siana ko tê ringena o Nabala, na beka ngekana. Ha ka na atana! Maneraha, inê kê pe gâga, matena ga râ me na kariamu.

²⁶Na Araha hete kani katogo, ko pe marabaru tangara na merongamu ku mutera. Hoi, inê kê tohe tangago renia na Araha mamauri, vi na hagaitangiha i page tarahua o Nabala, ka tarahura nogata na merongamu ma ngaira hato ga obania viga erasigo!

²⁷Maneraha, gu aganarigi na mahatanga igê. Inê kê toregi me tangagamu, igo ma na me iamu.

²⁸Maneraha, gu bonotenigi na ani mavê na tarani gê pe koro igê. Na Araha ki page nakago ko maneraha ma nikâ na raraha iamu, suria igo ko heariha urusia. Igo ki asa, vigu erasia rârâ ta na marâ igê na ogaha iamu.

²⁹Manga ta na enoni ma ki taharigo ma ki uhungia vi nahuigo ko meme, na Araha God iamu ki page anumasigo manga na mane i anumasia na rêni iana. Tangara na merongamu, ngaia ki page kasira râ, manga na mane i arihatenigi na hê igê na hêsigogo.

³⁰Matena na Araha ki hagamonarigi hato na suruha hato iana tangago ma ki nakago ko maneraha hato i Isiraele,

³¹igo ki asa vigu page tangahurigo se vigu page hetaki, suria vigo nahuira ka me purua ma na enoni ma ko marabaru kê ma maremu. Ma na matena na Araha ki korokoro hato tangago, maneraha, gu takusiê.”

³²O Tavite ki vi tanga, ki vi: “Ge hagarahasia na Araha God iata na Isiraelita, suria ngaia ki kasigo me ko meêhetarahu i ngekê.

³³Ge visia koro God renigi na takoha koro iamu ma na tauhamu i ngekê, suria ngaigi ki hagabarasiê, kê pe nahuira purua ma na enoni ma kê pe marabaru kê ma mareku.

³⁴Na Araha ki hagabarasiê, kê pe erasigo. Ma inê kê tohe renia God mamauri iata na Isiraelita, vi manga vigu pe râ me rêrê ku meêhetarahu, e, vikê na me hato iana o Nabala ke mute i ngekê!”

³⁵Hoi, o Tavite ki aganarigi na mahatanga iana ma ki vi tanga, ki vi: “Gu aporo i pasimu. Siana ko tako bâraha. Inê kê page katoa na tarana go obania.”

³⁶Ka Abigaile ki aporo i pasina o Nabala. O Nabala ki magoto manga vi ngaia ki na maneraha. Ngaia ki tono ki aripo na maana, ma ki obakoro ngavê. Tahema ka Abigaile ki pe hagarongoa rârâ mataro me ki tangi.

³⁷Hoi, matena o Abala ki tako bâkoro aporo na obana, ka Abigaile ki hagarongoa renigi na ara ni marâ. O Nabala ki gasuga ki bagamame ma ki magahugahu ngavê na apena manga na hê.

³⁸Rârâ ka hato na tangiani tangahuru gi tage, na Araha ki hagagasugania ngavê o Nabala ki me hunu.

³⁹Matena o Tavite ki rongo, vi o Nabala ki bani me, ngaia ki vi: “Ge hagarahasia na Araha. Ngaia ki hagaitangia o Nabala, suria ngaia ki guhariê, ma ki hagabarasiê inê na kariana, kê pe bagaparongaku. Na Araha ki hagaitangia o Nabala renia na bagaparongana.” Hoi, o Tavite ki kasi tamasinga tanga ka Abigaile, hanana vi auragia.

⁴⁰Vikê na kariana ka tora tamasinga râ tanga i Karamele tanga ka Abigaile, ka vi: “O Tavite ki hagatorangenigami me, kami megorâ, ko voravora re kaniana.”

⁴¹Ka Abigaile ki susure ki tubê so i ano ma ki vi: “Inê na kariana. Inê kê nanê ma, hanana vigê tananigi na êgata na kariana.”

⁴²Ngaia ki hatani aharaga, ki akê ki oga igê na gerina na tonki. Na hehene gi rima na kariana ka takua. Ngaia ki râ henira na kariana o Tavite ma ki vora re kaniana.

⁴³O Tavite ki bani êragia ka Aginoama ni Jeserele ma i ngekê ka Abigaile nikâ.

⁴⁴O Saulo ki bani hagauragingenia ka Mikale ka karena ma kaniana i nago o Tavite, tanga o Palati karena o Laisi ni Galimi.